ވީވޯ ބްރޭންޑް ގެ ފޯނެއް ވަގަށް ނެގި މީހަކު 5 މަހަށް ޖަލަށް
21 ޖެނުއަރީ 2026 | ބުދަ 13:56ހުއްދަ ނޫން ތަނަކަށް ވަދެ މުދަލަކަށް ބާރު ފޯރުވުމުގެ ދެ ދައުވާއެއްގައި މުޅި ހުކުމަކީ ފަސް މަހާއި 12 ދުވަހުގެ ޖަލު ހުކުމެއް. ބަންދުގައި ހޭދަކުރި މުއްދަތު އުނިކުރުމަށްފަހު ތަންފީޒުކުރަން ޖެހޭނީ ހަތަރު މަހާއި 26 ދުވަހުގެ ޖަލު ހުކުމެއް.
ކްރިމިނަލް ކޯޓު | ރާއްޖެ އެމްވީ
ގެއަކަށްވަދެ ވީވޯ ބްރޭންޑްގެ ފޯނެއް ވަގަށް ނެގި މީހަކު ފަސް މަހަށް ޖަލަށްލުމަށް ކްރިމިނަލް ކޯޓުން ހުކުމްކޮށްފި އެވެ.
މި މައްސަލައިގައި ޖަލަށްލުމަށް ހުކުމްކޮށްފައިވަނީ ހއ. މޮޅަދޫ، އާޒާދު، އަހްމަދު އަބްދުﷲގެ މައްޗަށެވެ.
ދައުވާގެ ހުލާސާގައި ކޯޓުން ވިދާޅުވެފައިވަނީ އަހްމަދު އަބްދުﷲ މިދިޔަ އަހަރުގެ އޮކްޓޫބަރު މަހުގެ 22 ވަނަ ދުވަހު 9:23 ހާއިރު މއ. ރޯސްމީޑްގެއަށް ވަދެ ބަންގްލަދޭޝް ރައްޔިތެއް ކަމަށްވާ އެމްޑީ ރަފީކުލް އިސްލާމް އެ ގޭގެ ގްރައުންޑް ފްލޯގައި ދިރިއުޅޭ ކޮޓަރީގައި ހުރި އެނދުގެ ބާލީސް ކައިރީގައި ބާއްވާފައި އޮތް ވީވޯ ބްރޭންޑްގެ ފޯނު ނަގައިގެން ގޮސްފައިވާ ކަމަށެވެ.
މި ހާދިސާ ހިނގީ އޮކްޓޫބަރު 22، 2024 ގައެވެ. މި މައްސަލައިގައި ހއ. މޮޅަދޫ، އާޒާދު، އަހުމަދު އަބްދުﷲގެ މައްޗަށް ދައުލަތުން ވަނީ ދެ ދައުވާއެއް އުފުލާފަ އެވެ. އެއީ، އެހެން މީހެއްގެ މުދަލަށް ހުއްދަ ނޫން ގޮތުގައި ބާރު ހިންގުމާއި، އެނގިހުރެ ހުއްދަ ނޫން ތަނަކަށް ވަނުމުގެ ކުށުގެ ދައުވާ އެވެ.
ކްރިމިނަލް ކޯޓުން ކުރި ހުކުމުގައި ވަނީ އެނގި ހުރެ ހުއްދަ ނޫން ތަނަކަށް ވަން މައްސަލައިގައި އޭނާ ގެ މައްޗަށް ތިން މަސް ދުވަހުގެ ޖަލު ހުކުމެއް އިއްވާފަ އެވެ. އަދި، އެހެން މީހެއްގެ މުދަލަކަށް ހުއްދަ ނޫން ގޮތުގައި ބާރު ފޯރުވުމުގެ ކުށުގައި ދެ މަހާއި 12 ދުވަހުގެ ޖަލު ހުކުމެއް އިއްވި އެވެ.
އަދި ތަހުގީގާއި ޝަރީއަތުގެ ތެރެއިން އޭނާ ބަންދުގައި ހޭދަކުރި މުއްދަތު ހުކުމުން އުނިކުރުމުން އޭނާ ތަންފީޒުކުރަން ޖެހޭނީ ހަތަރު މަހާއި 26 ދުވަހުގެ ޖަލު ހުކުމެއްް ކަމަށް އެ ހުކުމުގައި ބުނެފައިވެ އެވެ.
