މަސްތުވާތަކެތީގެ ބޮޑެއް ކަމަށް ތުހުމަތު ކުރާ ޝަހީބަށް އިއްވާފައިވާ އުމުރު ދުވަހުގެ ޖަލު ހުކުމުގެ މައްސަލަ ހައިކޯޓުން ބަލައިގެންފި
މަސްތުވާތަކެތީގެ ވިޔަފާރި ފުޅާ ދާއިރާއެއްގައި ކުރި ކަމަށް ސާބިތުވެ ޝަހީބު އިބްރާހީމަށް ކްރިމިނަލް ކޯޓުން އިއްވީ އުމުރަށް ޖަލު ހުކުމެއް. ޝަހީބަކީ ކުރީގެ ރައީސް ޔާމީންގެ ވެރިކަމުގައި ހައުސިން މިނިސްޓްރީގެ ކޯޑިނޭޓަރުކަން ކުރި އަދި ޕީއެންސީގެ ކައުންސިލް މެންބަރެއްގެ ގޮތުގައި ހުންނެވި ބޭފުޅެއް.
130 ކިލޯގެ ޑްރަގުގެ މައްސަލައިގައި ކޯޓު އަމުރެއްގެ ދަށުން ފުލުހުން ހޯދުމަށް އިއުލާނު ކޮށްފައިވާ ޝަހީބު އިބްރާހިމް | ސޯޝަލް މީޑިއާ
މަސްތުވާތަކެތީގެ ބޮޑެއް ކަމަށް ތުހުމަތު ކުރާ ޝަހީބު އިބްރާހީމް އަށް އިއްވާފައިވާ އުމުރު ދުވަހުގެ ޖަލު ހުކުމުގެ މައްސަލަ ހައިކޯޓުން ބަލައިގެންފި އެވެ.
މަސްތުވާތަކެތީގެ ވިޔަފާރި ފުޅާ ދާއިރާއެއްގައި ކުރާ ކަމަށް ސާބިތުވުމާ ގުޅިގެން, ގއ. ވިލިނގިލި، ލައިޓްހައުސް, ޝަހީބު އިބްރާހީމް, އުމުރަށް ޖަލަށް ލުމަށް ކްރިމިނަލް ކޯޓުން ހުކުމްކޮށްފައި ވަނީ 20 ސެޕްޓެމްބަރ 2025ގަ އެވެ.
ކަންނެލި ދޯންޏެއްގައި ރާއްޖެއަށް 130 ކިލޯ ޑްރަގް އެތެރެކުރި މައްސަލާގައި ޝަހީބު ހިމެނޭހެން ހަތް މީހަކު ވަނީ ހައްޔަރުކޮށްފަ އެވެ. އެ އެންމެން ހައްޔަރު ކުރީ އޮކްޓޯބަރު، 2020 ގަ އެވެ. އޭގެ ފަހުން އެ އެ މީހުން ޝަރީއަތް ނިމެންދެން ބަންދުގައި ބެހެއްޓި އެވެ. އަދި މި މައްސަލައިގައި ޝަހީބު އިބްރާހިމާއެކު ދައުވާ އުފުލި އެންމެންގެ މައްޗަށް ކުށް ސާބިތުވާ ކަމަށް ވެސް ކްރިމިނަލް ކޯޓުން ކަނޑައެޅި އެވެ.
ހައްޔަރުކުރި މީހުންގެ ތެރޭގައި ހިމެނެނީ 25 އަހަރާ 48 އަހަރާ ދެމެދުގެ ފިރިހެނުންނާއި 18 އަހަރުން ދަށުގެ ކުޑަކުއްޖެކެވެ.
އެހެންނަމަވެސް އޭގެ ފަހުން ބައެއް މީހުން ބަންދުން ދޫކޮށްލި އެވެ. ބަންދުން ދޫކޮށްލުމުން، ޝަހީބު ފިލައިގެން ވެސް އުޅުނެވެ. ޝަހީބު ފިލައިގެން އުޅެނިކޮށް އަލުން އޭނާ ހައްޔަރު ކުރީ، އޭނާ ގެ އަންހެނުން ހައްޔަރު ކުރުމުން، އަމިއްލައަށް ފުލުސް އޮފީހަށް ގޮސް ފުލުހުންނާ ހަވާލުވުމުންނެވެ.
ކުރީގެ ރައީސް އަބްދުالله ޔާމީން އަބްދުލްގައްޔޫމްގެ ވެރިކަމުގައި ޝަހީބު އަކީ ހައުސިންގ މިނިސްޓްރީގެ ކޯޑިނޭޓަރުކަން އަދާކުރެއްވި ބޭފުޅެކެވެ. އަދި މި މައްސަލަ ފެންމަތިވުމާއި ހަމައަށް އޭނާ އަކީ ވެރިކަން ހިންގާ ޕީއެންސީގެ ކައުންސިލް މެންބަރެކެވެ. އެހެން ކަމުން އޭނާ ކަައުންސިލް މެމްބަރު ކަމުން އޭރު ސަސްޕެންޑް ކުރިއެވެ. ޝަހީބަކީ ކުރިން ރައްޔިތުންގެ މަޖިލީހަށް ވެސް އަމިއްލަ ގޮތުން ވާދަކުރި މީހެކެވެ.
