ޗޮކްލެޓް ސިރަޕް ފުޅިތަކެއްގައި މަސްތުވާތަކެތި އެތެރެކުރުން: އަހުމަދު އަލީ އިންޑިއާއަށް ގޮސް ސަޕްލަޔަރާ ބައްދަލު ކޮށްފައިވާ ކަމަށް ފުލުހުން ބުނޭ
ކްރިމިނަލް ކޯޓުގައި ފުލުހުން ބުނީ، އަހުމަދު އަލީ މައްސަލާގައި ބައިވެރިވާ ފަރާތްތަކާއި މުއާމާލަތްތަކެއް ކޮށްފައިވާ ކަމަށް. ނަމަވެސް އަހުމަދު ވަކީލު ބުނެފައިވަނީ ޝިޕްމަންޓުގައި މަސްތުވާތަކެތި ހުރިކަން އަހުމަދު އަލީއަށް ނޭނގޭ ކަމަށާއި، އެނގޭނަމަ އެތަކެއްޗާ ހަވާލުވާން އޭނާ ނުދާނެ ކަމަށް.
ރާއްޖެއަށް 40 ކިލޯގެ މަސްތުވާތަކެތި އެތެރެކުރި މައްސަލާގައި ހައްޔަރުކުރި އަހުމަދު އަލީ | ރާއްޖެ އެމްވީ
ޗޮކްލެޓް ސިރަޕް ފުޅިތަކެއްގައި ކަނޑުމަގުން ރާއްޖެ އެތެރެކުރި 40 ކިލޯ ގެ މަސްތުވާތަކެތީ މައްސަލާގައި ހައްޔަރުކުރި އަހުމަދު އަލީ އިންޑިއާއަށް ގޮސް އެ އެއްޗެހީގެ ސަޕްލަޔަރާ ބައްދަލު ކޮށްފައިވާ ކަމަށް ފުލުހުން ބުނެފި އެވެ.
މިމައްސަލާގައި ހއ. ހޯރަފުށީ، ޢާފިޔާ، 47 އަހަރުގެ އަހުމަދު އަލީ 26 ޑިސެންބަރު 2025 ގައި ހައްޔަރުކޮށް ބަންދަށް 10 ދުވަސް ވަނީ ޖަހާފަ އެވެ. އޭގެފަހުން 5 ޖެނުއަރީ 2026 ގައި ކޯޓަށް ހާޒިރު ކުރުމުން 15 ދުވަހަށް ބަންދު ކުރުމަށް އަމުރުކޮށްފައިވެ އެވެ. އަދި ބަންދުގެ މުއްދަތު ހަމަވުމުން 20 ޖެނުއަރީ ވީ އަންގާރަ ދުވަހު ކްރިމިނަލް ކޯޓަށް ހާޒިރު ކުރުމުން ބައްދަށް 15 ދުވަސް ވަނީ އިތުރު ކޮށްފަ އެވެ. މިއީ އޭނާ ގެ ބަންދުގެ މުއްދަތު އިތުރުކުރި 3 ވަނަ ފަހަރެވެ.
ކްރިމިނަލް ކޯޓުގައި ފުލުހުން ބުނީ، އަހުމަދު އަލީ މައްސަލާގައި ބައިވެރިވާ ފަރާތްތަކާއި މުއާމާލަތްތަކެއް ކޮށްފައިވާ ކަމާއި، މިމުދާ ގަތުމަށް އިންޑިއާއަށް ގޮސް އެ ފަރާތްތަކާ ބައްދަލުވެ، އަމަލީގޮތުން ބައިވެރިވާކަން ތަހުގީގަށް ހޯދިފައިވާ ކަމަށެވެ.
ނަމަވެސް އަހުމަދު ވަކީލު ބުނެފައިވަނީ ޝިޕްމަންޓުގައި މަސްތުވާތަކެތި ހުރިކަން އަހުމަދު އަލީއަށް ނޭނގޭ ކަމަށާއި، އެނގޭނަމަ އެތަކެއްޗާ ހަވާލުވާން އޭނާ ނުދާނެ ކަމަށެވެ. އަދި އަހުމަދު އަލީ އަކީ މުދާ ކުލިއާ ކުރުމުގެ މަސައްކަތްކުރާ މީހެއް ކަމަށް މީގެ ކުރިން އޭނާ ކޯޓުގައި ބުނެފައިވެ އެވެ.
މީގެ އިތުރުން މިމައްސަލައާ ގުޅިގެން ގދ. ތިނަދޫ، ގޯލްޑަންހައުސް 57 އަހަރުގެ މުހައްމަދު އާދިލް ވެސް ވަނީ ހައްޔަރު ކޮށްފަ އެވެ. އާދިލް 27 ޑިސެންބަރު 2025 ގައި ހައްޔަރުކޮށް ބަންދަށް 15 ދުވަސް ޖަހާފައިވެ އެވެ. އޭގެފަހުން 16 ޖެނުއަރީ 2026 ވީ ހުކުރު ދުވަހު، އާދިލް ކްރިމިނަލް ކޯޓަށް ހާޒިރު ކުރުމުން އިތުރު 10 ދުވަހަށް ބަންދު ކުރުމަށް ވަނީ އަމުރު ކޮށްފަ އެވެ.
ޗޮކްލެޓް ސިރަޕް ފުޅިތައް ރާއްޖެ އަށް އެތެރެ ކޮށްފައި ވަނީ ރާސް މޯލްޑިވްސް ކިޔާ ކުންފުންޏެއްގެ ނަމުގައި ކަމަށްވާއިރު، އެކުންފުނީގެ މެނޭޖިން ޑިރެކްޓަރަކީ މި މައްސަލާގައި ހައްޔަރުކުރި އާދިލް އެވެ. އަދި އަހުމަދު އަލީ އަކީ ރާސް މޯލްޑިވްސްގެ މުދާ ކްލިއަރ ކުރުމަށް އެ ކުންފުނީގެ ފަރާތުން ދާނެ ކަމަށް އީ-މެއިލުން ކަސްޓަމްސްގެ ސީކާގޯ އެގްޒަމިނޭޝަނަށް އެންގި މީހާ އެވެ.
ކަސްޓަމްސް އިން މައުލޫމާތު ދޭ ގޮތުގައި އަތުލައިގަތް މަސްތުވާތަކެތީގެ އަގު 30 މިލިޔަން ރުފިޔާ އަށް ވުރެ އިތުރުވާނެ އެވެ. ޗޮކްލެޓް ސިރަޕް ފުޅިތަކެއް ކަސްޓަމްސްއިން އަތުލައިގަތީ، އެ ފުޅިތައް ބަލައި ފާސްކުރުމުގައި ޝައްކުކުރެވޭ ކަންތައްތަކެއް ފާހަގަ ވުމުން ހިންގި ޚާއްސަ އޮޕަރޭޝަނެއް ގައި 25 ޑިސެންބަރު 2025 ގަ އެވެ.
މި ތަކެތި ފުރަތަމަ މަރުހަލާގައި ޓެސްޓު ކުރުމުން ޕޮޒިޓިވްވެފައި ވަނީ ހަޝިޝް އޮއިލަށެވެ.
މި މައްސަލަ ފުލުހުން ދަނީ އިތުރަށް ތަހުގީގު ކުރަމުންނެވެ.
