ލެވަންޓޭ ބަލިކޮށް، ރެއާލް އަށް ހަމަޖެހުމެއް

ސްޕެނިޝް ލީގުގައި ލެވަންޓޭއާ ދެކޮޅަށް ކުޅުނު މެޗުން މޮޅުވެ، ރެއާލް މެޑްރިޑް އިން ހަމަޖެހުމެއް ހޯދައިފި އެވެ.

ރެއާލްގެ އަމިއްލަ ދަނޑުގައި ކުޅުނު މެޗު އެ ޓީމުން ކާމިޔާބު ކުރީ 2-0 އިންނެވެ. މެޗުގައި ރެއާލް އިން އެ ޓީމުގެ ދެ ލަނޑު ވެސް ޖެހީ، މެޗުގެ ދެ ވަަނަ ހާފުގަ އެވެ.

މެޗުގެ ދެ ވަނަ ހާފު ފަށައިގެން 13 ވަނަ މިނެޓުގައި ރެއާލް އަށް ލީޑު ނަގައިދިނީ ފްރާންސްގެ ކެޕްޓަން ކީލިއަން އެމްބާޕޭ އެވެ. އެއީ ލެވަންޓޭގެ އޭރިޔާ ތެރެއިން އެ ޓީމުގެ ކުޅުންތެރިޔަކު އެމްބާޕޭ އަށް ކުރި ފައުލަކާ ގުޅިގެން ދިން ޕެނަލްޓީ އެކެވެ.

އޭގެ ފަހުން 65 ވަނަ މިނެޓުގައި ރައުލް އަސެންސިއޯ ވަނީ ރެއާލްގެ ދެ ވަނަ ލަނޑު ޖަަހައި ލީޑު ފުޅާ ކޮށްފަ އެވެ. އެ ލަނޑު ޖަހަން އޭނާ އަށް ފުރުސަތު ތަނަވަސްކޮށްދިނީ އާޑާ ގުލާ އެވެ. މެޗުގައި ރެއާލް އިން ވަނީ އިތުރު ލަނޑު ޖަހަން ވެސް ފުރުސަތު ތަކެއް ހޯދައިފަ އެވެ.

މޮޅާއެކު ރެއާލް ދެ ވަނައިގައި އޮތީ މިހާތަނަށް ކުޅެފައިވާ 20 މެޗުން 48 ޕޮއިންޓާ އެކު އެވެ. ރެއާލް އަށް ވުރެ އެއް މެޗު މަދުން ކުޅެގެން އެއް ވަަނައިގައި އެންމެ ފަހުގެ ޗެމްޕިއަން ބާސެލޯނާ އަށް 49 ޕޮއިންޓު ލިބޭއިރު، މެޗުގެ އަދަދު ހަމަކޮށް ލީޑު ފުޅާ ކުރުމުގެ ފުރުސަތު ބާސެލޯނާ އަށް އޮންނާނެ އެވެ. 

މިއީ ރެއާލްގެ ކޯޗުކަމުން ޒަބީ އަލޮންސޯ ވަކި ކުރުމަށް ފަހު، އެ މަގާމަށް ހަމަޖެއްސި އަލްވާރޯ އާބެލޯގެ އިރުޝާދުގެ ދަށުން ރެއާލް އިން ކުޅުނު ދެ ވަނަ މެޗެވެ. އޭނާގެ އިރުޝާދުގެ ދަށުން ރެއާލް އިން ކުޅުނު ފުރަތަމަ މެޗުގައި ވަނީ ކޮޕަ ޑެލް ރޭގެ ގަދަ 16 ވަނަ ބުރުގައި ދެ ވަނަ ޑިވިޝަންގެ ކުލަބެއް އަތުން ބަލިވެ މުބާރާތުން ކަޓައިފަ އެވެ. އެ ޕްރެޝަރަށް ފަހު، ލީގުގައި ކުޅުނު މެޗުން މޮޅުވެ ރެއާލް އިން މި ވަނީ ހަމަޖެހުމެއް ހޯދައިފަ އެވެ.

ލެވަންޓޭއާ ދެކޮޅަށް އަމިއްލަ ދަނޑުގައި ކުޅުނު މެޗުގައި ރެއާލްގެ ބައެއް ސަޕޯޓަރުން ވަނީ ޓީމާ ދިމާ ކޮށްލައިފަ އެވެ. އާބެލޯ ބުނީ، މިދިޔަ ހަފުތާ އަކީ ރެއާލް އަށް ފަސޭހަ ހަފުތާއެއް ނޫން ކަމަށާއި، "ތުނބުން ފުމެގެން" ޓީމާ ދިމާ ކުރުމުގެ ހައްގު ސަޕޯޓަރުންނަށް އޮތް ކަމަށެވެ. އެހެން ނަމަވެސް، ރެއާލް އާއި ޓީމުގެ ކުޅުންތެރިން މަސައްކަތް ކުރަނީ އިތުރު ކުރިއެރުން ތަކެއް ހޯދުމަށް ކަމަށް އޭނާ ބުންްޏެވެ.