މި ސަރުކާރުގެ ވަށާޖެހޭ ތަރައްގީއާ، ސިންދަފާތު ކުރަމުންދާ އިގްތިސާދާއެކު ރައްޔިތުންްނަށް އޮތީ ތަކުލީފު!
ވަށާޖެހޭ ތަރައްގީ ގައުމަށް ގެންނަ ކަމަށް ސައީދު ވިދާޅުވާއިރު، ރާއްޖޭގެ ތަރައްގީގެ ގިނަ މަޝްރޫއުތައް އޮތީ ހުއްޓިފައި. ރައްޔިތުންނަށް ލިބޭ ޚިދުމަތްތަކުގެ އަގު ބޮޑުވެ، ކަރަންޓާއި، ފެން ބިލުން ސަރުކާރުން ވައްކަން ކުރާ ކަމުގެ އަޑުތައް ވަނީ ގަދަވެފައި. ދިރިއުޅުމުގެ ހަރަދުތައް އިންތިހާއަށް ބޮޑުވެފައިވާއިރު، 20 ރުފިޔާއަށް ވުރެ މަތިން ޑޮލަރު ގަންނަން ވަނީ މަޖުބޫރުވެފައި.
ރައީސް ޑރ. މުހައްމަދު މުއިއްޒު ހުޅުމާލެ ފޭސް 2 ގެ ރައްޔިތުންނާއި ބައްދަލުކުރައްވާ ވާހަކަފުޅު ދައްކަވަނީ | ރައީސް އޮފީސް
ރައީސް މުއިއްޒާއި، އެމަނިކުފާނުގެ ވަޒީރުން ''ތަރައްގީ'' އެކި ގޮތްގޮތަށް ސިފަ ކޮށްދެއްވަ އެވެ. ތަފާތު ލަފްޒު ތަކުންނެވެ. ބައެއް ހާލަތްތަކުގައި އެ ވިދާޅުވަނީ ކީކޭކަން ރައްޔިތުންނަށް ފަހުމް ނުވާ މިންވަރަށް ވެސް އެބޭފުޅުން ވާހަކަ ދައްކަވަ އެވެ.
އެގޮތަށް އެންމެ ބޮޑަށް ތަރައްގީގެ ވާހަކަ ދައްކަވާ އެއް ވަޒީރަކީ އިގްތިސާދީ ތަރައްގީ އާއި ވިޔަފާރިއާ ބެހޭ ވަޒީރު މުހައްމަދު ސައީދެވެ. މިފަހުން ޕީއެންސީން ބޭއްވި އިވެންޓެއްގައި ވެސް ސައީދު ވިދާޅުވެފައިވަނީ ސަރުކާރުގެ މަސައްކަތްތައް ވަރަށް ބޮޑަށް ރޭވިފައިވަނީ ރާއްޖޭގެ ޖުމްލަ ވަށާޖެހޭ ތަރައްގީ އެއް ގެނައުމަށް ކަމަށެވެ.
ރައީސުލްޖުމްހޫރިއްޔާގެ މެނިފެސްޓޯއަކީ ވަރަށް ބޮޑަށް ރާއްޖޭގެ ވަށާޖެހޭ ތަރައްގީއެއް ގާއިމްކޮށް ރައްޔިތުންނަށް އެތަރައްގީގެ ފޮނިމީރުކަން ފޯރުކޮށްދިނުން. އިޖްތިމާއީ ހަމަޖެހުން އަދި އިގްތިސާދީ ގޮތުން ރާއްޖެއަށް ހަމަޖެހުން ލިބިގެން ދިއުން. ކުރިއެރުން ލިބިގެން ދިއުން.އިގްތިސާދީ ތަރައްގީއާއި ވިޔަފާރިއާބެހޭ ވަޒީރު މުހައްމަދު ސައީދު
ވަށާޖެހޭ ތަރައްގީ ގައުމަށް ގެންނަ ކަމަށް ސައީދު ވިދާޅުވާއިރު، ރާއްޖޭގެ ތަރައްގީގެ ގިނަ މަޝްރޫއުތައް އޮތީ ހުއްޓިފަ އެވެ. ރައްޔިތުންނަށް ލިބޭ ޚިދުމަތްތަކުގެ އަގު ބޮޑުވެ، ކަރަންޓާއި، ފެން ބިލުން ސަރުކާރުން ވައްކަން ކުރާ ކަމުގެ އަޑުތައް ވަނީ ގަދަވެފަ އެވެ. މީގެ ކުރިން ފަސޭހައިން ލިބުނު އާސަންދަ ޚިދުމަތާއި، ބޭސް ނުލިބޭ ކަމުގެ ޝަކުވާ ވަނީ ބޮޑުވެފަ އެވެ. ދިރިއުޅުމުގެ ހަރަދުތައް އިންތިހާއަށް ބޮޑުވެފައިވާއިރު، 20 ރުފިޔާއަށް ވުރެ މަތިން ޑޮލަރު ގަންނަން ވަނީ މަޖުބޫރުވެފަ އެވެ.
ނަމަވެސް ކުރިއަށް އޮތް ލޯކަލް ކައުންސިލް އިންތިޚާބާއެކު، މިސަރުކާރަށް ރައްޔިތުންގެ ބާރުވެރިކަން ދައްކާލުމަށް ފުރުސަތު އެބަ ލިބެ އެވެ. މިއީ ވަރަށް ބޮޑު ޗެލަންޖަކަށް ވާނެކަން ސަރުކާރަށް އެނގޭތީ މިހާރު އިދިކޮޅު ކެންޑިޑޭޓުންނަކީ ގައުމުގެ ހަމަނުޖެހުން ނަގާލާނެ ބައެއްގެ ގޮތުގައި ވެސް ވަނީ ސިފަ ކޮށްފަ އެވެ. އަދި މާލޭސިޓީގެ މޭޔަރު ކަމަށް ސަރުކާރާ އިދިކޮޅު ކެންޑިޑޭޓަކު އިންތިޚާބު ކޮށްފިނަމަ މާލޭގެ ތަރައްގީ ވެސް ހުއްޓޭނެ ކަމަށް ރައީސް މުއިއްޒުގެ އިތުރުން ސަރުކާރުގެ ބޭފުޅުން ދަނީ ތަކުރާރުކޮށް ވިދާޅުވަމުންނެވެ.
ކައުންސިލްތަކަށް ބޮޑެތި ތުހުމަތުތަކެއް އަޅުވަމުންދާއިރު، މާލެސިޓީ ކައުންސިލްގެ ސުޕަ މެޖޯރިޓީ އޮތީ ވެސް ސަރުކާރުގެ އަތުގަ އެވެ. ހުޅުމާލޭގެ ހިންގުމާއި، ގޯއްޗާއި، ފްލެޓު ދޫކުރުމުގެ މަސައްކަތުގެ އިތުރުން ރަޖިސްޓްރީ ދޫކުރުމުގެ މަސައްކަތް ކުރުމުގެ ހުއްދައަށް ސިޓީ ކައުންސިލުން ވަނީ އެދިފަ އެވެ. ނަމަވެސް ސަރުކާރުން އެ ހުއްދަ މާލެސިޓީ ކައުންސިލަށް ދީފައިނުވެ އެވެ. އަދި މަސައްކަތްތަކަށް ވަރަށް ބޮޑަށް ހުރަސް އަޅައި، ކައުންސިލުން ތަރައްގީ ކުރި ބުޅާ ފެސިލިޓީ ވެސް ވަނީ އަތުލާފަ އެވެ.
އެހެންކަމުން މަސައްކަތް ކުރުމުގައި ސަރުކާރުގެ ހެޔޮ ނިިޔަތެއް ނެތްކަން އެބަ ހާމަވެ އެވެ. ކައުންސިލް އިންތިޚާބާ ދިމާކޮށް، ވަށާޖެހޭ ތަރައްގީއާއެކު ރައްޔިތުންނަށް ފޮނިމީރުކަން ލިބޭނެ ކަމަށް ސަރުކާރުގެ ބޭފުޅުން ވިދާޅުވި ނަމަވެސް މިއަދު އެ ފޮނިމީރުކަން ގިނަ ރައްޔިތުން ބޭނުމެއް ނުވާނެ އެވެ. އެއީ މި ސަރުކާރުގެ ވަށާޖެހޭ ތަރައްގީއާ، ސިންދަފާތު ކުރަމުންދާ އިގްތިސާދާއެކު ރައްޔިތުންްނަށް ތަކުލީފު އުފުލަން ޖެހިފައިވާތީ އެވެ.
