ރަސްމާލެ ހިއްކަން މަހެއްގެ މައްޗަށް 10 ނުވަތަ 8 މިލިއަން ޑޮލަރު ޚަރަދު ކުރޭ: އީސަ
އީސަ ވިދާޅުވީ ރަސްމާލެ ހިއްކުމުގެ މަސައްކަތަށް ގެނެސްފައިވާ ޑްރެޖަރުތަކަށް ބޮޑު ޚަރަދެއް ހިނގާ ކަމަށާއި އެކަން ސިއްރުކޮށްފައިވާ ކަމަށް.
ރައްޔިތުން މަޖިލީހުގެ ކެނދިކުޅުދޫ ދާއިރާގެ ކުރީގެ މެންބަރު އަހްމަދު އީސަ | ރާއްޖެއެމްވީ
ރަސްމާލެ ހިއްކަން މި ސަރުކާރުން މަހެއްގެ މައްޗަށް 8-10 މިލިއަން ޑޮލަރު ޚަރަދު ކުރާ ކަމަށް އަންދާޒާ ކުރެވޭ ކަމަށް ރައްޔިތުން މަޖިލީހުގެ ކެނދިކުޅުދޫ ދާއިރާގެ ކުރީގެ މެންބަރު އަހުމަދު އީސަ ވިދާޅުވެއްޖެ އެވެ.
އޭނާ އެފަދައިން ވިދާޅުވީ ރާއްޖެޓީވީގެ ފަލަސުރުހީ ޕްރޮގްރާމްގައި ވާހަކަދައްކަވަމުންނެވެ.
ރަސްމާލެ ހިއްކުމުގެ މަސައްކަތަށް ގެނެސްފައިވާ ޑްރެޖަރުތަކަށް ބޮޑު ޚަރަދެއް ހިނގާނެ ކަމަށާއި އެ ކަން ވެސް ސިއްރުކޮށްފައި އޮތުމަކީ ކަންބޮޑުވާ ކަމެއް ކަމަށް އޭނާ ވިދާޅުވި އެވެ. ދުނިޔޭގެ އެންމެ ބޮޑު ބާޖުތައް ރާއްޖެ ގެނައީ ހިލޭ ނޫން ކަން އީސަ ފާހަގަކުރެއްވި އެވެ. އެހެންކަމުން އެކަމަށް ކުރާ ޚަރަދުތަކަކީ އެއީ އިހުލާސްތެރި ނިޔަތެއްގައި ކުރާ ކަމެއް ނޫން ކަމަށް އީސަ ވަނީ ވިދާޅުވެފަ އެވެ.
"ހަމަ ގައިމުވެސް ހަތަރު މިލިއަން ޑޮލަރު ހިނގާނެ އެއްޗަކަށް، ޑްރެޖަރަކަށް. އަޅުގަނޑުގެ އަންދާޒާ އަކީ 8-10 މިލިއަން ޑޮލަރާއި ދެމެދު ހޭދަ ވާނެ. އެހެންވީމަ ތިޔައީކީ ރައްޔިތުންނަށް އިޚުލާސްތެރި މަސައްކަތެއް ނޫނޭ." އީސަ ވިދާޅުވި އެވެ.
ސަރުކާރުން މާލެ އަތޮޅުގެ މުރަކަ އާއި ޑައިވް ޕޮއިންޓްތައް އެއްކޮށް ހަލާކުކޮށް ސުންނާފަތިކޮށްފައިވާ ކަމަށް އޭނާ ވިދާޅުވި އެވެ. ރަސްމާލެ ޕްރޮޖެކްޓް ހިންގުމުގައި ދިރާސާ ކޮށްފައި ނުވާ އިރު އެ މަސައްކަތް ކުރަމުން ދަނީ ބަޖެޓު ވެސް ކުރުމަކާއި ނުލާކަން އީސަ ފާހަގަކުރެއްވި އެވެ. ޑްރެޖަރު ގެނެސްގެން ރަސްމާލެ ހިއްކަން ކޮނުމުގެ މަސައްކަތް ފެށި އިރު އެ ސަރަހައްދަށް ވާނެ ގެއްލުމަށް ބަލާލާފައި ނުވާ ކަމަށް އޭނާ ވިދާޅުވި އެވެ. އަދި ރަސްމާލެ ހިއްކަން މިހާރު ދެމުންދާ ގެއްލުމަކީ ފޫ ނުބެދޭ ވަރުގެ ގެއްލުމެއް ކަމަށް އީސަ ވިދާޅުވި އެވެެ.
"މާލެ އަތޮޅަކީ އެންމެ ގިނަ ރިސޯޓް އޮތް އަތޮޅު. އަވަސް ކޮށްލާފައި ޚަރަދު ކުޑަކުރަން ދެ ރިސޯޓް ދޭތެރެއިން އެ ވެލި ނަގަނީ. މިއީ ހިނި އަންނަ ޒާތުގެ ވާހަކަ އެއް ނޫން. އިންޑަސްޓްރީ އަށް ދެމުންދާ ގެއްލުމުގެ ވާހަކަ މި ދައްކަނީ. މިއީ ކުރަން ހެޔޮ ނުވާ ވަރުގެ ކަމެއް ވަރަށް މޮޅު ކަމެއް ކަމަށް ހީކޮށް." އީސަ ވިދާޅުވި އެވެ.
ސަރުކާރުން މަސައްކަތް ކުރުމުގައި އެއްވެސް ވަރަކަށް ދިރާސާ އެއް ކުރުމެއް ނެތް ކަމަށް އީސަ ވިދާޅުވި އެވެ. އަދި މުޅި ވެރިކަން ރައީސް މުއިއްޒު ހިންގަވަނީ ދޮގުގެ މަތީގައި ކަމަށާއި ވެރިކަމަށް ވަޑައިގަތީއްސުރެ އެންމެ ތެދެއް ވެސް އަދި ނުހަދާ ކަމަށް އީސަ ވިދާޅުވި އެވެ. ބޯހިޔާވަހިކަމާއި މެދު ވެފައިވާ ވައުދުތަކަށް ބަލާލުމުން ވެސް ފެންނަނީ ދޮގު ވައުދުތައް ކަމަށާއި އެއްވެސް ވައުދެއްގައި އަމަލީ ސިފަ ނުޖެހޭ ކަމަށް އީސަ ވިދާޅުވި އެވެ.
