މި ސަރުކާރުން ޤަބޫލު ކުރާ ޤާނޫނީ ޕްރޮސެސް އަކީ 9 ގަޑި އިރު ތެރޭގައި ޤާނޫނު އަސާސީ އިސްލާހު ކުރުން: އަލީ ހުސައިން
ރައްޔިތުންގެ މަޖިލިސް އިންތިޚާބާއި ރިޔާސީ އިންތިޚާބު އެކުގައި ބާއްވަން ގާނޫނު އަސާސީ އަށް ބަދަލު ގެނައުމަށް ހުށަހެޅި ބިލު 10 ދުވަހުން ދިރާސާކޮށް ނިންމަން މިނިވަން މުއައްސަސާތަކުގެ ކޮމިޓީން ނިންމާފައިވޭ. މަސައްކަތްތައް އަވަސް އަރުވާލައިގެން ކުރުމަކީ ސަރުކާރަށް ފާޑުކިޔުން އަމާޒުވާ ސަބަބެއް.
މަޝްހޫރު ގާނޫނީ ވަކީލް އަލީ ހުސެއިން | ރާއްޖެއެމްވީ
މި ސަރުކާރުން ޤަބޫލު ކުރާ ޤާނޫނީ ޕްރޮސެސް އަކީ 9 ގަޑި އިރު ތެރޭގައި ޤާނޫނުއަސާސީ އިސްލާހު ކުރުން ކަމަށް ކެންދޫ ދާއިރާގެ ކުރީގެ މެމްބަރު އަލީ ހުސައިން ވިދާޅުވެއްޖެ އެވެ.
އޭނާ އެފަދައިން ވިދާޅުވީ ރާއްޖެޓީވީގެ ޓީވީޓޯކް ޕްރޮގްރާމްގައި ވާހަކަދައްކަވަމުންނެވެ.
ރައްޔިތުންގެ މަޖިލިސް އިންތިޚާބާއި ރިޔާސީ އިންތިޚާބު އެކުގައި ބާއްވަން ގާނޫނު އަސާސީ އަށް ބަދަލު ގެނައުމަށް ހުށަހަޅާފައިވާ ބިލު 10 ދުވަސް ތެރޭ ދިރާސާ ކޮށް ނިންމުމަށް ރައްޔިތުންގެ މަޖިލީހުގެ މިނިވަން މުއައްސަސާތަކުގެ ކޮމިޓީ އިން ނިންމީ ނިމިދިޔަ ހަފްތާގެ ތެރޭގަ އެވެ. ދެ އިންތިޚާބު އެކުގައި ބޭއްވުމަށް ސަރުކާރުގެ ފަރާތުން ގާނޫނު އަސާސީ އަށް ގެންނަ އިސްލާހުގެ ބިލު މަޖިލީހަށް ހޯމަ ދުވަހު ހުށަހަޅުއްވާފައި ވަނީ އިނގުރައިދޫ ދާއިރާގެ މެމްބަރު އިބްރާހިމް ފަލާހް އެވެ.
އެ މަސައްކަތަށް ޖުމްލަ ހޭދަވީ 8 ގަޑި އެއްހާ އިރު ކަމަށް ވާ އިރު މީގެ ކުރިން ވެސް 9 ވަރަކަށް ގަޑި އިރުތެރޭގައި ވެރިކަން ހިންގާ ޕީއެންސީގެ މެޖޯރިޓީ އެއް އޮތް 20 ވަނަ މަޖިލީހުން ޤާނޫނު އަސާސީ އިސްލާހުކޮށްފައިވާ ކަން އަލީ ހުސައިން ފާހަގަކުރެއްވި އެވެ. އެކަން އެގޮތަށް ކުރަން މެމްބަރުންނަށް ވެސް މަޖުބޫރު ކަމަށާއި މެމްބަރުންގެ މިނިވަންކަން ނެތްގޮތަށް ޤާނޫނު އަސާސީ އަށް ބަދަލު ގެނެސްގެން މެމްބަރުން ތިބީ ކަސްތޮޅު އެޅުވިފައި ކަމަށް އަލީ ހުސައިން ވިދާޅުވި އެވެ.
އޭނާ ވަނީ އެއްވެސް ކަމެއްގައި ސަރުކާރުން ޑިއު ޕްރޮސެސް ފުރިހަމަ ނުކުރާ ކަމަށް ފާހަގަކޮށްފަ އެވެ. އަދި މި ސަރުކާރުން ބޭންކް އޮފް މޯލްޑިވްސްގެ އޮނިގަނޑު ހަލާކުކޮށްލާފައިވާ ކަމަށް އަލީ ހުސައިން ވިދާޅުވި އެވެ.
"ބޭންކް އޮފް މޯލްޑިވްސްގެ މެންޑޭޓު ތެރޭގައި ހިމެނޭ ކަމެއް ނޫން ގެދޮރުވެރިކަމަކީ. އެހެންވީމަ ކުރިން ވެސް އެކަން އެއްވެސް ސަރުކާރަކުން ނުކުރީ. މިހާރު އެކަމަކު އެކަން އެ ކުރަނީ. މިއީ ޑިއު ޕްރޮސެސް ރައީސް މުއިއްޒު ހިންގަވާ ގޮތަކީ. ގައުމަށް ގެއްލުން ވާނެ ކަމެއް ކުރަން ބޭންކް އޮފް މޯލްޑިވްސްގެ ބޯޑު މެމްބަރުން ވެސް ބޭނުމެއް ނުވާނެ." އޭނާ ވިދާޅުވި އެވެ.
ރާއްޖެ އަށް ކްރެޑިޓަށް ފައިސާ ދޭން މިހާރު ގައުމުތަކާއި ބައިނަލްއަޤުވާމީ އިދާރާތަކުން މިހާރު ބޭނުން ނުވާ ކަމަށް އަލީ ހުސައިން ވިދާޅުވި އެވެ. އެ ސަބަބާއި ހުރެ ބީއެމްއެލް މެދުވެރިކޮށްގެން ބޯހިޔާވަހިކަމަށް ޚަރަދު ކުރުމަކީ ކުރިއަށް އޮތްތަނަށް ބަލާ އިރު ވަރަށް ނުރައްކާތެރި ކަމެއް ކަމަށް އަލީ ހުސައިން ވަނީ ވިދާޅުވެފަ އެވެ.
