އަށް ލަނޑުގެ މޮޅާއެކު، ބަޔާން އިން ލީޑު ފުޅާ ކޮށްފި

ޖަރުމަނު ލީގުގައި ވުލްވްސްބާގްއާ ދެކޮޅަށް ކުޅުނު މެޗުން މޮޅުވެ، އެންމެ ފަހުގެ ޗެމްޕިއަން ބަޔާން މިއުނިކް އިން އެއް ވަނައިގައި ލީޑު ފުޅާ ކޮށްފި އެވެ.

ބަޔާންގެ އަމިއްލަ ދަނޑުގައި ކުޅުނު މެޗު އެ ޓީމުން ކާމިޔާބު ކުރީ 8-1 އިންނެވެ. މެޗުގައި ބަޔާން އިން ލަނޑު ޖަހައި ލީޑު ނަގާފައި ވަނިކޮށް، ވުލްވްސްބާގް އިން ނަތީޖާ ހަމަހަމަ ވެސް ކުރި އެވެ. އޭގެ ފަހުން ފުރަތަމަ ހާފުގައި ބަޔާން އިން ލަނޑު ޖަހައި ލީޑު ނެގިއިރު، އަނެއް ހަ ލަނޑު އެ ޓީމުން ޖެހީ މެޗުގެ ދެ ވަނަ ހާފުގަ އެވެ.

މެޗު ފަށައިގެން ފަސް ވަނަ މިނެޓުގައި ބަޔާން އަށް ލީޑު ލިބުނީ ވުލްވްސްބާގްގެ ކިލިއަން ފިޝާ އަތުން ބައި ކޮޅަށް ވަތް ލަނޑުންނެވެ. ނަމަވެސް، މެޗުގެ 13 ވަނަ މިނެޓުގައި ޒެނާން ޕެޔްސިނޯވިޗް ވަނީ ލަނޑު ޖަހައި ވުލްވްސްބާގް އަށް ނަތީޖާ ހަމަހަމަ ކޮށްދީފަ އެވެ. އޭގެ ފަހުން ދެ ވަނަ ފަހަރަށް ބަޔާން އިން ލީޑު ނެގީ 30 ވަނަ މިނެޓުގައި ލުއިސް ޑިއާޒް ޖެހި ލަނޑުންނެވެ.

މެޗުގެ ދެ ވަނަ ހާފުގައި ބަޔާންގެ ލަނޑުތައް ޖެހީ މައިކަލް އޮލައިސޭ އާއި، ރަފައެލް ގުރެއިރޯ އާއި، ހެރީ ކޭން އަދި ލިއޯން ގޮރެޓްޒްކާ އެވެ. މީގެ ތެރެއިން އޮލައިސޭ ދެ ލަނޑު ޖެހިއިރު، އަނެއް ލަނޑަކީ ވުލްވްސްބާގްގެ މޮރިޓްޒް ޖެންޒް އަތުން ބައި ކޮޅަށް ވަތް ލަނޑެވެ.

މޮޅާއެކު ބަޔާން އިން ވަނީ އެއް ވަނައިގައި 11 ޕޮއިންޓުގެ ލީޑެއް ނަގައިފަ އެވެ. މިހާތަނަށް ކުޅެފައިވާ 16 މެޗުން ބަޔާން އަށް 44 ޕޮއިންޓު ލިބޭއިރު، މި ސީޒަންގެ އެއްވެސް މެޗަކުން ބަޔާން ބަލިވެފައި ނުވެ އެވެ.