އެމްބާޕޭގެ ދެ ލަނޑާ އެކު މޮޅުވެ، ރެއާލް ގަދަ 16 އަށް

ސްޕެނިޝް ކޮޕަ ޑެލް ރޭގައި ޓަލަވޭރާ ދެކޮޅަށް ކުޅުނު މެޗުން މޮޅުވެ، ރެއާލް މެޑްރިޑް އިން މުބާާރާތުގެ ގަދަ 16 ވަނަ ބުރުން ޖާގަ ހޯދައިފި އެވެ.

ބުދަ ދުވަހުގެ ރޭ ކުޅުނު މެޗު ރެއާލް އިން ކާމިޔާބު ކުރީ 3-2 އިންނެވެ. މެޗުގެ ފުރަތަމަ ހާފުގައި ރެއާލް އިން ދެ ލަނޑު ޖަހައިގެން ކުރި ހޯދިއިރު، ދެ ވަނަ ހާފުގައި އެ ޓީމުން ތިން ވަނަ ލަނޑެއް ވެސް ޖެހި އެވެ. ޓަލަވޭރާ އިން ވަނީ ދެ ވަނަ ހާފުގައި ދެ ލަނޑު ޖަހައިފަ އެވެ.

މެޗުގެ ފުރަތަމަ ހާާފުގެ 41 ވަނަ މިނެޓުގައި ރެއާލް އިން ވަނީ ލަނޑު ޖަހައި ލީޑު ނަގައިފަ އެވެ. އެ ޓީމަށް ލިބުނު ޕެނަލްޓީ ކާމިޔާބުކޮށް ލީޑު ނަގައިދިނީ ފްރާންސްގެ ކެޕްޓަން ކީލިއަން އެމްބާޕޭ އެވެ. އޭގެ ފަހުން ފުރަތަމަ ހާފުގެ ފަހު ވަގުތުގައި ރެއާލްގެ ދެ ވަނަ ލަނޑަކީ ޓަލަވޭރާގެ މަނޫ ފެރާންޑޯ އަތުން ބައި ކޮޅަށް ވަތް ލަނޑެވެ.

މެޗުގެ ދެ ވަނަ ހާފުގައި ރެއާލް އަށް ވަނީ އިތުރު ލަނޑު ޖަހަން ވެސް ފުރުސަތު ލިބިފަ އެވެ. މެޗުގެ ފަހު ދިހަ މިނެޓުގެ ތެރޭގައި ޓަލަވޭރާގެ ފުރަތަމަ ލަނޑު ޖެހީ ނަހުއެލް އަރޯޔޯ އެވެ. އޭގެ އަށް މިނެޓު ފަހުން އެމްބާޕޭ ވަނީ ރެއާލްގެ ތިން ވަނަ ލަނޑު ޖަހައިފަ އެވެ. އޭގެ ފަހުން މެޗުގެ ފުރިހަމަ ވަގުތު ހަމަވެ އިތުރަށް ދެއްކި ވަގުތުގައި ޓަލަވޭރާގެ ދެ ވަނަ ލަނޑު ޖެހީ ގޮންޒާލޯ ޑި ރެންޒޯ އެވެ.

މެޗަށް ފަހު ވާހަަކަ ދައްކަމުން ރެއާލްގެ ކޯޗު ޒަބީ އަލޮންސޯ ބުނެފައި ވަނީ، ރެއާލްގެ ކުޅުމާ މެދު އޭނާ ހިތްހަމަ ޖެހޭ ކަމަށެވެ. އަލޮންސޯ ބުނީ ފުރަތަމަ ހާފުގައި ރެއާލް އިން މެޗު ވަރަށް ބޮޑަށް ކޮންޓްރޯލް ކޮށްގެން ކުޅުނު ކަމަށާއި، ރެއާލް އަށް ތިން ލަނޑުގެެ ލީޑެއް ނަގަން ވެސް ފުރުސަތު ލިބުނު ކަމަށެވެ. ނަމަވެސް، ރެއާލް އަށް ފުރުސަތުގެ ބޭނުން އެންމެ އެކީގެންވާ ގޮތުގައި ނުހިފުނު ކަމަށާއި، އޭގެ ނަތީޖާ އަކީ ފަހު ވަގުތާ ޖެހެންދެން ވެސް މެޗު ޓެންޝަންގައި ދިޔުން ކަމަށް އަލޮންސޯ ބުންޏެވެ.

އަލޮންސޯ ވަނީ މެޗުގައި ދެ ލަނޑު ޖެހި އެމްބާޕޭ އަށް ވެސް ވަރަށް ބޮޑަށް ތައުރީފު ކޮށްފަ އެވެ. އޭނާ ބުނީ ލަނޑު ޖެހުމަކީ އެމްބާޕޭ އަށް ފަސޭހަ ކަމެއް ކަމަށާއި، އެމްބާޕޭ އަންނަނީ އޭނާ ގެ ފެންވަރު ސާބިތު ކޮށްދެމުން ކަމަށެވެ. އެގޮތުން އެމްބާޕޭގެ އެންމެ ވަރުގަދަ އެއް ހުނަރަކީ  ވެސް ލަނޑު ޖެހުން ކަމަށް އަލޮންސޯ ބުންޏެވެ. 

އިތުރަށް ވާހަކަ ދައްކަމުން އަލޮންސޯ ބުނީ އޭނާ ގެ ހަމައެކަނި އަމާޒަކީ މެޗު ތަކުން މޮޅުވުން ނޫން ކަމަށެވެ. އޭގެ ބަދަލުގައި ރެއާލްގެ ފެންވަރު ދަމަހައްޓައި، އެ ޓީމުގެ ގޮތުގައި ކުރިއަށް ދާން ބޭނުންވާ ކަމަށް އަލޮންސޯ ބުންޏެވެ. ޚާއްސަކޮށް ހުރިހާ ކުޅުންތެރިން އެކުވެގެން، އެއް އަޒުމެއްގައި، ޓީމެއްގެ ގޮތުގައި އޮންނަން ބޭނުންވާ ކަމަށް ވެސް އަލޮންސޯ ވަނީ ބުނެފަ އެވެ. އެކަން ފާހަގަކޮށް އަލޮންސޯ ބުނީ މިހާރު ވެސް ރެއާލް އޮތީ ރަނގަޅު މިސްރާބުގައި ކަމަށާއި، އެކަން ދަމަހައްޓަން ޖެހޭ ކަމަށެވެ.