އާބެލޯ އިރުޝާދު ދިން ފުރަތަމަ މެޗުން ބަލިވެ، ކޮޕަ ޑެލް ރޭ އިން ރެއާލް ކަޓައިފި

ސްޕެނިޝް ކޮޕަ ޑެލް ރޭގެ ގަދަ 16 ވަނަ ބުރުގައި ދެ ވަނަ ޑިވިޝަންގެ  އަލްބަސެޓޭއާ ދެކޮޅަށް ކުޅުނު މެޗުން ބަލިވެ، ރެއާލް މެޑްރިޑް މުބާރާތުން ކަޓައިފި އެވެ.

ބުދަ ދުވަހުގެ ރޭ  އަލްބަސެޓޭއާ ދެކޮޅަށް ކުޅުނު މެޗުން ރެއާލް ބަލިވެފައި ވަނީ 3-2 އިންނެވެ. މެޗުގައި އަލްބަސެޓޭ އިން ދެ ފަހަރު ލީޑު ނެގިއިރު ވެސް، ރެއާލް އިން ނަތީޖާ ހަމަހަމަ ކުރި އެވެ. ނަމަވެސް ތިން ވަނަ ލަނޑެއް ޖަހައިގެން އަލްބަސެޓޭ ވަނީ ރެއާލްގެ މައްޗަށް ކުރި ހޯދައިފަ އެވެ. 

މެޗުގެ ފުރަތަމަ ހާފުގެ 42 ވަނަ މިނެޓުގައި އަލްބަސެޓޭ އިން ވަނީ ލަނޑު ޖަހައި ލީޑު ނަގައިފަ އެވެ. އެ ލަނޑު އެ ޓީމަށް ޖަހައިދިނީ ހަވިއޭ ވިލާ ޑެލް ފްރައިލް އެވެ. ނަަމަވެސް، ފުރަތަމަ ހާފުގެ އިތުރު ވަގުތުގައި ރެއާލް އިން ވަނީ ލަނޑު ޖަހައި ނަތީޖާ ހަމަހަމަ ކޮށްފަ އެވެ. އެއީ ފްރަންކޯ މަސްޓަންޓުއޯނޯ ޖެހި ލަނޑުންނެވެ.

މެޗުގެ ފުރިހަމަ ވަގުތު ހަމަވާން އަށް މިނެޓަށް ވެފައި ވަނިކޮށް، އަލްބަސެޓޭ އިން ވަނީ ދެ ވަނަ ލަނޑެއް ޖަހައި ލީޑު ނަގައިފަ އެވެ. ޖެފްޓޭ ބެންޓަންކޯ ޖެހި ލަނޑުން އަލްބަސެޓޭ ލީޑު ނެގި ނަމަވެސް، ފުރިހަމަ ވަގުތު ހަމަވެ އިތުރަށް ދެއްކި ވަގުތުގައި ގޮންޒާލޯ ގާސިއާ ވަނީ ލަނޑު ޖަހައި ރެއާލް އަށް ނަތީޖާ ހަމަހަމަ ކޮށްދީފަ އެވެ. ރެއާލް އިން ނަތީޖާ ހަމަހަމަ ކުރިތާ ތިން މިނެޓު ފަހުން ބެންޓަންކޯ ޖެހި ލަނޑާ އެކު، އަލްބަސެޓޭ އިން ވަނީ ރެއާލް މުބާރާތުން ކަޓުވާލައިފަ އެވެ. 

މިއީ ރެއާލްގެ ކޯޗު ކަމުގެ މަގާމުގައި ހުރި ޒަބީ އަލޮންސޯ މަގާމުން ވަކި ކުރުމަށް ފަހު، އެ މަގާމަށް ހަމަޖެއްސި އަލްވާރޯ އާބެލޯގެ އިރުޝާދުގެ ދަށުން އެ ޓީމު ކުޅުނު ފުރަތަމަ މެޗެވެ. ރެއާލްގެ ކޯޗުކަމުން އަލޮންސޯ ވަކި ކުރީ، އެ ޓީމުގެ ނަތީޖާތައް ދަށްވުމުގެ ސަބަބުނުންނެވެ.

މެޗަށް ފަހު ވާހަކަ ދައްކަމުން އާބެލޯ ބުނީ، ފެއިލް ވުމަކީ އޭނާ ބިރު ގަންނަ ކަމެއް ނޫން ކަމަަށެވެ. ރެއާލް އިން ކުރިމަތިވި ބައްޔަކީ ކޮން ކަހަލަ ކަމެއްކަން ބުނެދޭން ބޭނުންވާ މީހުންނަށް އާބެލޯ ވަނީ މެސެޖެއް ދީފަ އެވެ. އެގޮތުން އޭނާ ބުނީ، ފެއިލް ވުމަކީ ކާމިޔާބާ ހަމައަށް ވާސިލުވުމަށް އޮތް ހިތްވަރެއް ކަމަށެވެ.

އާބެލޯ ބުނީ އޭނާ އަކީ ޙަޔާތުގައި އެތައް ފެއިލް ވުމަކާ ކުރިމަތިލާން ޖެހިފައި ހުރި މީހެއް ކަމަށެވެ. އަދި ކޮޕަ ޑެލް ރޭ އިން ރެެއާލް ކެޓުމަށް ވުރެ، މާ ބޮޑެތި އަދި ހިތްދަތި ކެޓުންތަކާ ކުރިމަތިލާން ޖެހުނު ކަމަށް ވެސް އޭނާ ބުންޏެވެ. އެހެން ނަމަވެސް، އޭނާ ގެ އަޒުމަކީ އަނެއްކާ ވެސް އަލުން އެނބުރި އައިސް، ރަނގަޅު މަސައްކަތް ތަކެއް ކުރުން ކަމަށް އާބެލޯ ބުނެފައިވެ އެވެ.