ރެއާލްގެ ކޯޗު ކަމުން އަލޮންްސޯ ވަކި ކޮށްފި

ސްޕެއިންގެ ރެއާލް މެޑްރިޑަށް އިރުޝާދު ދެމުން އަައި ޒަބީ އަލޮންސޯ، މަގާމުން ވަކި ކޮށްފި އެވެ.

މިދިޔަ އަހަރުގެ މެއި މަހުގެ ތެރޭގައި، ރެއާލްގެ ކޯޗުކަމާ އުމުރުން 43 އަހަރުގެ އަލޮންސޯ ހަވާލުވެފައި ވަނީ ތިން އަހަރު ދުވަހުގެ އެއްބަސްވުމެއްގެ ދަށުންނެވެ. އެ ކުލަބާ އެކު އޭނާ ސޮއި ކޮށްފައި އޮތް އެއްބަސްވުމުގެ މުއްދަތު ހަމަވާން އޮތީ ވެސް 2028 ވަަނ އަހަރުގެ ޖޫން މަހުގެ ނިޔަލަށެވެ. 

ނަމަވެސް، މަގާމުގައި އެންމެ އަށް މަސް ދުވަސް ހޭދަކޮށްފައި ވަނިކޮށް، ކުއްލި ގޮތަކަށް ރެއާލް އިން ވަނީ އަލޮންސޯ މަގާމުން ވަކި ކޮށްފަ އެވެ. އަލޮންސޯ މަގާމުން ވަކި ކުރަން ރެއާލް އިން ނިންމިއިރު، އޭނާ އަށް ޕްރެޝަރު ބޮޑު ވަމުން އަންނަ ކަމަށް މީގެ ކުރިން ރިޕޯޓު ކޮށްފައި ވެސްވެ އެވެ. 

އެހެން އޮއްވާ، ސްޕެނިޝް ސުޕަ ކަޕްގެ ފައިނަލްގައި ވާދަވެރި ބާސެލޯނާ އަތުން ރެއާލް ބަލިވެފައި ވަނިކޮށް އަލޮންސޯ ވަނީ މަގާމުން ވަކި ކޮށްފަ އެވެ. އާދީއްތަ ދުވަހުގެ ރޭ ސައުދީ އަރަބިއްޔާގައި ކުޅުނު ފައިނަލްގައި ބާސެލޯނާ އިން ވަނީ 3-2 އިން ރެއާލްގެ މައްޗަށް ކުރި ހޯދައިފަ އެވެ.

ފާއިތުވި މުއްދަތުގެ ތެރޭގައި އަލޮންސޯގެ އިރުޝާދުގެ ދަށުން ރެއާލް އިން ވަނީ 34 މެޗު ކުޅެފަ އެވެ. އޭގެ ތެރެއިން 24 މެޗުން އެ ޓީމު މޮޅުވެފައިވާއިރު، ހަތަރު މެޗުން އެއްވަރުވެ، އަނެއް ހަ މެޗުން ވަނީ ބަލިވެފަ އެވެ. މިހާރު ކުރިއަށްދާ ސްޕެނިޝް ލީގުގައި ރެއާލް އޮތީ ލީގު ތާވަލްގެ ދެ ވަނަ މަގާމުގަ އެވެ. 

އަލޮންސޯ ވަކިކޮށްފައިވާކަން ރެއާލް އިން އިއުލާން ކޮށްފައިވާއިރު، އެ ކުލަބުން ބުނީ ކޯޗުގެ މަގާމާ ހަވާލުވެފައި ވަނީ އަލްވާރޯ އާބެލޯއާ ކަމަށެވެ. އޭނާ އަކީ ރެއާލްގެ ބީ ޓީމުގައި މަސައްކަތް ކުރަމުން އައި ކޯޗެވެ. އަލޮންސޯ ވަކި ކުރުމަށް ރެއާލް އިން ނިންމީ ކުއްލި ބައްދަލުވުމަކަށް ފަހު ކަމަށް މީޑިއާ ތަކުގައި ވަނީ ބުނެފަ އެވެ.

ރެއާލްއާ ހަވާލުވުމުގެ ކުރިން އަލޮންސޯ އިރުޝާދު ދީފައި ވަނީ ޖަރުމަނުގެ ބަޔާ ލެވަކޫސަން އަށެވެ. އެ ކުލަބުގައި އޭނާ ކާމިޔާބު މަސައްކަތް ތަކެއް ކޮށްފައިވާއިރު، ރެއާލްގެ ކޯޗު ކަމާ ހަވާލުވީ ކުރިން އެ މަގާމުގައި ހުރި ކާލޯ އަންޗެލޮޓީ މަގާމުން ވަކިވުމާ އެކު އެވެ. ނަމަވެސް، އެންމެ އަށް މަސް ދުވަހުގެ ތެރޭގައި މި ވަނީ ކުއްލި އަކަށް އޭނާ މަގާމުން ވަކި ކޮށްފަ އެވެ.