އަލަވޭސް އަތުން މޮޅުވެ ރެއާލް އަށް ހަމަ ޖެހުމެއް

ސްޕެނިޝް ލީގުގައި ޑިޕޮޓިވޯ އަލަވޭސްއާ ދެކޮޅަށް ކުޅުނު މެޗުން މޮޅުވެ، ރެއާލް މެޑްރިޑް އިން ހަމަ ޖެހުމެއް ހޯދައިފި އެވެ.

އާދީއްތަ ދުވަހުގެ ރޭ އަލަވޭސްގެ އަމިއްލަ ދަނޑުގައި ކުޅުނު މެޗު ރެއާލް އިން ކާމިޔާބު ކުރީ 2-1 އިންނެވެ. މެޗުގައި ރެއާލް އިން ލަނޑު ޖަހައި ކުރި ހޯދާފައި ވަނިކޮށް، އަލަވޭސް އިން ނަތީޖާ ހަމަހަމަ ވެސް ކުރި އެވެ. ނަމަވެސް، ދެ ވަނަ ލަނޑެއް ޖަަހައިގެން ރެއާލް ވަނީ މެޗުން މޮޅުވެފަ އެވެ.

މެޗުގެ ފުރަތަމަ ހާފުގެ 24 ވަނަ މިނެޓުގައި ރެއާލް އަށް ލަނޑު ޖަހައި ލީޑު ނަގައިދިނީ ފްރާންސްގެ ކެޕްޓަން ކީލިއަން އެމްބާޕޭ އެވެ. އޭނާ އެ ލަނޑު ޖަހަން ފުރުސަތު ތަނަވަސްކޮށްދިނީ ޖޫޑް ބެލިންހަމް އެވެ. މެޗުގައި އިތުރު ލަނޑު ޖަހަން ވެސް ރެއާލް އިން ފުރުސަތު ހޯދި އެވެ.

ނަމަވެސް މެޗުގެ ދެ ވަނަ ހާފުގައި އަލަވޭސް އިން ވަނީ ލަނޑު ޖަހައި ނަތީޖާ ހަމަހަމަ ކޮށްފަ އެވެ. މެޗުގެ 68 ވަނަ މިނެޓުގައި އެ ޓީމަށް ނަތީޖާ ހަމަހަމަ ކޮށްދިނީ ކާލޮސް ވިސެންޓޭ އެވެ. އެއީ އެންޓޯނިއޯ ބްލަންކޯ ތަނަވަސްކޮށްދިން ފުރުސަތެއްގައި އޭނާ ޖެހި ލަނޑެކެވެ. 

އޭގެ އަށް މިނެޓު ފަހުން ރެއާލް އިން ވަނީ ދެ ވަނަ ލަނޑެއް ޖަަހައި މެޗުގަައި ދެ ވަނަ ފަހަރަށް ލީޑު ނަގައިފަ އެވެ. އެ ލަނޑު ރެއާލް އަށް ޖަހައިދިނީ ބްރެޒިލްގެ ރޮޑްރީގޯ އެވެ. އެ ލަނޑު ޖަހަން ރޮޑްރީގޯ އަށް ފުރުސަތު ތަނަވަސްކޮށްދިނީ ވިނީޝިއުސް ޖޫނިއާ އެވެ.

މޮޅާ އެކު ރެއާލް އިން ވަނީ އެއް ވަނައިގައި އޮތް އެންމެ ފަހުގެ ޗެމްޕިއަން ބާސެލޯނާއާ ދެމެދު އޮތް ފަރަގު ހަތަރު ޕޮއިންޓަށް ކުޑަ ކޮށްފަ އެވެ. މިހާތަނަށް ލީގުގައި ކުޅެފައިވާ 17 މެޗުން ރެއާލް އަށް ލިބެނީ 39 ޕޮއިންޓެވެ. ހަމަ އެ އަދަދަށް މެޗު ކުޅެގެން އެއް ވަަނައިގައި ބާސެލޯނާ އަށް ލިބެނީ 43 ޕޮއިންޓެވެ.

މިފަހަކަށް އައިސް ރެއާލްގެ ނަތީޖާތައް ދަށްވެފައިވާތީ އެ ޓީމުގެ ކޯޗު ޒަބީ އަލޮންސޯ އަށް ޕްރެޝަރު ބޮޑުވަމުން އައި ނަމަވެސް، މި މޮޅާ އެކު އަލޮންސޯ އަށް ހަމަޖެހުމެއް އޮންނާނެ އެވެ. މެޗަށް ފަހު ވާހަކަ ދައްކަމުން އަލޮންސޯ ބުނެފައި ވަނީ، ރެއާލް އިން އެ މެޗުގައި ކުޅުނީ އެ ޓީމުގެ ގޭމަށް ވަރަށް ބޮޑަށް ފޯކަސް ކޮށްގެން ކަމަށެވެ. އަލަވޭސް އަތުން ލިބުނު މޮޅަކީ ވަރަށް މުހިންމު މޮޅެއްކަން ފާހަގަކޮށް އަލޮންސޯ ބުނީ، ރެއާލްގެ ބައެއް ކުޅުންތެރިން ނެތި އެ މޮޅު ލިބުމުން ހިތްހަމަ ޖެހޭ ކަމަށެވެ.

އަލޮންސޯ ބުނީ އަލަވޭސް މެޗުގައި ރެއާލް އިން ވަރަށް ގިނަ ރަނގަޅު ކަންކަން ކުރި ކަމަށެވެ. އަދި ކުރިއަށް އޮތް ތަނުގައި ވެސް ރެއާލް އަށް ބޭނުން ވަނީ އެފަދަ ކުޅުމެއް ކަމަށާއި، އެ މެޗުގައި ރެއާލް އިން ކުރި ރަނގަޅު ކަަންކަން އިތުރަށް ކުރިއަރުވަން ޖެހޭ ކަމަށް ވެސް އޭނާ ބުންޏެވެ. އެކަން ފާހަގަކޮށް އަލޮންސޯ ބުނީ، ރެއާލް އަށް ނަތީޖާ ނެރެވޭނެ ކަމުގެ ފުރިހަމަ ޔަގީންކަން އޭނާ އަށް އޮންނަ ކަމަށެވެ.