ވަޒީފާ އިން ވަކި ކޮށްފާނެ ކަމުގެ ބިރެއް އަލޮންސޯގެ ނެތް

ސްޕެއިންގެ ރެއާލް މެޑްރިޑުގެ ކޯޗު ކަމުގެ މަގާމުން ވަކި ކޮށްފާާނެ ކަމުގެ ބިރުވެރި ކަމެއް ނެތް ކަމަށާއި، ވިސްނުން އޮތީ މެންޗެސްޓަރ ސިޓީއާ ދެކޮޅަށް ކުޅޭ މެޗަށް ކަމަށް، ރެއާލްގެ ކޯޗު ޒަބީ އަލޮންސޯ ބުނެފި އެވެ.

އަލޮންސޯ މިހެން ބުނެފައި ވަނީ ސްޕެނިޝް ލީގުގައި ސެލްޓަ ވީގޯއާ ދެކޮޅަށް އަމިއްލަ ދަނޑުގައި ކުޅެ، ރެއާލް ބަލިވި މެޗަށް ފަހު އެވެ. އެ މެޗުން ރެއާލް ބަލިވެފައިވާއިރު، އެންމެ ފަހުން ސްޕެނިޝް ލީގުގައި ކުޅުނު ފަސް މެޗުގެ ތެރެއިން ރެއާލް މޮޅުވެފައި ވަނީ އެންމެ މެޗަކުންނެވެ. އަނެއް ތިން މެޗުން އެއްވަރުވެފައިވާއިރު، އެއް މެޗުން ވަނީ ބަލިވެފަ އެވެ.

އެއާއެކު، ރެއާލްގެ ކޯޗު ކަމުގައި އަލޮންސޯ އަށް ޕްރެޝަރު ބޮޑު ވަމުން އަންނަ ވާހަކަ ވަނީ އިތުރުވެފަ އެވެ. ޚާއްސަކޮށް ރެއާލްގެ ނަތީޖާތައް ދަށްވަމުން އަންނަ މި ދަނޑިވަޅުގައި، އެ ޓީމުގެ ކޯޗު ކަމުން އޭނާ ވަކި ކުރުމުގެ ފުރުސަތު އޮތް ކަމަށް، ސްޕެއިން ގެ މީޑިއާ ތަކުގައި އަންނަނީ ބުނަމުންނެވެ.

އެކަމާ ގުޅޭ ގޮތުން ވާހަކަ ދައްކަމުން އަލޮންސޯ ބުނެފައި ވަނީ، ރެއާލްގެ ކޯޗު ކަމުން އޭނާ ވަކި ކޮށްފާނެ ކަމަށް ބުނެ ދެކެވެމުން އަންނަ ވާހަކަ ތަކަށް އެއްވެސް ވަރަކަށް ވިސްނުމެއް ނެތް ކަމަށެވެ. އޭގެ ބަދަލުގައި އޭނާގެ ވިސްނުން އޮތީ ބުދަ ދުވަހުގެ ރޭ ޔުއެފާ ޗެމްޕިއަންސް ލީގުގައި މެންޗެސްޓަރ ސިޓީއާ ދެކޮޅަށް ކުޅޭ މެޗަށް ކަމަށް އަލޮންސޯ ބުންޏެވެ.

އޭނާ ބުނީ އަމިއްލަ ދަނޑުގައި ބަލިވުމަކީ ބައެއް ޙާލަތް ތަކުގައި ހިނގާނެ ކަމަށާއި، އެއީ އިންތިހާ އަށް ހިތްދަތި އިޙުސާސެއް ކުރެވޭ ކަމެއް ކަމަށެވެ. އެހެން ނަމަވެސް، ރެއާލްގެ ކުޅުންތެރިންނާއި، އޮފިޝަލުން އަދި މުޅި ޓީމު އޮތީ އެކީ އެކުގައިކަން ފާހަގަކޮަށް އަލޮންސޯ ބުނީ، ކުރިއަށް ދާނީ އަބަދު ވެސް އެގޮތުގައި ކަމަށެވެ.

މީގެ އިތުރުން އަލޮންސޯ ބުނެފައި ވަނީ، ރެއާލް އަށް މިހާރު ކުރިމަތިވެފައިވާ ޙާލަތު ބަދަލު ކުރުމަށް އޭނާ އަށް އިތުރު ހިތްވަރެއް ވެސް ލިބޭ ކަމަށެވެ. ރެއާލްގައި މިހާރު އޮތް ޓީމު ބޭނުން ވަނީ މަތީ ފަންތީގައި ވާދަކޮށް، ކާމިޔާބީ ޙާސިލު ކުރަން ކަމަށް އަލޮންސޯ ބުންޏެވެ. އަދި އޭނާ ބުނީ، ރެއާލް އޮތީ ރަނގަޅު މިސްރާބުގައި ކަމަށާއި، ޓީމައިގެން ކުރިއަށް ދާނެ ކަމަށެވެ.

ސްޕެނިޝް ލީގާ ގުޅޭ ގޮތުން ވާހަކަ ދައްކަމުން އަލޮންސޯ ބުނީ، ސެލްޓަ މެޗުން ބަލިވެ ރެއާލް އަށް ގެއްލުނީ ވަރަށް މުހިންމު ތިން ޕޮއިންޓު ކަމަށެވެ. އޭނާ ބުނީ އެ މެޗު ދިޔައީ ރެއާލް އިން ބޭނުންވި ގޮތަށް ނޫން ކަމަށާއި، މެޗުގެ ނަތީޖާ އަކީ ވެސް ބޭނުންވި ނަތީޖާ ނޫން ކަމަށެވެ. އެހެން ނަމަވެސް، ސްޕެނިޝް ލީގުގައި ބާކީ މެޗުތައް އޮތް ކަަމަށާއި، ކުރިއަށް އޮތީ ދިގު ދަތުރެއް ކަމަށް އޭނާ ބުންޏެވެ. އަދި މި ޙާލަތު އަނބުރާލެވޭނެ ކަމަށް ވެސް އޭނާ ބުނެފައިވެ އެވެ.

ސެލްޓަ އަތުން މޮޅުވެ، އެއް ވަނައިގައި އޮތް އެންމެ ފަހުގެ ޗެމްޕިއަން ބާސެލޯނާއާ ދެމެދު އޮތް ފަރަގު ޕޮއިންޓަކަށް ކުޑަ ކުރުމުގެ ފުރުސަތު ރެއާލް އަށް އޮތެވެ. ނަމަވެސް، ސެލްޓަ އަތުން ބަލިވެ، ރެއާލް އާއި ބާސެލޯނާއާ ދެމެދު އޮތް ފަރަގު ވަނީ ހަތަރު ޕޮއިންޓަށް ފުޅާވެފަ އެވެ.