ނ. މާފަރު ބިން ހިއްކުމުގެ މަސައްކަތް ރައީސް މުއިއްޒު ވެރިކަމާ ހަވާލުވިފަހުން ހުއްޓާލައި ސާމާނުތައް ވެސް ރަށުން ބާލައިފި
12 ޖެނުއަރީ 2026 | ހޯމަ 14:44ރިވެޓްމެންޓް ނުޖަހާ އޮތުމުގެ ސަބަބުން އޭރު ހިއްކި ސަރަހައްދުން ވަރަށް ބޮޑު ބައެއް މިހާރު ވަނީ ގިރައިގެން ގޮސް، އެ ސަރަހައްދުގެ މުރަކަތައް ވެސް މަރުވެފައި.
ނ. މާފަރު ކައުންސިލް ގެ ނައިބް ރައީސް މުޙައްމަދު އާމިރު ރާއްޖެ ޓީވީ ގެ "ފަށާއިރު" ޕްރޮގްރާމްގައި ވާހަކަ ދައްކަވަނީ | ރާއްޖެ އެމްވީ
ނިމިދިޔަ އެމްޑީޕީ ވެރިކަމުގައި ނ. މާފަރަށް ދިމާވެފައިވާ ބިމުގެ ދަތިކަން ހައްލުކުރުމުގެ ގޮތުން ފެށި ބިން ހިއްކުމުގެ މަސައްކަތް މި ސަރުކާރު ވެރިކަމާ ހަވާލުވި ފަހުން އެއްވެސް ވަރަކަށް ކުރިޔަށް ނުދާކަމަށް އެ ރަށު ކައުންސިލްގެ ނައިބް ރައީސް މުޙައްމަދު އާމިރު ވިދާޅުވެއްޖެ އެވެ.
ރާއްޖެ ޓީވީ ގެ "ފަށާއިރު" ޕްރޮގްރާމް ގައި ވާހަކަ ދައްކަވަމުން މާފަރު ކައުންސިލް ގެ ނައިބް ރައީސް އާމިރު ވިދާޅުވީ، ވެރިކަން ބަދަލުވިފަހުން މާފަރުގެ ތަރައްގީ އަށް ވަރަށް ބައިވަރު ގޮންޖެހުންތަކެއް އައިސްފައިވާ ކަމަށެވެ. ރައްޔިތުންނަށް ވެސް ވަރަށް ބޮޑެތި ފިއްތުންތަކެއް އެބަހުރި ކަމަށާއި، ހާއްސަކޮށް ވަޒީފާގެ ބިރުވެރިކަން ވަރަށް ބޮޑުކަން އާމިރު ފާހަގަކުރެއްވި އެވެ.
އެމްޑީޕީ ގެ ވެރިކަމުގައި އެއަރޕޯޓާއި ފެނަކައިން ގިނަ ފަރާތްތަކަކަށް ވަޒީފާގެ ފުރުސަތު ފަހިކޮށްދީފައިވާ ކަމަށާއި، ނަމަވެސް މިއަދު އެ ފަރާތްތައް ތިބީ ބިރުވެރިކަމެއްގެ ތެރޭގައި ކަމަށް އާމިރު ވިދާޅުވި އެވެ.
މާފަރު ބިން ހިއްކައި އެރަށު ބިމަށް އިތުރުކުރާ 20 ހެކްޓަރުގެ މަސައްކަތް ވަރަށް ބާރަށް ކުރިޔަށް ގެންގޮސް، އެމްޑީޕީ ގެ ވެރިކަމުގައި ޖުމްލަ 17 ހެކްޓަރުގެ ބިން ހިއްކާ ނިންމާފައިވާ ކަމަށް އާމިރު ވިދާޅު ވިއެވެ. ނަމަވެސް ރައީސް މުއިއްޒު ވެރިކަމާ ހަވާލުވެ ބިން ހިއްކުމުގެ މަސައްކަތް ކުރަން އެރަށަށް ގެންގޮސްފައިވާ ސާމާނުތައް ވެސް ރަށުން ބާލާފައިވާ ކަމަށް އާމިރު ވިދާޅުވި އެވެ.
ބިން ހިއްކުމުގެ އެއްވެސް މަސައްކަތެއް ނުކޮށް ދެ އަހަރަށް ވުރެ ގިނަ ދުވަސް ފާއިތުވެގެން ގޮސްފައިވާއިރު، އެ ސަރަހައްދުގައި ރިވެޓްމެންޓެއް ވެސް ޖަހާފައި ނުވުމުގެ ސަބަބުން ހިއްކާފައިވާ ސަރަހައްދު ވަރަށް ބޮޑަށް ގިރައިގެން ގޮސް އެ ސަރަހައްދުގެ މުރަކަތައް ވެސް މިހާރު މަރުވެފައިވާކަން އާމިރު ފާހަގަކުރެއްވި އެވެ.
މި ދިޔަ ވެރިކަމުގަ 20 ހެކްޓަރު ބިން ހިއްކަން ފެށުން. ވެރިކަން ބަދަލު ވި އިރު 17 ހެކްޓަރު ގެ ބިން ވަނީ ހިއްކާފަ. ނަމަވެސް ވެރިކަން ބަދަލުވި ފަހުން މަސައްކަތް ހުއްޓާލާ އެމްޑީޕީ ސަރުކާރުން މަސައްކަތްކުރަން އެރަށަށް ގެންދިޔަ ސާމާނުތައް ވެސް ވަނީ ބާލާފަ. ރިވެޓްމެންޓް ނުޖަހާ އޮތުމުގެ ސަބަބުން އޭރު ހިއްކި ސަރަހައްދުން ވަރަށް ބޮޑު ބައެއް މިހާރު ވަނި ގިރައިގެން ގޮސްފަ. ދެ އަހަރަށް ވުރެ ގިނަ ދުވަސްވި މިހާރު އެއްވެސް މަަސައްކަތެއް ނުހިނގާތާ. ފަސްތައް ގިރައިގެން ފަޅުތެތެރެއަށް ފެތުރުމުގެ ސަބަބުން އެ ސަރަހައްދުގެ މުރަކަތައް ވެސް މިހާރު ވަނީ މަރުވެފަ. ކައުންސިލް ގެ ފަރާތުން ރަސްމީ ސިފައެއްގައި ފޮޓޯ އާއި އެކު މިކަން ވާނީ އީއާރުއޭ ގެ ސަމާލުކަމަށް ގެނެސްފަ.ނ. މާފަރު ކައުންސިލް ގެ ނައިބް ރައީސް މުޙައްމަދު އާމިރު
މީގެ އިތުރުން އާމިރު ވަނީ ނިމިދިޔަ އެމްޑީޕީ ސަރުކާރުން މާފަރުގައި ތަރައްގީގެ ގިނަ މަޝްރޫއުތަކެއް ހިންގާފައިވާކަން ފާހަގަކުރައްވާފަ އެވެ. އެގޮތުން އެ ރަށު ވޮލީ ކޯޓުގެ މަސައްކަތް ނިންމާ ފެނާ ނަރުދާމާގެ މަސައްކަތް ވެސް ނިމި، ވެރިކަން ބަދަލުވި އިރު ބާކީ އޮތް މަސައްކަތަކީ ހަމަ އެކަނި ގޭގެއަށް ކަނެކްޝަން ގުޅާލުން ކަމަށް އާމިރު ވިދާޅުވި އެވެ.
އަދި އެމްޑީ ޕީގެ ވެރިކަމުގައި އެ ރަށު ސްކޫލްގެ މަލްޓިޕާޕަސް ހޯލުގެ މަސައްކަތް ފަށާފައި ވީނަމަވެސް މި ވެރިކަމުގައި އެ މަސައްކަތް ވެސް ކުރިއަށް ދަނީ ފިނިކަހަ ދުވެލީ ގައި ކަން އާމިރު ފާހަގަކުރެއްވި އެވެ.
ދާދި ފަހުން ހޯމް މިނިސްޓަރު ރިބަން ކަނޑާފަ ހުޅުވި ކަސްޓަމްސް އިމާރާތުގެ މަސައްކަތް ވެސް ފެށީ އެމްޑީޕީ ސަރުކާރުން ކަން ފާހަގަކުރައްވާ، އާމިރު ވިދާޅުވީ އެމްޑީޕީ ވެރިކަމުގައި އެ ރަށު ބޮޑު ފުޓްބޯޅަ ދަނޑުގެ ޓާފް އަޅާ ފެންސް ޖަހާ ނިންމާފައިވާ ކަމަށެވެ. އަދި އެއަރޕޯޓަށް އެންމެ 63 ހެކްޓަރުގެ ބިން ދީފައި އޮއްވާ، އެމްޑީޕީ ވެރިކަމުގައި އެއަރޕޯޓު ވަށައިގެން ބިން ހިއްކާ ރަންވޭ ވެސް ބޮޑުކޮށްފައިވާ ކަމަށް އާމިރު ވިދާޅުވި އެވެ.
ވޮލީ ކޯޓުގެ މަސައްކަތް ނިމިފަ، ފެނާ ނަރުދަމާ ގެ މަސައްކަތް ނިމިފަ ހަމަ އެކަނި ގޭގެއަށް ކަނެކްޝަން ގުޅާލުން އޮތީ، ސްކޫލް ގެ މަލްޓިޕާޕަސް ހޯލުގެ މަސައްކަތް ވެށިފަ އޮތީ ނަމަވެސް މި ސަރުކާރު ވެރިކަމާ ހަވާލުވިފަހުން ފިނިހަކަ ދުވެލީގަ މަސައްކަތް ކުރިޔަށް ދަނީ. ކަސްޓަމްސް އިމާރާތުގެ މަސައްކަތްވެސް ފެށިފަ އޮތީ. ބޮޑު ދަނޑުގެ މަސައްކަތް ވެސް ޓާފް އަޅާ ފެންސް ޖަހާ ނިމިފަ އޮތީ. އެއާޕޯޓަށް ކުރީގަ ދީފަ އޮންނަނީ 63 ހެކްޓަރުގެ ސަރަހައްދެއް މިދިޔަ އެމްޑީޕީ ވެރިކަމުގަ އެއަރޕޯޓް ވަށައިގެން ހިއްކާ ރަންވޭ ވެސް ބޮޑުކޮށްފަ ވަނީ.ނ. މާފަރު ކައުންސިލް ގެ ނައިބް ރައީސް މުޙައްމަދު އާމިރު
މާފަރުގެ ކަރަންޓުގެ ހާލަތު ރަނގަޅުކުރުމުގެ ގޮތުން އެމްޑީޕީ ވެރިކަމުގައި ކޭބަލް އަޅާ އާ ޓްރާންސްފޯމަރުތަކެއް ބެހެއްޓުމުގެ ހުރިހާ ކަމެއް ނިމިފައިވާ ކަމަށް އާމިރު ފާހަގަކުރެއްވި އެވެ. އެގޮތުން ޓްރާންސްފޯމަރު ތައް ބެހެއްޓުމުގެ މަސައްކަތަށް ބޭނުންވާ ހިލަ، ހިލަވެލި އަދި ސިމެންޓި ވެސް އެރަށަށް ގެނެސްފައިވާ ކަމަށް އާމިރު ވިދާޅުވި އެވެ.
ނަމަވެސް މަސައްކަތަށް ގެނައި ސިމެންތިތައް ގާވެގެން އުކާލި އިރު ވެސް އެ މަސައްކަތް ނުފެށޭ ކަމަށާއި، ސަރުކާރު ބަދަލުވެގެން ދެ އަހަރަށް ވުރެ ގިނަ ދުވަސް ވީއިރުވެސް ޓްރާންސްފޯމަރުތައް ބެހެއްޓޭ ގޮތެއް އަދި ނުވާކަމަށް އާމިރު ފާހަގަކުރެއްވި އެވެ.
ރައީސް މުއިއްޒުގެ ވެރިކަމުގެ ފުރަތަމަ ދެ އަހަރު ފާއިތުވެގެން ގޮސްފައިވާއިރު، ނ. މާފަރުގައި ތަރައްގީގެ އެއްވެސް މަޝްރޫއެއް އެކަށީގެންވާ ގޮތަށް ނުހިނގާކަން އެ ރަށު ރައްޔިތުން ފާހަގަކުރެ އެވެ. އަދި ނިމިދިޔަ އެމްޑީޕީގެ ސަރުކާރުން އެ ރަށުގައި ފަށާފައިވާ މަޝްރޫއުތައް ވެސް މިހާރު މަޑުޖެހިފައިވާ ކަމަށް ރައްޔިތުން ވަނީ ފާހަގަކޮށްފަ އެވެ. އަތޮޅުތަކުގެ ރަށްރަށުގައި އަސާސީ ޚިދުމަތްތައް ޤާއިމް ކޮށް، ރައްޔިތުންގެ ދިރިއުޅުމުގެ ފެންވަރު މަތިކުރުމަށްޓަކައި އެމްޑީޕީ ސަރުކާރުން ވަނީ، ރަށްރަށުގައި އުމްރާނީ ތަރައްގީގެ ވަރަށް ގިނަ މަޝްރޫޢުތައް ހިންގާފަ އެވެ.
