ނަޕޯލީ ބަލިކޮށް، އޭސީ މިލާާން އެއް ވަނަ އަށް

އިޓާލިއަން ލީގުގައި އެންމެ ފަހުގެ ޗެމްޕިއަން ނަޕޯލީއާ ދެކޮޅަށް ކުޅުނު މެޗުން މޮޅުވެ، އޭސީ މިލާން އިން ލީގު ތާވަލްގެ އެއް ވަނަ އަށް ޖެހިލައިފި އެވެ.

އޭސީ މިލާންގެ އަމިއްލަ ދަނޑުގައި އާދީއްތަ ދުވަހުގެ ރޭ ކުޅުނު މެޗު އެ ޓީމުން ކާމިޔާބު ކުރީ 2-1 އިންނެވެ. މެޗުގެ ފުރަަތަމަ ހާފުގައި އޭސީ މިލާން އިން ދެ ލަނޑު ޖެހިއިރު، ނަޕޯލީގެ ހަމައެކަނި ލަނޑު އެ ޓީމުން ޖެހީ ދެ ވަނަ ހާފުގަ އެވެ.

މެޗު ފަށައިގެން ތިން ވަނަ މިނެޓުގައި އޭސީ މިލާން އިން ލަނޑު ޖަހައި ލީޑު ނެގި އެވެ. އެ ލަނޑު އެ ޓީމަށް ޖަހައިދިނީ އަލެކްސިސް ސަލަމޭކާ އެވެ. އެ ލަނޑު ޖަހަން ސަލަމޭކާ އަށް ފުރުސަތު ތަނަވަސްކޮށްދިނީ ކްރިސްޓިއަން ޕުލިސިޗް އެވެ.

އޭގެ ފަހުން ފުރަތަމަ ހާފުގެ 31 ވަނަ މިނެޓުގައި އޭސީ މިލާން އިން ވަނީ ދެ ވަނަ ލަނޑު ޖަހައި ލީޑު ފުޅާ ކޮށްފަ އެވެ. އެ ލަނޑު އޭސީ މިލާން އަށް ޖަހައިދިނީ ޕުލިސިޗް އެވެ. އެއީ ޔޫސުފާ ފޮފާނަ ތަނަވަސްކޮށްދިން ފުރުސަތެއްގައި ޕުލިސިޗް ޖެހި ލަނޑެކެވެ.

މެޗުގެ ދެ ވަނަ ހާފުގައި ނަޕޯލީ އިން އެ ޓީމުގެ ހަމައެކަނި ލަނޑު ޖެހީ 60 ވަނަ މިނެޓުގަ އެވެ. އެއީ އޭސީ މިލާންގެ އެރިޔާ ތެރެއިން ނަޕޯލީގެ ކުޅުންތެރިޔަކަށް ކުރި ފައުލަކާ ގުޅިގެން ލިބުނު ޕެނަލްޓީ ކާމިޔާބުކޮށް، ކެވިން ޑި ބްރޭނާ ޖެހި ލަނޑެކެވެ.

މެޗަށް ފަހު ވާހަކަ ދައްކަމުން އޭސީ މިލާންގެ ކޯޗު މާސިމިލިއާނޯ އަލެގްރީ ބުނެފައި ވަނީ، މެޗުން މޮޅުވުމުން ހިތްހަމަ ޖެހޭ ކަމަށާއި، އެ މެޗަށް ނިކުތީ ވެސް ތިން ޕޮއިންޓަށް އަމާޒު ކޮށްގެން ކަމަށެވެ. ނަޕޯލީ އަކީ ވަރަަށް މޮޅު ޓީމެއް ކަމަށާއި، އެ ޓީމާ ދެކޮޅަށް ކުޅުނު މެޗު އުނދަގޫކަމް ފާހަގަކޮށް އަލެގްރީ ބުނީ، އެއީ މުހިންމު މޮޅެއް ކަމަށެވެ.

މެޗުގެ ފުރަތަމަ ހާފުގައި އޭސީ މިލާން އިން ވަރަށް ރަނގަޅަށް ކުޅުނުކަން ފާހަގަކޮށް އަލެގްރީ ބުނީ، ދެ ވަނަ ހާފުގައި ދެއްކި ރަތް ކާޑާ އެކު އިތުރު ހިތްވަރެއް ކުރަން ޖެހުނު ކަމަށެވެ. އެއާއެކު ވެސް، އޭސީ މިލާންގެ ކުޅުންތެރިންގެ ފަރާތުން ހިތްވަރު ފެނުނު ކަމަށް އޭނާ ބުންޏެވެ.

މޮޅާއެކު އޭސީ މިލާން އެއް ވަނައިގައި އޮތީ މިހާތަނަށް ކުޅެފައިވާ ފަސް މެޗުން 12 ޕޮއިންޓާ އެކު އެވެ. ހަތަރު މެޗުން އެ ޓީމު މޮޅުވެފައިވާއިރު، އެއް މެޗުން ވަނީ ބަލިވެފަ އެވެ. ދެ ވަނައިގައި އޮތް ނަޕޯލީ އަށް ވެސް ލިބެނީ ފަސް މެޗުން 12 ޕޮއިންޓެވެ. އޭސީ މިލާާން އަތުން ވީ ބައްޔަކީ، މި ސީޒަންގައި ނަޕޯލީގެ ފުރަތަމަ ބައްޔެވެ.