ރިވާ ޕްލޭޓް ބަލިކޮށް، އިންޓަރ މިލާން ގަދަ 16 އަށް

އެމެރިކާގައި މިހާރު ކުރިއަށްދާ ފީފާ ކުލަބު ވޯލްޑް ކަޕްގެ ގުރޫޕް އީގެ ފަހު މެޗުގައި ރިވާާ ޕްލޭޓްގެ މައްޗަށް ކުރި ހޯދައި، އިންޓަރ މިލާން އިން މުބާރާތުގެ ގަދަ 16 ވަނަ ބުރުން ޖާގަ ހޯދައިފި އެވެ.

މުބާރާތުގައި އިންޓަރ މިލާންގެ ފުރަތަމަ މެޗުގައި ވަނީ މޮންޓަރޭއާ އެއްވަރުވެފަ އެވެ. އަދި ދެ ވަނަ މެޗުގައި ވަނީ އުރަވާ ރެޑް ޑައިމަންޑްސް އަތުން މޮޅުވެފަ އެވެ. ރިވާ ޕްލޭޓުގެ ފުރަތަމަ މެޗުގައި އުރަވާ ރެޑް ޑައިމަންޑްސް އަތުން މޮޅުވީއިރު، ދެ ވަނަ މެޗުގައި މޮންޓަރޭއާ ވަނީ އެއްވަރުވެފަ އެވެ.

ބުރާސްފަތި ދުވަހުގެ ފަތިހު ލުމެން ފީލްޑް ސްޓޭޑިއަމްގައި މި ދެ ޓީމު ބައްދަލު ކުރި މެޗު އިންޓަރ މިލާން އިން ކާމިޔާބު ކުރީ 2-0 އިންނެވެ. މެޗުގައި އިންޓަރ މިލާން އިން އެ ޓީމުގެ ދެ ލަނޑު ވެސް ޖެހީ ފަހު ހާފުގަ އެވެ.

ފުރަތަމަ ހާފުގައި ވެސް އިންޓަރ މިލާން އިން ވަނީ ލަނޑު ޖަހަން ފުރުސަތު ތަނަވަސްކޮށްފަ އެވެ. އެ ޓީމަށް ކުޅެމުން އަންނަ އާޖެންޓީނާގެ ލައުޓާރޯ މާޓިނޭޒް އަށް ލަނޑު ޖަހަން ފުރުސަތު ލިބުނުއިރު، ފެޑެރިކޯ ޑިމާކޯ އަށް ވެސް ލަނޑު ޖަހަން ފުރުސަތު ލިބުނެވެ.

މެޗުގެ ދެ ވަނަ ހާފުގައި ރިވާ ޕްލޭޓަށް އެންމެ ބޮޑު ގެއްލުމެއް ދެއްކީ އެ ޓީމުގެ ޑިފެންޑަރު ލޫކަސް މާާޓިނޭޒް އަށް ސީދާ ރަތް ކާޑު ދައްކައި ދަނޑުން ފޮނުވާލުމުންނެވެ. އޭގެ ސަބަބުން މެޗުގެ ބާކީ ބައި އެ ޓީމުން ފުރިހަމަ ކުރަން ޖެހުނީ އެއް ކުޅުންތެރިޔަކު މަދު ކޮށެވެ.

އޭގެ ފަހުން މެޗުގެ 72 ވަނަ މިނެޓުގައި އިންޓަރ މިލާން އިން ވަނީ ލަނޑު ޖަަހައި ލީޑު ނަގައިފަ އެވެ. އެ ލަނޑު އެ ޓީމަށް ޖަހައިދިނީ ފްރެންސެސްކޯ ޕިއޯ އެސްޕޮސިޓޯ އެވެ. އެއީ ޕީޓާ ސުސިޗް ތަނަވަސްކޮށްދިން ފުރުސަތެއްގައި އޭނާ ޖެހި ލަނޑެކެވެ.

އޭގެ ފަހުން މެޗުގެ ފުރިހަމަ ވަގުތު ހަމަވެ އިތުރަށް ދެއްކި ވަގުތުގައި އިންޓަރ މިލާން އިން ވަނީ އެ ޓީމުގެ ދެ ވަނަ ލަނޑު ޖަހައި ލީޑު ފުޅާ ކޮށްފަ އެވެ. އެއީ އެ ޓީމުގެ ޑިފެންޑަރު އަލެސާންޑްރޯ ބަސްޓޮނީ ޖެހި ލަނޑެކެވެ.

މޮޅާއެކު އިންޓަރ މިލާން އިން މުބާރާތުގެ ގަދަ 16 ވަނަ ބުރުގެ ޖާގަ ހޯދީ މި ގުރޫޕުގެ އެއް ވަނަ ޓީމުގެ ގޮތުގަ އެވެ. އެއީ އެ ޓީމު ކުޅުނު ތިން މެޗުން ހަތް ޕޮއިންޓާ އެކު އެވެ. ދެ ވަނައިގައި ހަ ޕޮއިންޓާ އެކު ގަދަ 16 އިން ޖާގަ ހޯދީ މޮންޓަރޭ އެވެ.