އިންޒާގީ، އިންޓަރ މިލާން ދޫކޮށްލައިފި

އިންޓަރ މިލާނަށް އިރުޝާދު ދެމުން އައި ސިމޯން އިންޒާގީ، އެ ކުލަބު ދޫކޮށްލައިފި އެވެ.

އުމުރުން 49 އަހަރުގެ އިންޒާގީ އިންޓަރ މިލާންގެ ކޯޗުކަމާ ހަވާލުވީ 2021 ވަނަ އަހަރު އެވެ. އެންމެ ފުރަތަމަ އެ ކުލަބާ އޭނާ ހަވާލުވީ ދެ އަހަރު ދުވަހުގެ އެއްބަސްވުމެއްގެ ދަށުންނެވެ. އެހެން ނަމަވެސް، 2023 ވަނަ އަހަރު އޭނާ ވަނީ އިތުރު ދެ އަހަރަށް އެއްބަސްވުން އައު ކޮށްފަ އެވެ. އެ އެއްބަސްވުމުގެ މުއްދަތު ހަމަވާނީ ޖޫން މަހުގެ ނިޔަލަށެވެ.

ނަމަވެސް، އިންޓަރ މިލާންގެ އިސްވެރިންނާ އެކު ކުރިއަށް ގެންދިޔަ މަޝްވަރާތަކަށް ފަހު އިންޒާގީ ވަނީ އެ ކުލަބު ދޫކޮށްލަން ނިންމައިފަ އެވެ. އެ ނިންމުން އޭނާ ނިންމީ، ޔުއެފާ ޗެމްޕިއަންސް ލީގުގެ ފައިނަލްގައި ފްރާންސްގެ ޕެރިސް ސެއިންޓް ޖާމަން (ޕީއެސްޖީ) އަތުން ތަފާތު ބޮޑު ނަތީޖާ އަކުން އިންޓަރ މިލާން ބަލިވެފައި ވަނިކޮށެވެ.

އިންޒާގީ އިންޓަރ މިލާން ދޫކޮށްލަން ނިންމާފައިވާއިރު، އެ ޓީމުން މިހާރު އަންނަނީ ކުރިއަށް އޮތް ސީޒަނަށް އައު ކޯޗެއް ހޯދުމުގެ މަސައްކަތް ވެސް ކުރަމުންނެވެ. އަދި އިންޒާގީ ދެން ހަވާލުވާނީ ސައުދީ ޕްރޯ ލީގުގެ އަލް ޙިލާލްއާ ކަމަށް މީޑިއާ ރިޕޯޓުތައް ބުނެ އެވެ. އެ ކުލަބުން ވަނީ އިންޒާގީ އަށް ހުށަހެޅުމެއް ހުށަހަޅައިފަ އެވެ.

މިއީ އިންޒާގީގެ އިރުޝާދުގެ ދަށުން ކުޅެ، ޗެމްޕިއަންސް ލީގުގެ ފައިނަލްގައި ޕީއެސްޖީ އަތުން އިންޓަރ މިލާން ބަލިވެފައިވާއިރު، މީގެ ކުރިން 2023 ވަނަ އަހަރުގެ ފައިނަލްގައި ވަނީ މެންޗެސްޓަރ ސިޓީ އަތުން ވެސް ބަލިވެފަ އެވެ.

އިންޒާގީގެ އިރުޝާދުގެ ދަށުން އިންޓަރ މިލާނުން ވަނީ ހަ ތައްޓެއް ކާމިޔާބު ކޮށްފަ އެވެ. އެއީ އިޓާލިއަން ލީގު އެއް ފަހަރު، އިޓާލިއަން ކަޕް ދެ ފަހަރު އަދި އިޓާލިއަން ސުޕަ ކަޕް ތިން ފަހަރު އެވެ. އޭނާގެ އިރުޝާދުގެ ދަށުން އިންޓަރ މިލާނުން މި ސީޒަން ނިންމާލީ އެއްވެސް ތައްޓެއް ކާމިޔާބު ނުކުރެވި އެވެ.