ޑެންމާކުން ކުއާޓާ ފައިނަލްގެ ފުރުސަތު ހޯދައިފި

ޔުއެފާ ނޭޝަންސް ލީގުގައި ސާބިއާއާ ދެކޮޅަށް ކުޅުނު މެޗު އެއްވަރުވި ނަމަވެސް، ޑެންމާކުން މުބާރާތުގެ ކުއާޓާ ފައިނަލްގެ ފުރުސަތު ހޯދައިފި އެވެ.

ހޯމަ ދުވަހުގެ ރޭ ސާބިއާ އާއި ޑެންމާކު ބައްދަލު ކުރި މެޗު ނިމުނީ އެއްވެސް ޓީމަކަށް ލަނޑެއް ނުޖެހި އެވެ. އެ މެޗުން މޮޅުވެގެން މުބާރާތުގެ ކުއާޓާ ފައިނަލް އިން ޖާގަ ހޯދުމުގެ ފުރުސަތު ސާބިއާ އަށް އޮތްއިރު، މެޗުން ބަލި ނުވެ ފަރު ޖައްސާލައިގެން ކުއާޓާ ފައިނަލްގެ ފުރުސަތު ޑެންމާކަށް އޮތެވެ.

މެޗު ފަށައިގެން ދެ ޓީމުގެ ފަރާތުން ވެސް ދާދި ހަމަހަމަ ކުޅުމެއް ފެނުނުއިރު، ދެ ޓީމަށް ވެސް ލަނޑު ޖަހަން ފުރުސަތު ލިބުނެވެ. މެޗުގެ ފުރަތަމަ ހާފުގައި ޑެންމާކަށް ލަނޑު ޖަހަން އެ ޓީމުގެ ކެސްޕާ ޑޮލްބާގަށް ފުރުސަތު ލިބުނުއިރު، ކްރިސްޓިއަން އެރިކްސަން އަށް ވެސް ލަނޑު ޖަހަން ފުރުސަތު ލިބުނެވެ. މެޗުގައި ސާބިއާގެ އެލެކްސެންޑާ މިޓްރޮވިޗް އަށް ލަނޑު ޖަހާނެ ދެ ފުރުސަތެއް ލިބުނުއިރު، ޑޫސަން ވްލާހޮވިޗް އަށް ވެސް ވަނީ ލަނޑު ޖަހަން ފުރުސަތު ލިބިފަ އެވެ. މެޗުގެ ފަހު ވަގުތުގައި ވެސް ސާބިއާ އަށް ވަނީ ލަނޑު ޖަހަން ރަނގަޅު ފުރުސަތެއް ލިބިފަ އެވެ.

މެޗު އެއްވަރުވެގެން ނިމުނުއިރު، ޑެންމާކުން ކުއާޓާ ފައިނަލްގެ ފުރުސަތު ހޯދީ މި ގުރޫޕުގެ ދެ ވަނަ ޓީމުގެ ގޮތުގަ އެވެ. އެއީ ގުރޫޕުގައި ޑެންމާކުން ކުޅުނު ހަ މެޗުން އަށް ޕޮއިންޓު ހޯދައިގެންނެވެ. ޑެންމާކު ވަނީ އެ ޓީމު ކުޅުނު ދެ މެޗުން މޮޅުވެ، ދެ މެޗުން އެއްވަރުވެ، އަަދި އަނެއް ދެ މެޗުން ބަލިވެފަ އެވެ. ސާބިއާ ތިން ވަަނައިގައި އޮތީ ހަ މެޗުން ހަ ޕޮއިންޓާ އެކު އެވެ. އެންމެ މެޗަކުން އެ ޓީމު މޮޅުވެފައިވާއިރު، ތިން މެޗު އެއްވަރުވެ އަދި ދެ މެޗުން ވަނީ ބަލިވެފަ އެވެ.