ފަހަތުން އަރައި ލިންކަން ސިޓީ ބަލިކޮށް، ޗެލްސީ ގަދަ 16 އަށް

ކަރަބޯ ކަޕްގެ ތިން ވަނަ ބުރުގައި ލިންކަން ސިޓީއާ ދެކޮޅަށް ކުޅުނު މެޗުން މޮޅުވެ، ޗެލްސީ އިން މުބާރާތުގެ ގަދަ 16 ވަނަ ބުރުން ޖާގަ ހޯދައިފި އެވެ.

އަންގާރަ ދުވަހުގެ ރޭ ކުޅުނު މެޗު ޗެލްސީ އިން ކާމިޔާބު ކުރީ 2-1 އިންނެވެ. މެޗުގައި ލިންކަން ސިޓީ އިން ލަނޑު ޖަހައި ކުރި ހޯދާފައި ވަނިކޮށް، ޗެލްސީ އިން ވަނީ ފަހަތުން އަރައި ލަނޑު ޖަހައިގެން މޮޅުވެފަ އެވެ.

މެޗުގެ ފުރަތަަމަ ހާފުގެ ފުރިހަމަ ވަގުތު ހަމަވާން ތިން މިނެޓަށް ވެފައި ވަނިކޮށް ލިންކަން ސިޓީ އަށް ލީޑު ނަގައިދިނީ ރޮބް ސްޓްރީޓް އެވެ. އެ ލަނޑުގެ ކުރިން މެޗުގައި ޗެލްސީ އަށް ވަނީ ލަނޑު ޖަހަން ފުރުސަތު ލިބިފަ އެވެ.

މެޗުގެ ދެ ވަނަ ހާފު ފަށައިގެން ތިން ވަނަ މިނެޓުގައި ޗެލްސީ އިން ވަނީ ލަނޑު ޖަހައި ނަތީޖާ ހަމަހަމަ ކޮށްފަ އެވެ. އެ ލަނޑު އެ ޓީމަށް ޖަހައިދިނީ ޓައިރިކް ޖޯޖް އެވެ. އޭގެ ދެ މިނެޓު ފަހުން ފަކުންޑޯ ބުއޮނަނޯޓޭ ވަނީ ޗެލްސީގެ ދެ ވަނަ ލަނޑު ޖަހައި މެޗުން މޮޅު ކޮށްދީފަ އެވެ.

މެޗަށް ފަހު ވާހަކަ ދައްކަމުން ޗެލްސީގެ ކޯޗު އެންޒޯ މަރެސްކާ ބުނެފައި ވަނީ، މެޗުން މޮޅުވުމުން ހިތްހަމަ ޖެހޭ ކަަމަށާއި، ލިންކަން ސިޓީއާ ދެކޮޅަށް ކުޅެން ޖެހޭ ގޮތް ކުރިން ވެސް އިނގޭ ކަމަށެވެ. ޚާއްސަކޮށް ފުރަތަމަ ހާފުގައި ޗެލްސީ އަށް ކޮންމެ ވެސް ވަރެއްގެ އުނދަގޫތަކެއް ކުރިމަތިވި ކަމަށް އޭނާ ބުންޏެވެ.

މަރެސްކާ ބުނީ ދެ ވަނަ ހާފުގައި ޗެލްސީ އިން ބައެއް ކަންކަން ބަދަލު ކުރި ކަމަށާާއި، އޭގެ ނަތިޖާ އަކީ ފަހަތުން އަރައި ދެ ލަނޑު ޖަހައިގެން މޮޅުވުން ކަމަށެވެ. އޭނާ ބުނީ ޗެލްސީގެ ކުޅުންތެރިންގެ ފަރާތުން ރަނގަޅު މަސައްކަތެއް ފެނިފައިވާ ކަމަށާއި، ކުޅުންތެރިންގެ ކުޅުމާ މެދު އޭނާ ހިތްހަމަ ޖެހޭ ކަމަށެވެ.

އިތުރަށް މަރެސްކާ ބުނީ އޭނާ ބޭނުން ވަނީ ޗެލްސީ ރަނގަޅު މިސްރާބުގައި ކުރިއަށް ދާން ކަމަށެވެ. އެހެން ނަމަވެސް، ރަނގަޅު ކުރަން ޖެހޭ ކަންކަން ހުރި ކަމަށާއި، އެކަންކަމަށް އަބަދު ވެސް މަސައްކަތް ކުރާނެ ކަމަށް މަރެސްކާ ބުންޏެވެ. އޭނާ ބުނީ ކުޅުންތެރިންނަށް އޮންނަ އިތުބާރަކީ އެންމެ މުހިންމު ކަންތައް ކަމަށެވެ.