އަމިއްލަ ދަނޑުގައި ބްރައިޓަން އަތުން ޗެލްސީ ބަލިވެއްޖެ

އިނގިރޭސި ޕްރިމިއާ ލީގުގައި ބްރައިޓަންއާ ދެކޮޅަށް ކުޅުނު މެޗުން ޗެލްސީ ބަލިވެއްޖެ އެވެ.

ޗެލްސީގެ އަމިއްލަ ދަނޑުގައި ކުޅުނު މެޗުގައި ބްރައިޓަން އިން އެ ޓީމުގެ މައްޗަށް ކުރި ހޯދީ 3-1 އިންނެވެ. މެޗުގައި ޗެލްސީ އިން ލަނޑު ޖަހައި ކުރި ހޯދާފައި ވަނިކޮށް، ބްރައިޓަން އިން ވަނީ ފަހަތުން އަރައި ތިން ލަނޑު ޖަހައިގެން މެޗުން މޮޅުވެފަ އެވެ.

މެޗުގެ ފުރަތަމަ ހާފުގެ 24 ވަނަ މިނެޓުގައި ޗެލްސީ އިން ވަނީ ލަނޑު ޖަހައި ލީޑު ނަގައިފަ އެވެ. އެ ލަނޑު އެ ޓީމަށް ޖަހައިދިނީ އާޖެންޓީނާގެ އެންޒޯ ފެނާންޑޭޒް އެވެ. މެޗުގައި ޗެލްސީ އަށް އެންމެ ބޮޑު ގެއްލުމެއް ދެއްކީ، ދެ ވަނަ ހާފުގައި އެ ޓީމުގެ ޓްރެވޯ ޗަލަބޯ އަށް ސީދާ ރަތް ކާޑު ދައްކައި ދަނޑުން ފޮނުވާލުމުންނެވެ.

އެއް ކުޅުންތެރިޔަކު މަދުން ކުޅެމުން ދިޔަ ޗެލްސީ ކޮޅަށް ލަނޑު ޖަހައި ބްރައިޓަން އިން ނަތީޖާ ހަމަހަމަ ކުރީ 77 ވަނަ މިނެޓުގަ އެވެ. އެ ލަނޑު ބްރައިޓަން އަށް ޖަހައިދިނީ ޑެނީ ވެލްބެކް އެވެ. އޭގެ ފަހުން މެޗުގެ ފުރިހަމަ ވަގުތު ހަމަވެ އިތުރަށް ދެއްކި ވަގުތުގައި ބްރައިޓަން އަށް ލީޑު ނަގައިދިނީ މެކްސިމް ޑި ކުއިޕާ އެވެ. އޭގެ އިރިކޮޅެއް ފަހުން ބްރައިޓަންގެ ތިން ވަނަ ލަނޑު ޖެހީ ވެލްބެކް އެވެ.

މިއީ މި ސީޒަންގެ ޕްރިމިއާ ލީގުގައި ޗެލްސީގެ ދެ ވަނަ ބައްޔެވެ. މިހާތަނަށް ކުޅެފައިވާ ހަ މެޗުގެ ތެރެއިން ދެ މެޗުން ޗެލްސީ މޮޅުވެފައިވާއިރު، ދެ މެޗުން ވަނީ އެއްވަރުވެފަ އެވެ. ހަ މެޗުން ލިބުނު އަށް ޕޮއިންޓާ އެކު ޗެލްސީ އޮތީ އަށް ވަނައިގަ އެވެ.