ފަހު ވަގުތު ޗެލްސީ އަތުން ބަލިވެ ލިވަޕޫލް އަށް ޖެހިޖެހިގެން ތިން ވަނަ ބަލި
މެޗަށް ފަހު ވާހަކަ ދައްކަމުން ލިވަޕޫލްގެ ކޯޗު އާން ސްލޮޓް ބުނެފައި ވަނީ، ޗެލްސީ އަތުން ވީ ބައްޔަކީ އަނެއްކާ ވެސް ލިވަޕޫލް އަށް ވަރަށް ބޮޑު ހިތްހަމަ ނުޖެހުމެއް ކަމަށެވެ. އޭނާ ބުނީ ޗެލްސީ އަތުން ވީ ބައްޔާއި، އޭގެ ކުރިން ލީގުގައި ޕެލަސްއާ ދެކޮޅަށް ކުޅުނު މެޗުން ވީ ބައްޔަކީ ވެސް ހަމަ ދާދި އެއް ކަހަލަ ބައްޔެއް ކަމަށެވެ.
މެޗުގައި ޗެލްސީ އިން ދެ ވަނަ ލަނޑު ޖެހި ވަގުތު ލިވަޕޫލްގެ ކުޅުންތެރިން
އިނގިރޭސި ޕްރިމިއާ ލީގުގައި ޗެލްސީއާ ދެކޮޅަށް ކުޅުނު މެޗުން، އެންމެ ފަހުގެ ޗެމްޕިއަން ލިވަޕޫލް ބަލިވެއްޖެ އެވެ.
ޗެލްސީގެ އަމިއްލަ ދަނޑުގައި ހޮނިހިރު ދުވަހުގެ ރޭ ކުޅުނު މެޗުގައި އެ ޓީމުން ވަނީ 2-1 އިން ލިވަޕޫލްގެ މައްޗަށް ކުރި ހޯދައިފަ އެވެ. މެޗުގައި ޗެލްސީ އިން ކުރި ހޯދާފައި ވަނިކޮށް ލިވަޕޫލް އިން ނަތީޖާ ހަމަހަމަ ވެސް ކުރި އެވެ. ނަމަވެސް، ފަހު ވަގުތުގައި ލަނޑު ޖަހައިގެން ޗެލްސީ ވަނީ މެޗުން މޮޅުވެފަ އެވެ.
މެޗު ފަށައިގެން 14 ވަނަ މިނެޓުގައި ޗެލްސީ އިން ވަނީ ލަނޑު ޖަހައި ލީޑު ނަގައިފަ އެވެ. އެ ލަނޑު ޗެލްސީ އަށް ޖަހައިދިނީ މޮއިސަސް ކަސައިޑޯ އެވެ. އެއީ މަލޯ ގުސްޓޯ ތަނަވަސްކޮށްދިން ފުރުސަތެއްގައި އޭނާ ޖެހި ލަނޑެކެވެ.
މެޗުގެ ދެ ވަނަ ހާފުގައި ލިވަޕޫލް އިން ވަނީ ލަނޑު ޖަހައި ނަތީޖާ ހަމަހަމަ ކޮށްފަ އެވެ. މެޗުގެ 63 ވަނަ މިނެޓުގައި ލިވަޕޫލް އަށް ނަތީޖާ ހަމަހަމަ ކޮށްދިނީ ކޯޑީ ގަކްޕޯ އެވެ. އެ ލަނޑު ޖަހަން އޭނާ އަށް ފުރުސަތު ތަނަވަސްކޮށްދިނީ އެލެކްސެންޑާ އިސާކް އެވެ.
މެޗު އެއްވަރުވާން ދަނިކޮށް މެޗުގެ ފަހު ވަގުތުގައި ޗެލްސީ މޮޅު ކޮށްދިނީ އެސްޓެވާއޯ ވިލިއަމްސް އެވެ. އެއީ މާކް ކުކުރޭލާ ތަނަވަސްކޮށްދިން ފުރުސަތެއްގައި އޭނާ ޖެހި ލަނޑެކެވެ.
ޗެލްސީ އަތުން ލިވަޕޫލް ބަލިވެފައިވާއިރު، އެންމެ ފަހުން ލިވަޕޫލް ކުޅުނު ތިން މެޗުން ވެސް އެ ޓީމު މި ވަނީ ބަލިވެފަ އެވެ. ލީގުގައި ކްރިސްޓަލް ޕެލަސްއާ ދެކޮޅަށް ކުޅުނު މެޗުން ވެސް ލިވަޕޫލް ބަލިވީއިރު، އޭގެ ފަހުން ޔުއެފާ ޗެމްޕިއަންސް ލީގުގައި ގަލަޓަސަރާއިއާ ދެކޮޅަށް ކުޅުނު މެޗުން ވެސް ލިވަޕޫލް ވަނީ ބަލިވެފަ އެވެ. އޭގެ ފަހުން ޗެލްސީ އަތުން ބަލިވެފައިވާއިރު، ބައިނަލްއަޤުވާމީ ބްރޭކަށް ދިޔައިރު ލިވަޕޫލް އަށް ވަނީ އެއް ވަނަ މަގާމު ގެއްލިފަ އެވެ.
މެޗަށް ފަހު ވާހަކަ ދައްކަމުން ލިވަޕޫލްގެ ކޯޗު އާން ސްލޮޓް ބުނެފައި ވަނީ، ޗެލްސީ އަތުން ވީ ބައްޔަކީ އަނެއްކާ ވެސް ލިވަޕޫލް އަށް ވަރަށް ބޮޑު ހިތްހަމަ ނުޖެހުމެއް ކަމަށެވެ. އޭނާ ބުނީ ޗެލްސީ އަތުން ވީ ބައްޔާއި، އޭގެ ކުރިން ލީގުގައި ޕެލަސްއާ ދެކޮޅަށް ކުޅުނު މެޗުން ވީ ބައްޔަކީ ވެސް ހަމަ ދާދި އެއް ކަހަލަ ބައްޔެއް ކަމަށެވެ.
ލީގުގައި މިހާތަނަށް ކުޅުނު ހަތް މެޗުން 15 ޕޮއިންޓާ އެކު ލިވަޕޫލް އޮތީ ދެ ވަނައިގަ އެވެ. ހަތް މެޗުގެ ތެރެއިން އެ ޓީމު މޮޅުވެފައި ވަނީ ފަސް މެޗުންނެވެ. އަނެއް ދެ މެޗުން ލިވަޕޫލް ވަނީ ބަލިވެފަ އެވެ.
