ވެނެޒުއޭލާގެ ތެލުގެ ވިޔަފާރި ވަކި މުއްދަތެއް ނެތް ގޮތަށް އެމެރިކާގެ ބާރުގެ ދަށަށް ގެނެސްފި

ވެނެޒުއޭލާގެ ތެލުގެ ވިޔަފާރި ވަކި މުއްދަތެއް ނެތް ގޮތަށް އެމެރިކާގެ ބާރުގެ ދަށަށް ގެންގޮސް، އެ ވިޔަފާރިން ލިބޭ ފައިސާ ބޭނުންކުރާނެ ގޮތް ނިންމާނީ އެމެރިކާ އިން ކަމަށް އެގައުމުން ހާމަކޮށްފި އެވެ.

ރައީސް ޑޮނަލްޑް ޓްރަމްޕް ވިދާޅުވި ގޮތުގައި، ވެނެޒުއޭލާ އިން 30 އާއި 50 މިލިއަނާ ދެމެދުގެ އަދަދަކަށް ތެޔޮ ފީފާ ވޮޝިންޓަނާ ހަވާލުކުރާނެ އެވެ. މީގެ އިތުރުން، އެމެރިކާގެ ދަތިކުރުމުގެ ފިޔަވަޅުތަކާ ހިލާފުވި ކަމަށް ބުނެ، ވެނެޒުއޭލާ އާ ގުޅުންހުރި ދެ އުޅަނދެއް އެމެރިކާގެ ހާއްސަ ސިފައިން ބުދަ ދުވަހު ވަނީ ހިފަހައްޓާފަ އެވެ. އޭގެ ތެރޭގައި އުތުރު އެޓްލާންޓިކް ކަނޑުން ހިފެހެއްޓި ރަޝިޔާގެ ދިދަ ޖަހާފައިވާ އުޅަނދެއް ވެސް ހިމެނެ އެވެ.

ވެނެޒުއޭލާގެ ކަންކަން ނިންމުމުގައި އެމެރިކާ އިން ބަސް ކިޔާނެ މުއްދަތެއް ކަނޑައެޅުމަށް ޓްރަމްޕް ވަނީ ދެކޮޅު ހައްދަވާފަ އެވެ. އޭނާ އިޝާރާތް ކުރެއްވި ގޮތުގައި މިކަން އެތައް އަހަރަކަށް ދެމިގެން ހިނގައިދާނެ އެވެ.

"ނިއުޔޯކް ޓައިމްސް" އަށް ދެއްވި ބަސްދީގަތުމެއްގައި ޓްރަމްޕް ވިދާޅުވީ، އެއީ ކިހާ ދުވަހެއްކަން އެނގޭނީ ވަގުތު ޖެހުމުން ކަމަށެވެ. އަދި އެއީ މަސްތަކެއް ނުވަތަ އަހަރެއްހާ ދުވަސްތޯ ސުވާލު ކުރުމުން، އޭނާ ވިދާޅުވީ އެއަށްވުރެ މާ ގިނަ ދުވަސް ވާނެ ކަމަށް ލަފާކުރެވޭ ކަމަށެވެ.

"އަހަރެމެން އެ ގައުމު އަލުން އާބާދު ކުރާނީ ވަރަށް ފައިދާ ހުރި ގޮތަކަށް. އަހަރެމެން އެ ގައުމުގެ ތެޔޮ ބޭނުން ކުރާނަން، އަދި ތެޔޮ ނަގާނަން. މީގެ ސަބަބުން ތެލުގެ އަގުތައް ދަށް ކުރެވޭނެ. އަދި ވެނެޒުއޭލާ އަށް ނުހަނު ބޭނުން ޖެހިފައިވާ ފައިސާ އަހަރެމެން ފޯރުކޮށްދޭނަން،" ޓްރަމްޕް ވިދާޅުވި އެވެ.

މީގެ އިތުރުން، 1976 ވަނަ އަހަރު ވެނެޒުއޭލާގެ ތެލުގެ ސިނާއަތް ދައުލަތަށް ނެގި ނެގުމަށް އިޝާރާތް ކުރައްވައި ޓްރަމްޕް ވިދާޅުވީ، "އެމީހުން އަހަރެމެންގެ އަތުން ތެޔޮ އަތުލީ މީގެ އެތައް އަހަރެއް ކުރިން" ކަމަށާއި، މިހާރު ވެނެޒުއޭލާ އިން ދަނީ އެމެރިކާ އިން ބޭނުންވާ ހުރިހާ ކަމެއް ފަހިކޮށްދެމުން ކަމަށެވެ.

ވެނެޒުއޭލާގެ ރައީސް ބާރުގެ ބޭނުން ކޮށްގެން ހައްޔަރު ކުރުމަށް ފަހު، އެ ގައުމުގެ ތެލުގެ ވިޔަފާރި އާއި އާމްދަނީގެ މައްޗަށް ދާއިމީ ގޮތެއްގައި ބާރު ފޯރުވާނެ ކަމަށް އެމެރިކާ އިން ބުނި ބުނުމަކީ، އިގްތިސާދީ އަދި ސިޔާސީ ގޮތުން ގަދަބާރު ދެއްކުމުގެ އަމަލެއްގެ ގޮތުގައި ގިނަ ބަޔަކު ދެކެއެވެ. އދ. ގެ ތަޖުރިބާކާރުން ވެސް ވަނީ މިއީ ގާނޫނާ ހިލާފަށް ނުހައްގު ފައިދާ ހޯދުން ކަމަށް ބުނެ މިކަން ކުށްވެރިކޮށްފަ އެވެ.

އެމެރިކާގެ އެނާޖީ ޑިޕާޓްމަންޓުން ނެރުނު ބަޔާނެއްގައި ބުނެފައި ވަނީ، ވެނެޒުއޭލާގެ ތެޔޮ ދުނިޔޭގެ ބާޒާރުގައި ވިއްކުމުގެ މަސައްކަތް މިހާރު ފަށާފައިވާ ކަމަށާއި، އެއިން ލިބޭ ހުރިހާ އާމްދަނީ އެއް ޖަމާ ކުރާނީ ދުނިޔޭގެ މަގުބޫލު ބޭންކުތަކުގައި ހުރި އެމެރިކާގެ ބާރު ހިނގާ އެކައުންޓުތަކަށް ކަމަށެވެ. ވައިޓް ހައުސް އިން ބުނި ގޮތުގައި، މި ފައިސާ ހަރަދު ކުރާނީ އެމެރިކާ ސަރުކާރަށް ފެންނަ ގޮތެއްގެ މަތިން، އެމެރިކާގެ ރައްޔިތުންނާއި ވެނެޒުއޭލާގެ ރައްޔިތުންގެ ލާބައަށެވެ.

ރައީސް ޓްރަމްޕް އޭނާގެ "ޓްރުތް ސޯޝަލް" ޕްލެޓްފޯމް ގައި ލިޔުއްވާފައިވާ ގޮތުގައި، މި ތެޔޮ ވިއްކައިގެން ލިބޭ ފައިސާ ހަރަދުކުރަން ޖެހޭނީ ހަމައެކަނި އެމެރިކާގެ އުފެއްދުންތައް ގަތުމަށެވެ. އޭގެ ތެރޭގައި އެމެރިކާގެ ދަނޑުވެރިކަމުގެ އުފެއްދުންތަކާއި، ބޭހާއި، ސިއްހީ އާލާތްތަކުގެ އިތުރުން ވެނެޒުއޭލާގެ ކަރަންޓުވިއުގަ އާއި ހަކަތައިގެ ވަސީލަތްތައް ރަނގަޅުކުރުމަށް ބޭނުންވާ ސާމާނު ހިމެނެ އެވެ.

ހައްޔަރުކޮށްގެން ވެނެޒުއޭލާގެ ރައީސް މަދޫރޯ އާއި އޭނާގެ އަނބިކަނބަލުން އެމެރިކާ އަށް ގެންދިއުމަށް ފަހު މަދޫރޯގެ މައްޗަށް ނިއުޔޯކްގައި މަސްތުވާތަކެތީގެ ވިޔަފާރިކުރުމުގެ ދައުވާ އުފުލާފައިވީ ނަމަވެސް، އޭނާ އެކަންކަމަށް އިންކާރު ކުރައްވަ އެވެ. އޭނޭ ކުރިން ވެސް ވިދާޅުވަމުން ގެންދެވީ ވެނެޒުއޭލާގެ މައްޗަށް އެމެރިކާ އިން ބާރާ ނުފޫޒު ފޯރުވަމުން ގެންދަނީ އެ ގައުމުގެ ތެލުގެ މުއްސަނދިކަން އަތުލުމަށް ކަމުގައެވެ.