ސައުދީ އާއި ޤަތަރު ހައި ސްޕީޑު ރޭލުން ގުޅާލަނީ
ސައުދީ އަރަބިއާއާއި ޤަތަރުން ރިޔާޟާއި ދޯހާ ގުޅުވައިދޭ 785 ކިލޯމީޓަރުގެ ހައި ސްޕީޑް އިލެކްޓްރިކް ރޭލު ނެޓްވޯކް ތަަރައްގީ ކުރުމުގެ ތާރީޚީ އެއްބަސްވުމެއްގައި ސޮއިކޮށްފިއެވެ. މި ޕްރޮޖެކްޓުން ދެ ގައުމުގެ ޖީޑީޕީއަށް 115 ބިލިއަން ރިޔާލް އިތުރުކޮށް 30،000 ވަޒީފާގެ ފުރުސަތު ހޯދައިދީ 10 މިލިއަނަށްވުރެ ގިނަ މުސާފިރުންނަށް ފައިދާ ކުރާނެއެވެ.
ސައުދީ އަރަބިއްޔާ ގެ ވަލީއަހުދު މުހައްމަދު ބިން ސަލްމާން އާއި ގަތަރުގެ ޝެއިޚް ތަމީމް ބިން ހަމާދު އަލް-ތާނީ
ސައުދީ އަރަބިއްޔާ އާއި ޤަތަރުން ދެ ގައުމު ގުޅުވައިދޭ ހައި ސްޕީޑް އިލެކްޓްރިކް ރޭލު މަޝްރޫއު ގެ އުއެއްބަސްވުމެއް ގައި ސޮއިކޮށްފިއެވެ.
މި މަޝްރޫއު އިއުލާނު ކުރީ ހޯމަ ދުވަހު ރިޔާޟު ގައި ސައުދީ އަރަބިއްޔާގެ ވަލީއަހުދު ޕްރިންސް މުހައްމަދު ބިން ސަލްމާން އާއި ޤަތަރުގެ ޝައިޚް ތަމީމް ބިން ހަމަދު އަލް-ތާނީ ސައުދީ-ޤަތަރު ކޯޑިނޭޝަން ކައުންސިލްގެ ބައްދަލުވުމަކަށް ފަހުއެވެ.
ކިންގް ސަލްމާން އިންޓަނޭޝަނަލް އެއަރޕޯޓާއި ހަމަދު އިންޓަނޭޝަނަލް އެއަރޕޯޓް ގުޅުވައިދިނުމުގެ ތެރެއިން މި ރޭލުން ރިޔާޟާއި ދޯހާ ގުޅުވައިދޭނެ ކަމަށް ރިޕޯޓު ކޮށްފައި ވެއެވެ.
މި ޕްރޮޖެކްޓުން ދެ ގައުމަށް ވެސް ފައިދާހުރި ނަތީޖާތައް ލިބޭނެ ކަމަށް ލަފާކުރެވޭއިރު، ދެ ގައުމުގެ ޖީޑީޕީއަށް 115 ބިލިއަން ސައުދީ ރިޔާލް އިތުރުވެ 30،000 ވަޒީފާގެ ފުރުސަތު ހޯދައިދޭނެ ކަމަށް ލަފާކުރެވެއެވެ.
މި ޕްރޮޖެކްޓު ނިންމާލެވޭނީ ކުރިއަށް އޮތް ހަ އަހަރު ތެރޭގައި ކަމަށް ލަފާކުރެވެއެވެ.
މި ރޭލު ނެޓްވޯކުގެ ދިގުމިނުގައި 785 ކިލޯމީޓަރު ހުންނާނެ ކަމަށް ލަފާ ކުރެވޭ އިރު، ގަޑިއަކު 300 ކިލޯމީޓަރުގެ ބާރު މިނުގައި ދަތުރުކުރާނެ ކަމަށް ބުނެފައި ވެއެވެ. 10 މިލިއަނަށް ވުރެ ގިނަ ދަތުރުވެރިންނަށް މި ރޭލު ނެޓްވޯކުގެ ފަސޭހަ ލިބޭނެ ކަމަށް ބެލެވެ އެވެ.
ބައްދަލުވުމަށްފަހު ނެރުނު ގުޅިގެން ނެރުނު ބަޔާނެއްގައި ދެ ފަރާތުން މި އެއްބަސްވުމަށް މަރުހަބާ ކިޔާފައިވާއިރު، މި މަޝްރޫއަކީ ދެ ގައުމުގެ ތަރައްގީގެ ތަސައްވަރުގެ ލަނޑުދަނޑިތަކަށް ވާސިލު ކޮށްދޭ "އެންމެ ބޮޑު ސްޓްރެޓީޖިކް އިނިޝިއޭޓިވްތަކުގެ ތެރެއިން އެއް" އިނީޝިއޭޓިވް ކަމަށް ބުނެފައިވެ އެވެ.
