މި ސަރުކާރުން ހައުސިން ޔުނިޓްތަކަށް ވަރަށް ބޮޑަށް ދަނީ އިހުމާލު ވަމުން. ބަނދަރުގައި ތަރައްގީކުރި ޕީއެންސީ ބޭފުޅެއްގެ ވިޔަފާރި ޔުނިޓަކަށް ކަރަންޓާއި ނަރުދަމާގެ ޚިދުމަތް ފޯރުކޮށްދީފައިވޭ. މީގެ އިތުރުން އިހުސާން ވިދާޅުވީ ކޮޅުފުށީގެ ތަރައްގީ ވެސް މި ސަރުކާރާއެކު ހުއްޓިފައިވާ ކަމަށް.
މ. ކޮޅުފުށީގައި އިމާރާތް ކުރި ހައުސިންގ ޔުނިޓުތައް
މ. ކޮޅުފުށީގައި އިމާރާތް ކުރި 100 ހައުސިންގ ޔުނިޓުތައް ނިންމައި ރައްޔިތުންނާ ހަވާލު ކުރިފަހުން އަހަރަކަށް ވުރެ ގިނަ ދުވަސް ފާއިތުވެގެން ދިޔަ ނަމަވެސް މި ސަރުކާރުން ފެނާއި ކަރަންޓު އަދި ނަރުދަމާ ގުޅާ ދީފައިނުވާތީ ރައްޔިތުން ތިބީ ވަރަށް ބޮޑު ކަންބޮޑުވުމެއްގެ ތެރޭގައި ކަމަށް އެ ދާއިރާގެ އެމްޑީޕީ ގައުމީ މަޖިލިސް މެންބަރު މުހައްމަދު އިހުސާން ވިދާޅުވެއްޖެ އެވެ.
މައުލޫމާތު ލިބިފައިވާ ގޮތުގައި ކޮޅުފުށީގެ ހައުސިން ޔުނިޓްތައް 2024 ވަނަ އަހަރުގެ ތެރޭގައި ވަނީ ނިންމާފަ އެވެ. އަދި 2025 ވަނަ އަހަރުގެ ފެބްރުއަރީ މަހުގެ ތެރޭގައި އެ ޔުނިޓްތައް ރައްޔިތުންނާ ހަވާލު ކޮށްފައިވެ އެވެ.
ރާއްޖެޓީވީގެ ވައުދުނާމާ ޕްރޮގްރާމްގައި އިހުސާން ވިދާޅުވީ ކުރީގެ ރައީސް އިބްރާހިމް މުހައްމަދު ސޯލިހުގެ ސަރުކާރުގައި ކޮޅުފުށީ ރައްޔިތުން އެދުނު ގޮތަށް 100 ހައުސިން ޔުނިޓް ތަރައްގީ ކޮށްދީފައިވާ ކަމަށެވެ. ނަމަވެސް މިހާތަނަށް އެ ޔުނިޓްތަކަށް ފެނާއި ކަރަންޓު އަދި ނަރުދަމާ ގުޅައިދޭނެ ދުވަހެއް ނޭނގޭ ކަމަށާއި، ރައްޔިތުން ތިބީ ވަރަށް ބޮޑު ކަންބޮޑުވުމެއްގެ ތެރޭގައި ކަމަށެވެ. އަދި ޚިދުމަތްތައް ނުލިބޭތީ އެޔުނިޓްތަކަށް ދިރިއުޅުން ބަދަލު ނުކުރެވި ނިކަމެތިވަމުންދާ ކަމަށް އޭނާ ވިދާޅުވި އެވެ.
މީގެ އިތުރުން އިހުސާން ވިދާޅުވީ ހައުސިން ޔުނިޓްތަކަށް މިސަރުކާރުން ވަރަށް ބޮޑަށް އިހުމާލު ވަމުންދާ ކަމަށާއި، ނަމަވެސް މިފަހުން ކޮޅުފުށީ ބަނދަރުގައި ތަރައްގީ ކޮށްފައިވާ ޕީއެންސީއަށް ނިސްބަތްވާ ބޭފުޅެއްގެ ވިޔަފާރި ޔުނިޓަކަށް ފެނާއި ކަރަންޓުގެ ޚިދުމަތް ފޯރުކޮށްދީފައިވާ ކަމަށެވެ. މިއީ ވަރަށް ނާއިންސާފުން ކޮށްފައިވާ ކަމެއް ކަމަށް އޭނާ ވިދާޅުވި އެވެ.
ހައުސިން ޔުނިޓްތަކުގައި ދިރިއުޅުމަށް އެތަންތަނަށް ނުދެވޭ. އެކަންކަން ހާސިލް ނުވަނީ ފާއިތުވެގެން ދިޔަ ދެ އަހަރު ދުވަހުގެ ތެރޭގައި ދެއަހަރު ފާއިތުވެގެން ދިޔައިރު ވެސް އެތަންތަނަށް ބޭނުންވާނެ ކަރަންޓާ ނަރުދަމާ އެތަންތަނަށް ފޯރުކޮށް ދެވިފައިނެތުމުގެ ސަބަބުން. މިކަންބޮޑުވުމުގައި މިޝަކުވާގައި ރައްޔިތުން ތިއްބާ ބަނދަރު މަތީގައި އިމާރާތް ކުރެވުނު ވިޔަފާރި ޔުނިޓަކަށް ކަރަންޓާ ނަރުދަނާ ފޯރުކޮށްދީފަ ވެއްޖެ އެނގޭތޯ. މައުލޫމާތު ލިބޭ ގޮތުގައި މި ވިޔަފާރި ޔުނިޓަކީ ވެރިކަން ކުރާ ޕާޓީގެ ސްޓީއަރިން ކޮމެޓީގެ ބޭފުޅެއް. އެބޭފުޅަކަށް ނިސްބާތްވާ ތަނެއް.މުލަކު ދާއިރާގެ އެމްޑީޕީ ގައުމީ މަޖިލިސް މެންބަރު މުހައްމަދު އިހުސާން
ކޮޅުފުށީގެ 100 ހައުސިންގ ޔުނިޓަށް ފެނާއި ނަރުދަމާގެ ޚިދުމަތް ދިނުމަށް ބޭނުންވާ ވިއުގަ ގާއިމުކުރުމުގެ މަޝްރޫއު ފެނަކަ ކޯޕަރޭޝަން ހަވާލުކޮށް 23 ޑިސެންބަރު 2025 ގައި ވަނީ ސޮއި ކޮށްފަ އެވެ. ފެނަކަ އަށް މި މަޝްރޫއު ހަވާލުކުރީ 20 ހަފްތާގެ ތެރޭގައި މަސައްކަތް ނިންމާ ގޮތަށް ކަމަށެވެ. މި މަޝްރޫއުގެ އަގަކީ 11،435،789.59ރ. (އެގާރަ މިލިއަން ހަތަރުލައްކަ ތިރީސް ފަސްހާސް ހަތްސަތޭކަ އަށްޑިހަ ނުވަ ރުފިޔާ، ފަންސާސް ނުވަލާރި) އެވެ.
މީގެ އިތުރުން އިހުސާން ވިދާޅުވީ ކޮޅުފުށީގެ ތަރައްގީ ވެސް މިސަރުކާރާއެކު ހުއްޓިފައިވާ ކަމަށެވެ.
އެރަށް ހިއްކުމާއި، ރަށް ވަށައިގެން ދުއްވޭ ގޮތަށް ރިންގް ރޯޑެއް ތަރައްގީ ކޮށްދެއްވާނެ ކަމަށް ރައީސް ޑރ.މުހައްމަދު މުއިއްޒު ވައުދުވެވަޑައިގެންނެވި ނަމަވެސް މިމަޝްރޫއުތަކުގެ އަމަލީ އެއްވެސް މަސައްކަތެއް ކުރިއަށް ނުދާ ކަމަށް އޭނާ ވިދާޅުވި އެވެ.
