ހުޅުމާލޭގެ ކުރީގެ މެންބަރު އަލީ ނިޔާޒު ވިދާޅުވީ 2021 ގައި މުއިއްޒު މޭޔަރަކަށް އިންތިޚާބުވުމާއެކު ހުޅުމާލޭގެ މުނިސިޕަލް ޚިދުމަތް ކައުންސިލް ދަށަށް ބަދަލުކުރުމަށް ވާހަކަދެކެވުނު ކަމަށް. އެއްބަސްވުމަކުން އެކަން ކުރުމުގެ ބަދަލުގައި މުއިއްޒު ބޭނުންވީ ހުޅުމާލޭގެ އިހުތިސާސް އެއްކޮށް ކަމަށާ އެ ނޫން ގޮތަކަށް ހުޅުމާލޭގެ ކަންކަމާ ހަވާލުވެވަޑައިގަންނަވަން ބޭނުން ނުވާ ކަމަށް ވިދާޅުވި ކަމަށް ވެސް ނިޔާޒް ފާހަގަ ކުރެއްވި.
ރައްޔިތުންގެ މަޖިލީހުގެ ހުޅުމާލޭ ދާއިރާގެ ކުރީގެ މެންބަރު އަލީ ނިޔާޒު
ހުޅުމާލޭގެ މުނިސިޕަލް ޚިދުމަތް ދިނުން މާލެ ސިޓީ ކައުންސިލް އާއި ހަވާލު ކުރެއްވުމަށް ރައީސް ޑރ. މުހައްމަދު މުއިއްޒު ކުރައްވަން ޖެހިވަޑައިގަންނަވާނީ އެންމެ ފޯނު ކޯލެއް ކަމަށާ ނަމަވެސް އެމަނިކުފާނު އެކަން ނުކުރައްވަނީ ހަމަ ގަސްތުގައި ކަމަށް ރައްޔިތުންގެ މަޖިލީހުގެ ހުޅުމާލޭ ދާއިރާގެ ކުރީގެ މެންބަރު އަލީ ނިޔާޒު ވިދާޅުވެއްޖެ އެވެ.
އަންގާރަ ދުވަހު އެމްޑީޕީ އިން ބޭއްވި ހަރުގެ ޖަލްސާގައި ވާހަކަދައްކަވަމުން ނިޔާޒް ވަނީ ހުޅުމާލޭގެ މުނިސިޕަލް ޚިދުމަތް ދިނުން މާލެ ސިޓީ ކައުންސިލް އާއި ހަވާލު ނުކުރެވިގެން އުޅެނީ ކައުންސިލް އިން އެކަމަށް ބޭނުން ނުވާތީ ކަމަށް ވިދާޅުވެ ރައީސް މުއިއްޒު ދެއްކެވި ވާހަކަފުޅަށް ރައްދު ދެއްވާފަ އެވެ.
2019 ވަނަ އަހަރު ހުޅުމާލެ ވަކި ދާއިރާއެއްގެ ގޮތުގައި ރައްޔިތުންގެ މަޖިލީހުގައި ތަމްސީލު ކުރުމަށް އެ ދާއިރާގެ ރައްޔިތުން އިންތިޚާބު ކުރި ނިޔާޒް ވަނީ 19 ވަނަ މަޖިލީހުގައި ލާމަރުކަޒީ ކޮމިޓީ ވުޖޫވުމާއެކު އެ ކޮމިޓީގެ މުގައްރިރުކަން ވެސް ކުރައްވާފަ އެވެ. އަދި އޭރު ހުޅުމާލެ އާ ގުޅޭ ކަންކަން ވެސް މަޖިލީހުގައި ކުރައްވާފައި ވަނީ ވެސް ނިޔާޒް އެވެ.
ނިޔާޒް ވިދާޅުވީ 2021 ވަނަ އަހަރު މާލެ ސިޓީގެ މޭޔަރަކަށް މުއިއްޒު އިންތިޚާބު ވުމާއެކު ކައުންސިލާ ގުޅިގެން ހުޅުމާލޭގެ މުނިސިޕަލް ޚިދުމަތްތައް ކައުންސިލް ގެ ދަށަށް ބަދަލު ކުރުމަށް ވާހަކަ ދެކެވުނު ކަމަށެވެ. އެގޮތުން މަޖިލީހަށް ހުޅުމާލޭގެ އިހުތިސާސް ގެ މައްސަލައިގައި ވެސް އެންމެ ބޮޑަށް ޝަކުވާ ކުރެއްވި އެއް ބޭފުޅަކީ އޭރު މޭޔަރު ކަމުގައި ހުންނެވި މުއިއްޒު ކަމަށް ނިޔާޒް ވިދާޅުވި އެވެ.
ނިޔާޒް ވިދާޅުވީ ހުޅުމާލޭގެ މުނިސިޕަލް ޚިދުމަތްތައް ސިޓީ ކައުންސިލްގެ ދަށަށް ގެނައުމަށްޓަކައި ގާނޫނު އަސާސީ އަށް ބަދަލު ގެންނަން ނުޖެހޭ ކަމަށެވެ. އަދި ގާނޫނުގެ ތެރެއިން އެކަން ތިން ވަނަ ފަރާތަކުން ކުރާ ނަމަ ކުރަން ވާނީ ކައުންސިލާއެކު ވެވޭ އެއްބަސްވުމެއްގެ ދަށުން ކަމަށް ވެސް ނިޔާޒް ވިދާޅުވި އެވެ.
އަޅުގަނޑުމެން އޭރު ސަރުކާރުގަ ސަރުކާރުން މުނިސިޕަލް ޚިދުމަތް ދިނުމަށްޓަކައި ގާނޫނުގެ ތެރެއިން އެކަން ވެއްދުމަށްޓަކައި ޑރ. މުއިއްޒަށް އަޅުގަނޑުމެން ހުށަހެޅުން ހުށަހެޅިން. މުނިސިޕަލް ޚިދުމަތްތައް ތިންވަނަ ފަރާތުން ދިނުމަކީ ގާނޫނު ހުއްދަ ކުރާ ކަމެއް. އެހެން ނަމަވެސް އެކަން ކުރަން ވާނީ އެއްބަސް ވުމުގެ ތެރެއިން. ކައުންސިލާ އެއްބަސްވާ އެއްބަސްވުމެއްގެ ތެރެއިން. އެ އެއްބަސްވުމުގެ ޑްރާފްޓް އަޅުގަނޑުމެން މުއިއްޒަށް ހުށަހެޅިން. އެހެން ނަމަވެސް މުުއިއްޒާ ކައުންސިލް މެޖޯރިޓީ ގަބޫލުކުރީ އެއްބަސްވުމެއްގެ ތެރެއިން ކުރުމުގެ ބަދަލުގައި މުޅި ހުޅުމާލޭގެ އިހުތިސާސް އެއްްކޮށް ލިބިގެން ނޫން ގޮތަކަށް ތިމަންނާ މެން ހުޅުމާލެ އާ ހަވާލުވާ ކަމަށް ބޭނުމެއް ނެތޭ. އެކަމުގަ އަރައިރުންވެ އެމަނިކުފާނު ވަޑައިގަތީ ކޯޓަށް.ރައްޔިތުންގެ މަޖިލީހުގެ ހުޅުމާލޭ ދާއިރާގެ ކުރީގެ މެންބަރު އަލީ ނިޔާޒު
ނިޔާޒް ވިދާޅުވީ އެކަމުގައި ކޯޓުން ވެސް އެދުނީ ސަރުކާރާ މަޝްވަރާ ކުރުމަށްފަހު އެއްބަސްވުމަކަށް އައުމަށް ކަމަށެވެ. ނަމަވެސް މޭޔަރަކަށް ހުންނެވި މުއިއްޒު އެ މައްސަލަ އިސްތިއުނާފު ކުރައްވާ ވަޑައިގަތީ ހައި ކޯޓަށް ކަމަށާ މިއަދު ވެސް ހުޅުމާލޭ މުނިސިޕަލް ކަންކަން ކައުންސިލާ ހަވާލު ކުރުމަށް ކުރައްވަން ޖެހިވަޑައިގަންނަވާނީ އެންމެ ފޯނު ކޯލެއް ކަމަށެވެ. ނަމަވެސް އެކަން ނުކުރައްވަން އުޅެނީ ހަމަ ގަސްތުގައި ކަމަށް ނިޔާޒް ވިދާޅުވި އެވެ.
ހުޅުމާލެ މުނިސިލް ހިދުމަތް އެޗްޑީސީގެ ދަށުން އޮތުމުގެ ސަބަބުން ރައްޔިތުންގެ ގިނަ ހައްގުތަކެއް ގެއްލި ރައްޔިތުންނަށް ފަސޭހައިން ލިބެންޖެހޭ ޚިދުމަތްތައް ލިބުމުގައި ދަތިތަކެއް ކުރިމަތިވެފައިވާ ކަމުގެ ޝަކުވާ ހުޅުމާލެ ރައްޔިތުން ދަނީ ކެނޑި ނޭޅި ކުރަމުންނެވެ.
