ބޯހިޔާވަހިކަމަށް ޚާއްސަ ކުރި 2025 އަހަރު ރައްޔިތުންނަށް ޔަގީން ވެގެންދިޔައީ ލިބުނު ބޯހިޔާވަހިކަން ވެސް ލޫޓުވާލިކަން!

ރައީސް ޑރ.މުހައްމަދު މުއިއްޒުގެ ސަރުކާރުން 2025 ވަނަ އަހަރު ޕްރޮމޯޓް ކުރަމުންދިޔައީ ބޯހިޔާވަހިކަމުގެ އަހަރުގެ ގޮތުގަ އެވެ. ރިޔާސީ އިންތިޚާބުގެ ކެންޕޭން ދުވަސްވަރުން ފެށިގެން މިއަދާ ހަމައަށް ބޯހިޔާވަހިކަމާ ގުޅޭގޮތުން ވަރަށް ބޮޑެތި ހުވަފެން ތަކެއް ރައްޔިތުންނަށް އެމަނިކުފާނު ދަނީ ދައްކަމުންނެވެ. ބޯހިޔާވަހިކަމާ ގުޅޭގޮތުން އެކި ރަށްރަށުގައި އެކި ފަހަރުމަތިން ގިނަ ވައުދުތަކެއް ވެވަޑައިގެންނެވި އެވެ. އެވަރުން ނުފުދިގެން މިއަހަރުގެ ބަޖެޓު ވެސް ބޯހިޔާވަހިކަމަށް ޚާއްސަ ކޮށްފައިވާ ކަަމަށް ވިދާޅުވެ، އެގޮތަށް ބަޖެޓު ވެސް ޕްރޮމޯޓް ކުރި އެވެ.

ނަމަވެސް 2025 ވަނަ އަހަރު މިސަރުކާރަށް ބޯހިޔާވަހިކަމާ ގުޅުންހުރި އެންމެ މަޝްރޫއެއްގެ އަމަލީ މަސައްކަތް ފެށިފައިނުވެ އެވެ. ކުރީ ސަރުކާރުގައި ފަށާފައިވާ ބޯހިޔާވަހިކަމުގެ މަޝްރޫއުތަކުގެ މަސައްކަތްތައް ގިނަ ދުވަސްތަކަކަށް އޮތީ ހުއްޓުވާފަ އެވެ. ގުޅީފަޅާއި، ގިރާވަރުފަޅު ހިއްކުމުގެ އަމަލީ މަސައްކަތް ކުރިއަށް ނުދެ އެވެ. 2025 ވަނަ އަހަރުގެ ޑިސެންބަރު މަހު ހުޅުމާލެ ފޭސް-3 ހިއްކުމުގެ މަސައްކަތް ފެށި ނަމަވެސް މި މަޝްރޫއު އެއްކޮށް ނިންމާނެ ކަމަށް އެކިއެކި ތާރީޚުތައް ދީފައިވެ އެވެ. އަދި ކުރީ ސަރުކާރުގައި ނިންމާފައިވާ ގެދޮރުވެރިޔާ ފްލެޓުތައް ވެސް ލިބުނު ހުރިހާ ރައްޔިތުންނަށް ތަޅުދަނޑި ހަވާލު ކުރެވިފައިނުވާއިރު، ބިންވެރިޔާ ސްކީމުން ދޫކޮށްފައިވާ ގޯތިތައް ވެސް އޮތީ ވާނުވާގަ އެވެ. 

 2025 ވަނަ އަހަރަކީ ބޯހިޔާވަހިކަމުގެ ރަން ޒަމާނެއްގެ ފެށުން ކަމަށް މިސަރުކާރުން ބުނި ނަމަވެސް 28 ޑިސެންބަރު 2025 ގައި ދިވެހި ރައްޔިތުންނަށް ހާމަވެގެން ދިޔައީ ގެދޮރުވެރިޔާ ފްލެޓު ލިބުނު މީހުންގެ ތެރެއިން ގިނަ ބައެއްގެ އަތުން މިސަރުކާރުން ފްލެޓު އަތުލި ކަމެވެ. މީގެ ކުރިން ރަށުތެރޭގައި އެކިއެކި ގޮތްގޮތަށް އެވާހަކަތައް ދެކެވުނު ނަމަވެސް ސަރުކާރުން މިކަމަށް އެއްބަސްވެފައިނުވާތީ ހިޔާލު ތަފާތުވުން އޮތީ އުފެދިފަ އެވެ. މުޅި އަހަރު ތެރޭގައި ރައީސް މުއިއްޒުގެ އިތުރުން ހައުސިން މިނިސްޓަރު ޑރ. އަބްދުﷲ މުއްތަލިބު ވިދާޅުވަމުން ގެންދެވީ ފްލެޓާއި ގޯތި ދޭނެ ވާހަކަ އެވެ. ނަމަވެސް 2025 ވަނަ އަހަރު އެއީ ބޮޑު ދޮގެއްކަން ހާމަވެ، 450ށް ވުރެ ގިނަ ރައްޔިތުންގެ އަތުން ފްލެޓު އަތުލިކަން މިވަނީ ކަށަވަރު ކުރެވިފަ އެވެ. 

މީގެ އިތުރުން ބޯހިޔާވަކަމުގައި ރައީސް މުއިއްޒުގެ އެންމެ ބޮޑު ތަސައްވުރު ކަމަށްވާ ރަސްމާލެ މަޝްރޫއު ވެސް އޮތީ ފެއިލް ވެފަ އެވެ. ކުރީ ސަރުކާރުގެ ބޯހިޔާވަހިކަމުގެ މަޝްރޫއުތައް ހުއްޓުވުމަށްފަހު، އެމަނިކުފާނު ދައުރުގެ ފުރަތަމަ 2 މަސްތެރޭ ފެއްޓެވި މަސައްކަތްތަކުގެ ތެރޭގައި އަމަލީ މަސައްކަތް ފެށި ރަސްމާލެ ނިންމުމަށް ވެސް ގިނަ ތަރީހުތަކެއް ދެއްވި އެވެ.

18 ޑިސެންބަރު 2023 ގައި މަސައްކަތް ފަށައި ޖުމްލަ އަށް މަހުން ހިއްކަން ބުނި ރަސްމާލެ ހިއްކުމުގެ މަޝްރޫއުގައި ހިމެނެނީ ޖުމްލަ 1153 ހެކްޓަރުގެ ބިމެވެ. އަމަލީ މަސައްކަތް ފެށުމަށް ބޭއްވި ރަސްމިއްޔާތުގައި ރައީސް މުއިއްޒު ވިދާޅުވީ އަށް މަސް ދުވަހުން ރަސްމާލެ ހިއްކާ ނިމޭނެ ކަމަށެވެ.

ނަމަވެސް، އޭގެފަހުން 27 ޖުލައި 2024 ގައި ރައީސް މުއިއްޒު ވަނީ މި މަޝްރޫއު ނިންމުމަށް އިތުރު އަށް މަސް ބޭނުންވާ ކަމަށް ވިދާޅުވެފަ އެވެ. އޭގެފަހުން ވެސް މަސައްކަތް ކުރިއަށް ނުދެ އެވެ. އަދި އަހަރުގެ ރިޔާސީ ބަޔާން އިއްވަވަމުން ރައީސް މުއިއްޒު ވިދާޅުވީ 2025 ވަނަ އަހަރު ނިމުމުގެ ކުރިން ރަސްމާލެ ހިއްކާ ނިންމޭނެ ކަމަށެވެ. ނަމަވެސް މިހާތަނަށް ހިއްކިފައިވަނީ ގާތްގަނޑަކަށް 215 ހެކްޓަރު ބިމެވެ. މި މަޝްރޫއު އެއްކޮށް ހިއްކާ ނުނިމޭނެކަން ޔަގީންވުމާއެކު މިހާރު މިމަޝްރޫއު ނިންމާނެ ކަމަށް ބުނެފައިވަނީ 2027 ވަނަ އަހަރުގެ އޭޕްރީލް މަހުގެ ނިޔަލަށް ކަމަށެވެ.

މާލެ ސަރަހައްދުގެ ބޯހިޔާވަހިކަމުގެ އިތުރުން އަތޮޅުތެރޭގެ ހާލަތު ވެސް އޮތީ މި ގޮތަށެވެ. ކުރީ ސަރުކާރުގައި ފަށާފައިވާ ބޯހިޔާވަހިކަމުގެ މަޝްރޫއުތައް ވެސް ކުރިއަށް ނުގެންދެ އެވެ. ބައެއް ރަށްރަށުގައި އިމާރާތް ކޮށްފައިވާ ރޯ ހައުސްތަކާ ފްލެޓުތައް ހަލާކު ވާން ވަނީ ދޫކޮށްލާފަ އެވެ. މިފަހުން ބ.ތުޅާދޫ ރޯހައުސް އަދި ޅ.ހިންނަވަރުގެ ހައުސިން ޔުނިޓްތައް ވީރާނާ ވަމުންދާތީ އެކަމުގެ ކަންބޮޑުވުން ވެސް ފާޅު ކޮށްފައިވެ އެވެ.

ރާއްޖޭގެ އުތުރުގައި 20000 ހައުސިން ޔުނިޓް އަދި ދެކުނުގައި 20000 ހައުސިން ޔުނިޓް ތަރައްގީ ކުރުމަށް ރައީސް މުއިއްޒުގެ މެނިފެސްޓޯގައި ހިމަނުއްވާފައިވާއިރު، އެއްބަސްވުންތަކުގައި ސޮއި ކުރުމާއި، މަޝްރޫއުތަކަށް ކޮންޓްރެކްޓަރުން ހޯދުމަށް އިއުލާން ކުރުމަށްފަހު ބާތިލް ކުރުން ފިޔަވައި އެއްވެސް ކަމެއް ހިނގާފައިނުވެ އެވެ.

ރައީސް މުއިއްޒުގެ ސަރުކާރަށް ދެއަހަރަށް ވުރެ ގިނަ ދުވަސް ވެފައިވާއިރު، މިއީ ރައްޔިތުން ބޯހިޔާވަހިކަމުން މަހުރޫމް ވެގެން ދިޔަ ދެ އަހަރެވެ. ބޯހިޔާވަހިކަމަށް ޚާއްސަކުރި 2025 ވަނަ އަހަރުން ރައްޔިތުންނަށް ޔަގީން ކުރެވިގެން ދިޔައީ ރައްޔިތުންނަށް ލިބުނު ބޯހިޔާވަހިކަން ވެސް ސަރުކާރުން ލޫޓުވައިފި ކަމެވެ.