ރައީސްގެ ސިއްރު ބައްދަލުވުމެއް އީސީގެ ރައީސާއި އެކު، ދެން އިވުނީ ރިފަރެންޑަމްގެ ތުހުމަތުގެ އަޑު!

ލޯކަލް ކައުންސިލް އިންތިޚާބަށް ކުޑަތަން ވަމުން އަންނަ މި ދަނޑިވަޅުގައި، އިލެކްޝަންސް ކޮމިޝަން (އީސީ) ގެ ރައީސް މުހައްމަދު ޒާހިދު ރައީސް ޑރ.މުހައްމަދު މުއިއްޒު އާއި އެކު ސިއްރުން ބައްދަލުކުރެއްވުމެއް ބޭއްވުން ވެެގެން ދިޔައީ އާއްމުންނާއި ސިޔާސީ މައިދާނުގައި ހަރަކާތްތެރިވާ މީހުންގެ ހިތުގައި ވެސް އެތައް ސުވާލެއް އުފެދުނު ކަމަކަށެވެ. އެ ބައްދަލުވުމުގެ ބޭނުމާއި، ބައްދަލުވުމުގައި ދެކެވުނު ވާހަކަ އާއި ބައްދަލުވުމުގާއި ކަން ހިނގި ގޮތާއި މެދު އެތައް ސުވާލުތަކެއް އާއްމުންގެ ހިތުގައި އެބަހުއްޓެވެ.

ކޮމިޝަންގެ ރައީސް ދެއްވި ޖަވާބަކީ ކޮމިޝަނުން ކުރިއަށް ގެންދަން ރާވާފައިވާ ހޭލުންތެރި ކުރުމުގެ ޕްރޮގްރާމަކަށް ބޭނުންވާ ވަސީލަތްތައް ހޯދުމަށް ރައީސާއި ބައްދަލުކުރެއްވި ކަމަށް ވިދާޅުވެ ދެއްވި ޖަވާބެކެވެ. އެކަމަކު އެ ޖަވާބު ވެގެން ދިޔައީ ޖަވާބަކަށް ވުރެ ބޮޑަށް އުޒުރަކަށެވެ.  ނިމިދިޔަ ހަފްތާގެ އަންގާރަ ދުވަހު ރައީސް އޮފީހުގަ ބޭއްވި އެ ބައްދަލުވުމާއި މެދު އެންމެ ބޮޑަށް ސުވާލު އުފެއްދި އެއް ސަބަބަކީ އެ ބައްދަލުވުމަށް އީސީ ގެ ފަރާތުން ބައިވެރިވީ ޒާހިދު އެކަނި ކަމަށް ވުމެވެ. 

ކޮމިޝަންގެ އެހެން މެމްބަރުން ބައްދަލުވުމުގައި ބައިވެރި ނުވީ ސަބަބާއި މެދު ސުވާލުކުރުމުން ޒާހިދު ވިދާޅުވީ ޖަވާބަކީ އެއީ ކޮމިޝަންގެ މެމްބަރުންގެ މެދުގައި ވާހަކަދައްކައިގެން ނިންމި ނިންމުމެއްް ކަމަށެވެ. އެންމެ ރަނގަޅެވެ. އެއީ ވެސް ހަމަ ތެދެއްކަމަށް ބަލަންވީ އެވެ. އެކަމާއި މެދު ސުވާލުކުރުން ވެސް ވެގެން ދިޔައީ އީސީގެ ރައީސް ނިކަން ގަޔާ ނުވި ކަމަކަށެވެ.

"އަޅުގަނޑުމެން އެންމެން ވާހަކަ ދައްކާފާ އެގޮތައް ނިންމައިގެން ދިޔައީ. އޭގަ މައްސަލައެއް އެބަ އޮތްތޯ؟. އޭގަ މައްސަލަ އަކީ ކޮބާތޯ؟ ކޮމިޝަން ގެ އަމިއްލަ ނިންމުމެއް ނޫންތޯ އެއީ. ތިކަހަލަ ވާހަކަ ދެން ދެއްކުން ރަނގަޅެއް ނޫން އިނގޭތޯ. އަޅުގަނޑުމެން އަމިއްލަ އަށް ކޮމިޝަނުން ނިންމި ނިންމުމެއްގެ ތެރެއިން މިކަން ކުރިޔަށް ގެންދިޔައީ." މިއީ އެ މަނިކުފާނުގެ ވާހަކަ ހުރި މޭރުމެވެ.

ދެކަމެއް ފާހަގަކޮށްލާނަމެވެ. ކޮމިޝަންގެ ކަންކަން ކޮމިޝަނުން ނިންމުމުގެ ފުރިހަމަ ހައްގު ކޮމިޝަނަށް އޮންނާނެ އެވެ. އެކަމަކު އެއީ ކޮމިޝަންގެ އަމިއްލަ ކަމެއް ކަމަށް ބުނެ ފަރުޖައްސާލެވޭކަށް ނެތެވެ. އީސީގެ ރައީސަކީ ވެސް އަދި މުޅި ކޮމިޝަން އަކީ ވެސް ރައްޔިތުންގެ ޚާދިމުންނެވެ. އެހެންވީމައި އެތަނުގައި ހިނގާ ކޮންމެ ކަމަކާއި މެދު ރައްޔިތުން ސުވާލު ކުރާނެ އެވެ.

މި ބައްދަލުވުމާއި މެދު ސުވާލު އުފެދުނީ ވެސް އެ ސުވާލުތައް އިތުރުވީ ވެސް އީސީގެ ރައީސާއި ރައީސް އޮފީހުން އަމަލުކުރި ގޮތުންނެވެ. ނިކަން ވިސްނާށެވެ. އަންގާރަ ދުވަހު ޒާހިދު ރައީސް މުއިއްޒު އާ އެކު ވަކިން ބޭއްވި މި ބައްދަލުވުމުގެ އެއްވެސް މައުލޫމަތެއް އިލެކްޝަންސް ކޮމިޝަނުން ވެސް އަދި ރައީސް އޮފީހުން ވެސް އިސްވެ އެއްވެސް ޕްލެޓްފޯމެއްގައި ހިއްސާކޮށްފައި ނެތެވެ. މި ސަރުކާރަކީ ދެ މީހަކު އެއްތަނަކުން ބައްދަލުވެއްޖެއްޔާ ފޮޓޯ އާއި ވީޑިއޯ އިން މީސްމީޑިއާ ފުރާލާ ސަރުކާރެކެވެ. އާއްމު ގޮތެއްގައި ރައީސް މުއިއްޒު އެކިއެކި ފަރާތްތަކާ އެކު ބާއްވާ ބައްދަލުވުންތައް ފުޅާ ދާއިރާ އެއްގައި ރައީސް އޮފީހުގެ ވެބްސައިޓް މެދުވެރިކޮށް އަދި ސޯޝަލް މީޑިއާ ގެ ޒަރީއާ އިން ޕްރޮމޯޓު ކުރެ އެވެ. އެކަހަލަ އެއްވެސް ކަމެއް މި ބައްދަލުވުމާއި މެދު ނެތެވެ. ކުޑަމިނުން އާދައިގެ ފޮޓޯ އެއްހާ މިންވަރު ވެސް ނަގާ ނުލަނީ އެވެ. މިއީ އީސީ އާއި ރައީސް އޮފީހުގެ ތޮބީއަތަށް ބެލި އަސް ފަރިތަ ކަމެއް ނޫނެވެ.

ދެން އޮތީ ބައްދަލުކުރި ސަބަބެވެ. މި ބައްދަލުވުމާ ގުޅޭގޮތުން ރާއްޖެ އެމްވީ އިން ސުވާލުކުރުމުން ޒާހިދު ވިދާޅުވީ، ރައީސް މުއިއްޒު އާ ވަކިން ބައްދަލު ކުރެއްވީ ރައްޔިތުން ވޯޓު ގެ ކަންކަމާއި ޑިމޮކްރެޓިކް ވެއްޓަށް ހޭލުންތެރިކަން އިތުރުކުރުމަށް ރާވާފައިވާ ކަންކަން ރައީސް މުއިއްޒު އާއި ހިއްސާކޮށް އެކަމަށް ބޭނުންވާ ވަސީލަތްތައް ހޯދުމާގުޅޭ މަޝްވަރާތައް ކުރުމަަށް ކަމަށެވެ.

މިއީ ދެކޮޅު ޖެހޭ ވާހަކަ އެއް ނޫނެވެ. އހެނީ މިނިވަން މުސްތަގިއްލު ކޮމިޝަނެއް ގެ ގޮތުގައި ހިންގާ އީސީ އަށް ބޭނުންވާ ވަސީލަތްތަކަކީ ރައްޔިތުންގެ މަޖިލީހުން ފާސް ކުރާ ބަޖެޓުގެ ތެރެއިން ހޯދާ ކަންކަމެވެ. އެކަމުގައި ރައީސް އޮފީހުން ފޯރުކޮށްދޭން ޖެހޭ އެއްވެސް ދައުރެއް އަދި އެހީތެރިކަމެއް ގާނޫނުން ސާފު ނުވާކަން ފާހަގަ ކުރެވެ އެވެ. އެހެންކަމުން އެއީ ރައީސްގެ ފައިންޕުޅު ދެކިލަން ދާން ޖެހޭ ސަބަބެއް ނޫނެވެ. 

މި ބައްދަލުވުން ބޭއްވިތާ މާ ގިނަ ދުވަހެއް ނުވެ އެވެ. 2026 ގެ ލޯކަލް ކައުންސިލް އިންތިހާބުގެ ވޯޓާ އެކު، ރައްޔިތުންގެ ހިޔާލު ހޯދުމަށް ވޯޓެއް ނުވަތަ ރިފަރެންޑަމެއް ނެގުމަށް ސަރުކާރުން މަސައްކަތް ކުރަމުންދާކަމުގެ އަޑު ފެތުރެން ފަށައިފި އެވެ. އިދިކޮޅު އެމްޑީޕީގެ ޕީޖީ ގްރޫޕްގެ ބައެއް މެމްބަރުން ކުރާ ބައެއް ތުހުމަތުތަކަށް ބަލާލާނަމެވެ.  ހުޅުމާލެ ދެކުނު ދާއިރާގެ މެންބަރު އަހުމަދު ޝަމްހީދު ތުހުމަތުކުރައްވާ ގޮތުގައި ސަރުކާރުން މަސައްކަތް ކުރަނީ ރިޔާސީ އިންތިހާބާއި މަޖުލިސް އިންތިހާބު އެއްކޮށްލުމާއި މެދު ފެންނަ ގޮތެއް ހޯދަން ވޯޓެއް ނެގުމަށެވެ. އަދި  ރައްޔިތުންގެ މަޖިލީހުގެ ދައުރު ކުރުކޮށްލަން ރިފަރެންޑަމެއް ނަގަން ނިންމާފައި ވާ އިރު މިއީ ސިއްރިއްޔާތުގައި ކުރާ ކަމެއް ކަމަށް ތުހުމަތުކޮށްފައި ވެ އެވެ. މި ކަމުގެ ބޭނުމަކީ އިންތިހާބުގެ ނުފޫޒު ބޭނުންކޮށްގެން އޮޅުވާލާ  އެކަންކަމާއި އެކު އިންތިޚާބު ކާމިޔާބުކުރުން ކަމަށް އެ މެމްބަރު ދެކެވަޑައިގަންނަވަ އެވެ. 

ހަމައެެހެންމެ  ކެންދޫ ދާއިރާގެ މެންބަރު މައުރޫފް ޒާކިރު ވެސް ވަނީ ސަރުކާރުން ހީލަތްތެރި ރޭވުންތައް ރާވާކަމަށް ފާހަގަކުރައްވާފަ އެވެ.  އިންތިހާބުތައް އެއްކޮށްލައި ރިޔާސީ ދައުރު ދަންމާލުމަށް ސަރުކާރުން މަސައްކަތް ކުރާ ކަމަށް އޭނާ ތުހުމަތު ކުރެއްވި އެވެ. ވޯޓު ގަތުމާއި، ދޮގު ވައުދުން މުޅި އިންތިޚާބު ގަޑުބަޑު ކުރާނެ ކަމަށް މި މެމްބަރުން ޤަބޫލުކުރެ އެވެ. 

ދެކެވެމުންދާ ވާހަކަތަކަށް ބަލާ އިރު ސަރުކާރުގެ ވިސްނުމަކީ ރިޔާސީ އިންތިހާބާއި މަޖިލިސް އިންތިހާބު އެއް ކޮށްލުމެވެ.  ހަރަދު ކުޑަކުރުމުގެ ނަމުގައި ކުރާ މި ކަމަކީ  ސިޔާސީ ނުފޫޒު ފޯރުވުމަށް މަގުފަހިކުރުމަށް ކުރާ ކަމެކެވެ. އީސީގެ ރައީސް އާއި އެކު ސިއްރު ބައްދަލުވުމެއް ބޭއްވި ފަހުން މިފަދަ ވާހަކަތައް ފެންމަތިވުމަކީ އީސީ އިން ވެސް އަދި ރައީސް އޮފީހުން ވެސް އެކަމުގައި ހަގީގަތެއް އޮތްތޯ ނުވަތަ ނެތްތޯ އަމިއްލަ އިސްނެގުމުގައި ސާފުކޮށްދޭން ޖެހޭނެ ކަމެކެވެ. . ސަރުކާރުގެ ކަންކަން ހިނގާ ގޮތަށް ބަލާ އިރު، އަޑެއް ކިއްޔާ އޮތީ ރެނދެއް ލާފަ އެވެ. އެހެންވީމަ އެއީ ވެސް ނުވާނެ ކަމެއް ކަމަށް ބެލެވޭކަށް ނެތެވެ. އެހެންވީމަ އެންމެ ރަނގަޅު ގޮތަކީ މި ކަމުގެ ތެދުދޮގު ސަރުކާރުން އިސްވެ ސާފުކޮށް ދިނުމެވެ.