އެމެރިކާގެ ރައީސް ޑޮނަލްޑް ޓްރަމްޕް އާއި ވެނެޒުއެލާގެ ރައީސް ނިކޮލަސް މަދޫރޯ، ފޯނުން ގުޅުއްވައިގެން މަޝްވަރާތައް ކުރިއަށް ގެންދަވައިފި އެވެ.

ނިއު ޔޯކް ޓައިމްސް ގައި ރިޕޯޓު ކޮށްފައިވާ ގޮތުގައި ޓްރަމްޕް އާއި މަދޫރޯ މަޝްވަރާ ކުރައްވާފައި ވަނީ މިދިޔަ ހަފުތާގެ ތެރޭގަ އެވެ. އެ މަޝްވަރާގައި ވަނީ، އެމެރިކާގައި ޓްރަމްޕް އާއެކު ބައްދަލު ކުރެއްވުމާ ގުޅޭ ގޮތުން މަޝްވަރާ ކުރައްވާފައި ކަމަށް ވެސް ބުނެފައިވެ އެވެ.

ޓްރަމްޕް އާއި މަދޫރޯއާ ދެމެދު ގިނަ ދުވަސް ތަކެއް ވަންދެން ނުތަނަވަސްކަމާއި، ދެކޮޅުވެރިކަން އޮތުމުގެ ސަބަބުން، ދެ ރައީސުންގެ މި ފޯނު ކޯލަކީ ވަރަށް މުހިންމު މަޝްވަރާ ތަކެއްގެ ގޮތުގައި މާހިރުން ވަނީ ސިފަ ކޮށްފަ އެވެ. ރިޕޯޓު ތަކުގައި ބުނެފައިވާ ގޮތުން އެ މަޝްވަރާ ތަކުގައި އެމެރިކާގެ ސެކްރެޓަރީ އޮފް ސްޓޭޓް މާކޯ ރޫބިއޯ ވެސް ވަނީ ބައިވެރިވެ ވަޑައިގެންފަ އެވެ.

ދެ ރައީސުންގެ މި ފޯނު ކޯލު މަޝްވަރާތައް ކުރިއަށް ގެންގޮސްފައި ވަނީ އެމެރިކާ އިން ކެރީބިއަން ސަރަހައްދަށް ގިނަ އަދަދެއްގެ ސިފައިންގެ ބާރުތައް ވެސް ފޮނުވަމުން އަންނަ ވަގުތެއްގަ އެވެ. މި ބާރު ތަކުގެ ތެރޭގައި ދުނިޔޭގެ އެންމެ ބޮޑު އެއާ ކްރާފްޓް ކެއިއާ ވެސް ހިމެނޭ ކަމަށް ބުނެފައިވެ އެވެ.

އެމެރިކާ އިން ބުނެފައިވާ ގޮތުގައި ސިފައިންގެ ބާރުތައް ފޮނުވުމުގެ މައިގަނޑު މަޤުސަދަކީ މަސްތުވާ ތަކެތީގެ ވިޔަފާރި ހުއްޓުވުމަށެވެ. ނަމަވެސް، ވެނެޒުއެލާ އިން ބުނެފައި ވަނީ އެ ޙަރަކާތުގެ ފަހަތުގައި އޮތީ އެ ޤައުމުގެ ރައީސް މަދޫރޯގެ ސަރުކާރު ބަދަލު ކުރުމުގެ ނިޔަތް ކަމަށެވެ. ނިއު ޔޯކް ޓައިމްސްގެ މި ރިޕޯޓާ ގުޅިގެން، އެމެރިކާގެ ރިޔާސީ ގަނޑުވަރު ވައިޓް ހައުސް އިން މިހާތަނަށް އެއްޗެއް ބުނެފައި ނެތެވެ.

މިއަހަރުގެ ސެޕްޓެމްބަރު މަހުގެ ފަހު ކޮޅުން ފެށިގެން އެމެރިކާގެ ސިފައިން ވަނީ ކެރީބިއަން ކަނޑާއި، އިރުމަތީ ޕެސިފިކް ކަނޑުގައި ވެނެޒުއެލާއާ ގުޅުން ހުރި މަސްތުވާ ތަކެތީގެ ވިޔަފާރީގައި ބޭނުން ކުރާ ކަމަށް ބުނެ 20 އަށް ވުރެ ގިނަ ބޯޓަށް ހަމަލާ ދީފަ އެވެ. މި ހަމަލާ ތަކުގައި 80 އަށް ވުރެ ގިނަ މީހުން މަރުވެފައިވާ ކަމަށް ވެސް ވަނީ ރިޕޯޓު ކޮށްފަ އެވެ.

މަސްތުވާ ތަކެތީގެ ވިޔަފާރި ކުރާ ކަމަށް ބުނެ އެމެރިކާ އިން ބޯޓު ތަކަކަށް ހަމަލާ ދިން ނަމަވެސް، އެ ބޯޓުތައް މަސްތުވާ ތަކެތީގެ ވިޔަފާރީގައި ބޭނުން ކުރި ކަމުގެ އެއްވެސް ހެއްއެއް، ނުވަތަ އެމެރިކާ އަށް ގެއްލުންވާ ފަދަ އެއްވެސް ކަމެއް ކުރި ކަމުގެ ހެއްކެއް ވެސް އެ ޤައުމަށް ދެއްކިފައި ނުވެ އެވެ. އެމެރިކާ އިން ދެމުން އަންނަ މި ހަމަލާތަކާއި، ސިފައިންގެ ބާރުތައް އިތުރު ކުރުމުގެ ސަބަބުން ސަރަހައްދީ ފެންވަރުގައި ވަނީ ނުތަނަވަސްކަން އިތުރުވެފަ އެވެ.

ޓްރަމްޕް އާއި މަދޫރޯގެ ފޯނު ކޯލު މަޝްވަރާތަކާ ގުޅިގެން މާހިރުން ބުނެފައި ވަނީ، އެކަމުގެ ސަބަބުން ދެ ޤައުމުގެ ދެ މެދުގައި ވާހަކަ ދެއްކުމަށް ފުރުސަތެއް ހުޅުވިދާނެ ކަމަށެވެ. ނަމަވެސް، ސަރަހައްދުގައި އެމެރިކާގެ ސިފައިން އިތުރު ވަމުން ދިޔުމަކީ، ދެ ޤައުމުގެ ދެ މެދުގައި އޮތް ނުތަނަވަސްކަން ހައްލުވާނެ ކަމަކަށް ނުބެލެވެ އެވެ.