ޓްރަމްޕް އާއި ޕުޓިންގެ ބައްދަލުވުން ކެންސަލް ކުރީ، ރަޝިޔާ އިން ފޮނުވި މެމޯއެއްގެ ސަބަބުން

އެމެރިކާގެ ރައީސް ޑޮނަލްޑް ޓްރަމްޕް އާއި، ރަޝިޔާގެ ރައީސް ވުލަޑިމިއަރ ޕުޓިން ބައްދަލު ކުރަން ހަމަޖެހިފައި އޮތް ދެ ވަނަ ސަމިޓު ކެންސަލް ކުރީ، ރަޝިޔާ އިން ފޮނުވި މެމޯއެއްގެ ސަބަބުން ކަމަށް ރިޕޯޓު ކޮށްފި އެވެ.

ފައިނޭންޝަލް ޓައިމްސް ނޫހުން ހުކުރު ދުވަހު ރިޕޯޓު ކޮށްފައިވާ ގޮތުގައި، ރަޝިޔާ އިން ޔުކްރެއިންއާ ގުޅޭ ގޮތުން ކަނޑައެޅި ހަރުކަށި ޝަރުތު ތަކަށް އެމެރިކާ އިން އެއްބަސް ވާން ބޭނުން ނުވެ އެވެ. އެ ސަބަބާ ހުރެ، ބުރާސްފަތި ދުވަހު ބާއްވަން ހަމަޖެހިފައި އޮތް ބައްދަލުވުން ކެންސަލް ކުރީ ކަމަށް ރިޕޯޓު ކޮށްފައިވެ އެވެ.

ބައްދަލުވުން ކެންސަލް ކުރަން ނިންމީ ރަޝިޔާގެ ފޮރިން މިނިސްޓަރު ސާގޭ ލަވްރޮވް އާއި، އެމެރިކާގެ ސެކްރެޓަރީ އޮފް ސްޓޭޓް މާކޯ ރޫބިއޯއާ މެދު ކުރިއަށް ގެންދިޔަ މަޝްވަރާތަކަށް ފަހު އެވެ. އެގޮތުން، ފޯނުން ގުޅުއްވައިގެން ދެ ބޭފުޅުން މަޝްވަރާ ކުރައްވާފައިވާާއިރު، އެ މަޝްވަރާ އަކީ ވަރަށް އުނދަގޫ މަޝްވަރާ ތަކެއް ކަމަށް ވެސް ވަނީ ސިފަ ކޮށްފަ އެވެ.

އެކަމާ ގުޅޭ ގޮތުން އެމެރިކާގެ ރިޔާސީ ގަނޑުވަރު ވައިޓް ހައުސް އިން ވަކި އެއްޗެއް ބުނެފައި ނުވާއިރު، ރަޝިޔާގެ ރިޔާސީ ގަނޑުވަރު ކްރެމްލިން އިން ވެސް ވަކީ އެއްޗެއް ބުނެފައި ނުވެ އެވެ. ރަޝިޔާ ސަރުކާރުގެ އޮފިޝަލުންގެ ބަހެއް ހޯދުމަށް ކުރި މަސައްކަތް ވެސް ކާމިޔާބު ވެފައި ނުވާ ކަމަށް ވަނީ ރިޕޯޓު ކޮށްފަ އެވެ.

ޓްރަމްޕް އާއި ޕުޓިންގެ ދެ ވަނަ ސަމިޓު ކުރިއަށް ގެންދަން ރާވާފައި އޮތީ ހަންގޭރީގެ ވެރި ރަށް، ބުޑަޕެސްޓުގަ އެވެ. ނަމަވެސް، ޕުޓިން އާއެކު ބޭކާރު ބައްދަލުވުމެއް ބާއްވަން ބޭނުންފުޅު ނުވާ ކަމަށް ވިދާޅުވެ، ޓްރަމްޕް ވަނީ އެ ބައްދަލުވުން ކެންސަލް ކުރައްވައިފަ އެވެ. އޭރު ހެންގޭރީ އިން ވަނީ، އެ ޤައުމުގައި ޓްރަމްޕް އާއި ޕުޓިންގެ ދެ ވަނަ ސަމިޓު ބާއްވަން ތައްޔާރު ކަމަށް ވެސް ހާމަ ކޮށްފަ އެވެ.

މީޑިއާ ތަކުގައި ބުނެފައިވާ ގޮތުން ބުޑަޕެސްޓުގައި ދެ ވަނަ ސެމިޓެއް ބާއްވަން ޓްރަމްޕް އާއި ޕުޓިން އެއްބަސްވެފައި ވަނިކޮށް، ރަޝިޔާ އިން ވަނީ އެމެރިކާ އަށް މެމޯއެއް ފޮނުވައިފަ އެވެ. އެ މެމޯގައި ޕުޓިން ބުނެފައި ވަނީ، ހަނގުރާމައިގެ މައްސަލަ ހައްލު ކުރުމަށް ބޭނުންވާ މައިގަނޑު ސަބަބުތައް ކަނޑައަޅާ ކަމަށާއި، އެ ޝަރުތުތައް ފުރިހަމަ ކުރަން ޖެހޭ ކަމަށެވެ.

ރަޝިޔާ އިން ކަނޑައަޅާފައިވާ ޝަރުތު ތަކުގެ ތެރޭގައި ޔުކްރެެއިންގެ ސަރަހައްދުން ބައެއް ދޫކޮށްލުމާއި، ޔުކްރެއިންގެ ސިފައިންގެ އަދަދު ބޮޑު ތަނުން މަދު ކުރުން އަދި ޔުކްރެއިން އިން ނޭޓޯ އަށް ނުދާނެ ކަމުގެ ޔަގީންކަން ދިނުން ހިމެނެ އެވެ. ނަމަވެސް، ރަޝިޔާ އިން ކަނޑައަޅާފައިވާ މި ޝަރުތު ތަކަކީ އެއްވެސް އިރެއްގައި ޔުކްރެއިން އިން ޤަބޫލު ކޮށްފައިވާ ކަންކަމެއް ނޫނެވެ.

ރޫބިއޯ އާއި ލަވްރޮވް ފޯނު މެދުވެރިކޮށް ކުރި މަޝްވަރާ ތަކަށް ފަހު، ރަޝިޔާ އިން އެއްވެސް ވަރަކަށް މަޝްވަރާ ތަކަށް ތައްޔާރު ނުވާ ކަމަށް ރޫބިއޯ ވަނީ ޓްރަމްޕް އަށް ދަންނަވައިފަ އެވެ. މިކަން ރިޕޯޓު ކޮށްފައި ވަނީ ފައިނޭންޝަލް ޓައިމްސްގަ އެވެ.