24 ގަޑި އިރު ނުވަނީސް ސިޔާސަތު އުނބަށް! އެކަނިވެރި މައިންގެ އިހުސާސްތައް ސަރުކާރަށް ވަނީ ޖޯކަކަށް؟
ރައީސް މުއިއްޒު އެކަނިވެރި މައިންނާއި ބަފައިންގެ އެލަވަންސް ބޮޑުކުރައްވާނެ ކަމަށް ވިދާޅުވުމުން އެ ބެލެނިވެރިން ތިބީ ހިތްހަމަޖެހިގެން. ބުރާސްފަތި ދުވަހު އެލަވަންސް 15000 ރުފިޔާ އަށް އިތުރުކުރަން ގަވާއިދަށް އިސްލާހު ގެނެސް 24 ގަޑިއިރު ތެރޭގައި އެ ސިޔާސަތު އުނބަށް ޖަހައި 12000 ރުފިޔާ އަށް ކުޑަކުރުންވީ އެ ބެލެނިވެރިންނަށް ކުރި މަލާމާތަކަށް.
ސަރުކާރުން 24 ގަޑިއިރު ތެރޭގައި އެލަވަންސް އިތުރުކުރުމުގެ ސިޔާސަތު އުނބަށް ޖެހުމުން، ސަރުކާރުގެ ލިޔެކިޔުންތަކަށް ބަލަހައްޓައިގެން ހިތާމަކުރާ އެކަނިވެރި މައެއް.
ދައުލަތުގެ ބަޖެޓުން އެކަނިވެރި މައިންނާއި ބަފައިންނަށް ދޭ އިނާޔަތަކީ ހަމައެކަނި އިނާޔަތެއް ނޫނެވެ. އެއީ އެ ބެލެނިވެރިންނަށް ދިރިއުޅުމުގައި ހިންދެމިލަން ލިބޭ ކުޑަކުޑަ އިނާޔަތެކެވެ. ދިރިއުޅުމުގެ ކަންކަން ދަރިންނާއި އެކު ފަރުޖައްސާލަން ލިބޭ ވަރަށް ކުޑަ މިންވަރެއްގެ އެހީއެކެވެ.
އެ އިނާޔަތް ބޮޑުވުމަށް އެތައް ބަޔަކު ތިބީ އެދިގެންނެވެ. 2026 ވަނަ އަހަރުގެ ޖެނުއަރީ މަހުން ފެށިގެން އެކަނިވެރި މައިންނާއި ބަފައިންގެ އެލަވެންސް ބޮޑުކުރައްވާނެ ކަމަށް ރައީސް މުހައްމަދު މުއިއްޒު އޮކްޓޯބަރު މަހު ވިދާޅުވުން ވެގެން ދިޔައީ އެ ބެލެނިވެރިންނަށް ލިބުނު ނިކަން އުފާވެރި ޚަބަރަކަށެވެ. އެ ހިސާބުން ފެށިގެން އެ ބެލެނިވެރިން ތިބީ އެ ވައުދުގައި ހަގީގީ ކުލަ ޖެހޭނެ ދުވަހަކަށް އިންތިޒާރުކޮށްގެންނެވެ،
ކަންމިހެން އޮތްވާ އެކަނިވެރި މައިންގެ އެލަވަންސް 15،000 ރުފިޔާ އާއި ހަމައަށް ދެވޭނެހެން ބުރާސްފަތި ދުވަހު ގަވާއިދަށް އިސްލާހު ގެނައެވެ. އެކަނިވެރި މައިން ތިބީ ވަރަށް ހިތްހަމަޖެހިގެންނެވެ. އެކަނިވެރި މައިން އުފުލާ ތަކުލީފަށް މިފަދަ އެލަވަންސް އެއް ލިބުމުން ރާހަތެއް ލިބޭނެ ކަމަށް އުންމީދު ކޮށް އެ ވެރިން ތިބީ ނިކަން ހިތްހަމަޖެހިގެންނެވެ. އެކަމަކު އެ އުފާ ވެގެން ދިޔައީ ކުރު އުފަލަކަށެވެ.
އެކަނިވެރި މައިންގެ އެލަވަންސް ބޮޑުކުރިތާ އެންމެ 24 ގަޑި އިރު ތެރޭ އެ ސިޔާސަތު އުނބަށް ޖަހައިފި އެވެ. އުސޫލު ބަދަލުކޮށް މިހާރު އޮތް ގޮތުން ނަމަ އެންމެ ގިނައިން އެ އިނާޔަތް ދެވޭ އަދަދު 12،000 ރުފިޔާ އަށް ކުޑަ ކުރީ އެވެ. މި ބަދަލު ގެނައިކަން އިއުލާންކޮށް ނޭޝަނަލް ސޯޝަލް ޕްރޮޓެކްޝަން އެޖެންސީ (އެންސްޕާ) އިން ވަނީ އެކަން އިއުލާން ކޮށްފަ އެވެ.
އެކަނި ދަރިން ބަލަހައްޓާ މަޔަކަށް ނުވަތަ ބަފަޔަކަށް ދައުލަތުން ދޭ އެހީ ބޮޑު ކުރުމުގެ ވާހަކަ އަކީ އެތައް ބައެއްގެ ޖަޒުބާތުތަކާއި ގުޅިފައިވާ ކަމެކެވެ. އެތައް އާއިލާ އަކާއި ގުޅިފައިވާ ކަމެކެވެ. ކަން މިހެން އޮތް އިރު އިރު އިރުކޮޅާ ކުޅޭ ޗަރުކޭހެއް ހެން މި އެލަވަންސް ބަދަލުކުރުމަކީ އެ ބެލެނިވެރިންގެ އިހުސާސްތަކަށް ކުރެވޭ މަލާމާތެކެވެ. އެއީ އެ ވެރިންގެ ހާލަތަށް ނޭނގި ނަމަވެސް ހަޖޫޖެހުމެވެ. މިފަދަ ހައްސާސް ކަންކަމުގައި ސަރުކާރުން ތަންކޮޅެއް ބޮޑަށް ސީރިއަސް ވާން ޖެހެ އެވެ. ބައެއްގެ ނާޒުކު ޖަޒުބާތުތައް ގުޅިފައިވާ ކަމެއް ނިންމުގައި ވެސް މިއަދު އެއް ގޮތް، މާދަމާ އަނެއް ގޮތް ގެންގުޅޭ އުސޫލު ވަރިހަމަކުރުން ނިމުމަކަށް ގެންނަން ވެއްޖެ އެވެ.
ސަރުކާރަކުން ނިންމާ ކަންކަން އުނބަށް ޖެހުމުގައި މިއަށް ވުރެ ކުރީގައި އޮތް ސަރުކާރެއް ނެތެވެ. އެއްވެސް ސިޔާސަތެއް އިއުލާން ކުރުމަށް ފަހު، އެ ސިޔާސަތު ބޮލާލާ ނުޖަހާނެ ކަމުގެ އެއްވެސް ޔަޤީންކަމެއް ނޯވެ އެވެ. ވާނީ އެހެން ނޫންތޯއެވެ. އެއީ އެލަވަންސަކަށް ވިޔަސް، އުސޫލަކަށް ވިޔަސް، އިދާރީ މެމޯއަކަށް ވިޔަސް ކަން ހިނގަނީ މިހެންނެވެ. މިހާރު ދިވެހިން ހައިރާން ވާނީ ސަރުކާރުން ކުރާ ކަމެއް ދަމަހައްޓާ ހާލަތުގަ އެވެ. އެ ނޫން ހުރިހާ ކަމެއްގައި ވެސް ފެންނަނީ ސަރުކާރުގެ އުނބަށް ޖެހުމާއި ކުރިން ބުނާ ވާހަކަ ކެންސަލްކުރުމުގެ ސަޤާފަތް ދަމަހައްޓާ މަންޒަރެވެ.
