އެންމެ ދެ ދުވަސް ތެރޭގައި އެހީ ދޭނެ މީޑިއާތައް ނިންމީ ރަނގަޅަށް
މިދިޔަ ހަފްތާގައި އާއްމުކުރި މީޑިއާ ގްރާންޓްގެ އާ އުސޫލުގެ ދަށުން 41 މީޑިއާއަކަށް އެހީ ދިނުމަށް ނިންމާފައި ވާއިރު، އެހީއަށް އެދި ހުށަހެޅުމަށް ދިނީ 3 ދުވަހުގެ މުއްދަތެއް. މުއްދަތު ހަމަވިތާ 2 ދުވަހުގެ ތެރޭގައި މީޑިއާ ކޮމިޝަނުން އެހީލިބޭ މީޑިއާތައް ހާމަކުރުމުން އާންމުންގެ ފާޑުކިޔުމާ ކުރިމަތިލާން ޖެހުނު.
ޔޫތު މިނިސްޓަރ އިބްރާހިމް ވަހީދު (އަސްވާޑް)
އެއް ފަހަރާ ފައިސާ ގެ އެހީ ދޭ ގޮތަށް ހަމަޖައްސާ އެކުލަވާލި މީޑިއާ ގްރާންޓްގެ އާ އުސޫލުގެ ދަށުން, 41 މީޑިއާ އަކަށް އެހީ ދިނުމަށް އެންމެ ދެ ދުވަސް ތެރޭގައި ނިންމި ނިންމުމަކީ، ރަނގަޅަށް ނިންމި ނިންމުމެއް ކަމަށް ޔޫތް މިނިސްޓަރ އިބްރާހިމް ވަހީދު (އަސްވާޑް) ވިދާޅުވެއްޖެ އެވެ.
މިދިޔަ ހަފްތާ ގެ ބުރާސްފަތި ދުވަހު އާއްމު ކުރި އާ އުސޫލުގައި ބުނެފައި ވަނީ ރަޖިސްޓަރީ ކޮށްގެން ހިންގާތާ އަހަރު ދުވަސްވެފައިވާ ހުރިހާ މީޑިއާއަކަށް އެހީދިނުމަށް ނިންމާފައިވާ ކަމަށެވެ. އާ އުސޫލުގެ ދަށުން މީޑިއާ ގްރާންޓަށް އެދި ހުށަހަޅަން ދިނީ 3 ދުވަހުގެ މުއްދަތެކެވެ. އެއީ ޑިސެމްބަރ 25 އިން 28 ގެ ނިޔަލަށެވެ. އެހެންކަމަށް ވާއިރު އެހީ އަށް އެދި ކުރިމަތިލުމަށް ދިން މުއްދަތު ހަމަވިތާ 2 ދުވަސް ތެރޭގައި އަވަސް އަރުވާލައިގެން މޯލްޑިވް މީޑިއާ އެންޑް ބްރޯޑްކާސްޓިން ކޮމިޝަން އިން މި ވަނީ އެހީ ލިބޭ މީޑިއާތައް ހާމަކޮށްފަ އެވެ.
އެ މަރުހަލާ ކުރިއަށް ދިޔަ ގޮތް އަަވަސް ވުމުން އާއްމުންގެ ފާޑުކިޔުމާއި ވަނީ ކުރިމަތިލާން ޖެހިފަ އެވެ. އެހެންނަމަވެސް މީޑިއާ ގެ ކަންކަން ބަލަހައްޓަވާ ރައީސް މުއިއްޒުގެ ވަޒީރު ވިދާޅުވީ މިނިވަން ކޮމިޝަނަކުން ނިންމާފައިވާ ކަމަކާއި މެދު ކޮމެންޓް ކުރައްވާން ބޭނުންފުޅު ނުވާ ކަަމަށެވެ. އަދި ކޮމިޝަނުން އެ މަރުހަލާ އަވަސް ކުރީ މީޑިއާތަކާއި ދެކެވުނު ވާހަކައިގެ މައްޗަށް ބިނާކޮށް ކަމަށް ޤަބޫލުކުރައްވާ ކަމަށް އޭނާ ވަނީ ވިދާޅުވެފަ އެވެ.
"އެ ބޭފުޅުން އެކަން ކުރާނީ ރަނގަޅަށް. އެ ބޭފުޅުން އެކަން ކުރާނީ މީޑިއާ އާއި އެކުގަައި ހިނގި ޑައިލޮގްގެ މައްޗަށް ކަމަށް ޤަބޫލުކުރެވެނީ." އަސްވާޑް ވިދާޅުވި އެވެ.
މިހާރު މީޑިއާތަކަށް ފައިސާ ލިބޭ ގޮތަށް ބަލާ އިރު އެންމެ ގިނައިން ޕޮއިންޓް ލިބޭ މީޑިއާ އަކީ މިނިސްޓަރު އަސްވާޑުގެ މަސްލަހަތު އޮންނަ 99 ޕޮއިންޓު ލިބުނު ސަންގު އެވެ. ވަގުތު ނޫހަށް 98 ޕޮއިންޓް ލިބުނު އިރު ސަން އަށް ލިބުނީ 97 ޕޮއިންޓެވެ.
30 އޮކްޓޯބަރ 2025ގައި ރަޖިސްޓްރީ ކޮށްގެން ހިންގާ އަމިއްލަ މީޑިއާތަކަށް ދައުލަތުގެ ބަޖެޓުން މާލީ އެހީ ދޭން ނިންމި ނަމަވެސް އެކަން އިއުލާން ކުރިތާ 24 ގަޑި އިރު ނުވަނީސް އެ ނިންމުން ކެންސަލްކޮށްފައި ވެ އެވެ. އޭރު އުސޫލު އެކުލަވާލި ގޮތަށް ބަލާ އިރު މީޑިއާތަކަށް ފަންޑު ދޭން ނިންމި ޔޫތް މިނިސްޓްރީ ގެ ވަޒީރު، އިބްރާހިމް ވަހީދު ގެ މަސްލަހަތު ހިމެނޭ މީޑިއާ އަށް އެންމެ ގިނައިން ފައިސާ ލިބޭ ގޮތަށް ނިންމާފައިވެ އެވެ. ނަމަވެސް ވަޒީރު ވަނީ އެ މަރުހަލާ ކުރިއަށް ދިޔަ ގޮތް ދިފާއު ކުރައްވާ ވާހަކަދައްކަވާފަ އެވެ.
"އެ މަރުހަލާގައި އަޅުގަނޑުގެ އެއްވެސް ބައިވެރިވުމެއް ނެތް. އެ މަރުހަލާ ކުރިއަށް ދިޔައީ ރަނގަޅަށް. އަޅުގަނޑުގެ އެއްވެސް އިހުމާލެއް އެ މަރުހަލާގައި ނެތް،" ވަޒީރު ވިދާޅުވި އެވެ.
އާ އުސޫލުގައި އެހީ ލިބުމުގެ އެއް ޝަރުތަކީ ޖެނުއަރީ 2024 އިން ފެށިގެން ރަޖިސްޓަރީކޮށް، ލައިސަންސް އާއި އެކު މެދުކެނޑުމެއް ނެތި ހިންގާ ތަނަކަށް ވުމެވެ. މާކްސް ދިނުމުގައި ބަލާނެ ކަމަށް ބުނެފައި ވާ ކަންކަމުގެ ތެރޭގައި މީޑިއާ ގެ އުމުރާއި، މުވައްޒަފުން ގެ އަދަދު ހިމެނެ އެވެ. މި މަރުހަލާ މިހާ އަވަސް އަރުވާލައިގެން ގެންދިޔަ ސަބަބާއި މެދު ގިނަ ބަޔަކު ސުވާލު އުފައްދަ އެވެ.
