ސްޓޫޑެންޓް ލޯނު ވަކި އުސޫލެއްގެ މަތިން މައާފްކުރެވޭނެ ގޮތްތަކެއް މިދަނީ ހަދަމުން: ރައީސް

ސްޓޫޑެންޓް ލޯނު ވަކި އުސޫލެއްގެ މަތިން މައާފްކުރެވޭނެ ގޮތްތަކެއް ހަދަމުންދާކަމަށް ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހު ވިދާޅުވެއްޖެއެވެ.

މަތީ ތައުލީމު ހާސިލުކުރުމަށް ސްޓޫޑެންޓް ލޯނު ނަގާފައިވާ ގިނަ އަދަދެއްގެ ބަޔަކު އެދެއްކޭނެ ގޮތެއް ނެތުމުގެ ސަބަބުން އެކަމުގެ ކަންބޮޑުވުން އަންނަނީ ފާޅުކުރަމުންނެވެ. އަދި އެކަމަށް ލުޔެއް ހޯދައިދިނުމަށް އަންނަނީ އެދެމުންނެވެ.

އަންގާރަ ދުވަހުގެ ރޭ ގަލޮޅު ކަންމަތީގައި ކުރިޔަށްގެންދިޔަ ޖަލްސާގައި ވާހަކަދައްކަވަމުން ރައީސް ޞާލިހު ވިދާޅުވީ ގޭގެއަށް ކުރައްވަމުން ގެންދަވާ ޒިޔާރަތުގައި އެންމެ ބޮޑު ކަންބޮޑުވުމެއްގެ ގޮތުގައި ފާހަގަކުރެއްވުނީ މާކުރިއްސުރެ ނަގާފައިވާ ސްޓޫޑެންޓް ލޯނުކަމަށެވެ. ލޯނު ނުދެއްކުމުގެ ސަބަބުން ކޯޓާ ހިސާބަށް ހިނގައިދާނެކަމުގެ ކަންބޮޑުވުން ބައެއް ފަރާތްތަކަށް އެބައޮތްކަމަށް ރައީސް ވިދާޅުވިއެވެ.

މިއަހަރުގެ ރިޔާސީ ބަޔާން ދެއްވަމުން ރައީސް ވަނީ ސްޓޫޑެންޓް ލޯނުގެ އިދާރީ ފީ 1 އިންސައްތައަށް ކުޑަކޮށް، ލޯނު އަނބުރާ ދެއްކުން 20 އަހަރަށް އިތުރުކޮށްފައިވާ ކަމަށް ވިދާޅުވެފައެވެ. ލޯނުތަކުގެ ތަކުލީފު ކުޑަކުރުމަށްޓަކައި ސްޓޫޑަންޓް ލޯނު ސަރުކާރުން ވަނީ ރީ-ސްޓަރަކްޗަރ ކޮށްފައެވެ. އެގޮތުން ކުރިން 5 އިންސައްތައިގައިހުރި އިދާރީ ފީ 1 އިންސައްތައަށް ވަނީ ކުޑަ ކޮށްފައެވެ.