ޖުލައި 10 ގެ ކުރިން ފީ ދައްކަން ޖެހޭއިރު، މެލޭޝިޔާގައި ކިޔަވަން ތިބި ކުދިންނަށް ފައިސާ ނުފޮނުވިގެން އުޅެނީ ޕޮލިސީ މޭކަރުންގެ މަޝްވަރާތައް ނުނިމިގެން
އެކަމަށް ހޭދަވާނެ މުއްދަތެއް ބުނަން ނޭނގޭ ކަމަށާއި، އެކަމުގައި ދިމާވާނެ ދަތިތައް ޤަބޫލު ކުރާ ކަމަށް ވެސް އެ މިނިސްޓްރީ އިން ބުނި
މިނިސްޓަރ އޮފް ހަޔަރ އެޑިޔުކޭޝަން، ލޭބަރ އެންޑް ސްކިލްސް ޑިވެލޮޕްމަންޓް ޑރ.އަލީ ހައިދަރު
މެލޭޝިޔާގައި ކިޔަވަމުން އަންނަ ދިވެހި ދަރިވަރުންގެ ކޯހުގެ ފީ ޖުލައި މަހުގެ 10 ވަނަ ދުވަހުގެ ކުރިން ދައްކަން ޖެހޭއިރު، މިހާތަނަށް އެ ކުދިންނަށް ފައިސާ ނުފޮނުވިގެން އުޅެނީ ޕޮލިސީ މޭކަރުންގެ މަޝްވަރާތައް ނުނިމިގެން ކަމަށް ހަޔަރ އެޑިއުކޭޝަން މިނިސްޓްރީ އިން ބުނެފި އެވެ.
ސަރުކާރުގެ ޚަރަދުގައި މެލޭޝިޔާގައި ކިޔަވަމުން އަންނަ ގިނަ ދަރިވަރުން ވަނީ، ފައިސާ ނުލިބުމުގެ ކަންބޮޑުވުން ފާޅު ކޮށްފަ އެވެ. އެގޮތުން ޖުލައި މަހުގެ 10 ވަނަ ދުވަހުގެ ކުރިން ފައިސާ ނުދައްކައިފި ނަމަ، ޖޫރިމަނާގެ ގޮތުގައި 2000 ރިންގިޓް ދައްކަން ޖެހޭ ކަމަށް އެ ކުދިން ވަނީ ބުނެފަ އެވެ.
އެކަމާ ގުޅިގެން ހަޔަރ އެޑިއުކޭޝަން މިނިސްޓްރީ އިން ހަދާފައިވާ ވަޓްސްއެޕް ގުރޫޕުގައި އެކަމުގެ ކަންބޮޑުވުން ފާޅު ކުރި ނަމަވެސް، އެއްވެސް ޖަވާބެއް ނުލިބޭ ކަމަށް އެ ކުދިން ބުންޏެވެ. އަދި މިނިސްޓްރީއާ މުއާމަލާތް ކުރުމަށް އެކި ގޮތް ގޮތުން ކުރި މަސައްކަތް ވެސް ކާމިޔާބު ވެފައި ނުވާ ކަމަށް ވެސް އެ ކުދިން ވަނީ ބުނެފަ އެވެ.
އެކަމާ ގުޅިގެން އަންގާރަ ދުވަހު ރާއްޖެ ޓީވީގެ ފަށާއިރު ޕްރޮގްރާމްގައި ސުވާލު ކުރުމުން ހަޔަރ އެޑިއުކޭޝަން މިނިސްޓްރީ އިން ބުނެފައި ވަނީ، ކުދިންނަށް ފައިސާ ނުފޮނުވިގެން އުޅެނީ ޕޮލިސީ މޭކަރުންގެ މަޝްވަރާތައް ނުނިމިގެން ކަމަށެވެ. އަދި އެކަމަށް ހޭދަވާނެ މުއްދަތެއް ބުނަން ނޭނގޭ ކަމަށާއި، އެކަމުގައި ދިމާވާނެ ދަތިތައް ޤަބޫލު ކުރާ ކަމަށް ވެސް އެ މިނިސްޓްރީ އިން ބުންޏެވެ.
ވަރަށް ބޮޑެތި ބަދަލުތަކެއް މެލޭޝިޔާގެ ސްޓޫޑެންޓްސް އަށް މިހާރު ވަނީ ދިމާވެފައި ދެއްތޯ. އެއްކަލަ މާލީ ކަންކަމާ ގުޅޭ ގޮތުން. ދެން އެ ހުރިހާ ކަމަކާ ގުޅޭ ގޮތުން މަޝްވަރާ ކުރެވެމުންދާ ކަމަށް، ދެން އަދި ޕޮލިސީ މޭކާސްގެ މެދުގައި ޑިޝިޝަންއެއް ނަގާނީ. އެ ބޭފުޅުން ނިންމަވާނީ ދެން ދަރިވަރުންނާ ދޭތެރޭގައި ދެން ކަންތައް ކުރަންވާ ގޮތެއް.ހަޔަރ އެޑިއުކޭޝަން މިނިސްޓްރީ
މީގެ އިތުރުން ޖުލައި މަހުގެ 10 ވަނަ ދުވަހުގެ ކުރިން ފައިސާ ނުދެއްކިއްޖެ ނަމަ، އެ ދަރިވަރުން ދައްކަން ޖެހޭ 2000 ރިންގިޓްގެ ޖޫރިމަނާއާ މިނިސްޓްރީ އިން ޒިންމާ ވާނެތޯ ސުވާލު ކުރުމުން ހަޔަރ އެޑިއުކޭޝަން މިނިސްޓްރީ އިން ބުނެފައި ވަނީ އެ މިނިސްޓްރީގެ އިހުމާލުން ފައިސާ ނުދެއްކިގެން ޖޫރިމަނާ ވެއްޖެ ނަމަ އެކަމުގެ ޒިންމާ މިނިސްޓްރީ އިން ނަގަން ޖެހޭނެ ކަމަށް ޤަބޫލު ކުރާ ކަމަށެވެ.
މީގެ އިތުރުން ހަޔަރ އެޑިއުކޭޝަން މިނިސްޓްރީ އިން ބުނެފައި ވަނީ ޕޮލިސީ މޭކަރުންގެ މެދުގައި މަޝްވަރާތައް ކުރެވެމުން ދިޔަ ނަމަވެސް، އެކަމުގައި ވަކި ގޮތެއް ނިންމާފައިވާ ކަމުގެ މައުލޫމާތު ލިބިފައި ނުވާ ކަމަށެވެ. އަދި މެލޭޝިޔާގައި ކިޔަވަން ތިބި ދަރިވަރުންނާ މެދު ބަދަލުތަކެއް އައިސްފައިވާތީ، އެކަމަށް ގޮތެއް ނިންމާލީ ޕޮލިސީ މޭކަރުން ކަމަށް ވެސް އެ މިނިސްޓްރީ އިން ވަނީ ބުނެފަ އެވެ.
ރާއްޖެ އިން ބޭރުގައި ކިޔަވަން ތިބޭ ދަރިވަރުންނަށް ސަރުކާރުން ދެމުން އަންނަ ފައިސާ ލިބުމުގައި ދަތިތަކެއް ދިމާވާކަމުގެ ކަންބޮޑުވުން މީގެ ކުރިން ވެސް އެތައް ދަރިވަރުންނެއް ވަނީ ފާޅު ކޮށްފަ އެވެ.
