ފައިސާ ދޭން ނިންމި ގޮތާއި މެދު ސުވާލު ކުރުމުން، މުޅި މަރުހަލާ ވެސް ޖެހީ "އުނބަށް"!

ވެރިކަމުގެ ފުރަތަމަ ދުވަހުން ފެށިގެން އެންމެ ފަރިތަކޮށް މި ސަރުކާރުން ކުރާ ކަމަކީ ބުނާ ވާހަކަ ކެންސަލްކުރުމެވެ. ނިންމުންތައް ނިންމަވާ އިއުލާންކުރައްވާފަ އެ އިއުލާނަށް އެއް ދުވަސް ވެސް ފުރިހަމަ ނުވަނީސް އިއުލާންތައް ކެންސަލްކުރައްވައެވެ. ސިޔާސަތުތަކާއި އުސޫލުތަކާއި ޤަވާއިދުތަކަށް ވެސް ބަދަލު ގެންނެވުމަށް ފަހު އެހާމެ އަވަހަށް އެކަން ވެސް ކެންސަލްކުރައްވައެވެ. ނިންމުންތައް ނިންމާ މިންވަރާއި އެއްވަރަށް މި ސަރުކާރުން ނިންމުންތައް ކެންސަލްވެސް ކުރަނީއެވެ. ކުރުކޮށް ބުނާ ނަމަ މި ސަރުކާރަށް އުނބަށް ޖެހުމަކީ އާ ކަމެއް ނޫނެވެ.

މި ފަހަރު އަނެއްކާވެސް މި ކަހަލަ ކަމެކެވެ. ރަޖިސްޓްރީކޮށްގެން ހިންގާ އަމިއްލަ މީޑިއާތަކަށް ދައުލަތުގެ ބަޖެޓުން މާލީ އެހީ ދޭން ނިންމާ އެކަން އިއުލާން ކުރިތާ ވާނީ 24 ގަޑި އިރެވެ. ދެން އިވުނީ އެ ނިންމުން ކެންސަލްކުރެއްވި ވާހަކަ އެވެ.

ވާނީވެސް އެހެންތާއެވެ. މީޑިއާތަކަށް ފަންޑު ދޭން ނިންމި ވުޒާރާގެ އިސް ފަރާތެއްގެ މަސްލަހަތު ހިމެނޭ މީޑިއާ އަކަށް އެންމެ ގިނައިން ފައިސާ ލިބޭ ގޮތަށް އޮތުމުން ސަރުކާރު ހޫނުފެނަށް ވެއްޓޭނީކީ އަމަށަކު ވަރަކަށް ނޫންތާއެވެ. ތަންކޮޅެއް ތިލަކޮށްދޭނަމެވެ. އޭރު ހާމަކުރި ގޮތުން ނަމަ މީޑިއާތަކުގެ ތެރެއިން އެންމެ ގިނަ ފައިސާ ލިބެނީ އެ ފައިސާ ދޫކުރާ ވުޒާރާ، ޔޫތު މިނިސްޓްރީގެ ވަޒީރު އިބްރާހިމް ވަހީދު (އަސްވާޑް) ގެ މަސްލަހަތު އޮންނަ ސަންގު ޓީވީއަށެވެ. އެ ޓީވީއަށް ޖުމްލަ 3.8 މިލިއަން ލިބެއެވެ. މީގެ އިތުރުން ސަންގު އޮންލައިން އަށް 1.3 މިލިއަން ރުފިޔާ ލިބެ އެވެެ. އެހެންކަމުން ޖުމްލަ 5.1 މިލިއަން ރުފިޔާ މި ދެ މީޑިއާ އައުޓްލެޓަށް ލިބޭނެއެވެ.

ގްރާންޓް ދިނުމުގެ ޕްރޮސެސްގައި ބައިވެރިވެވަޑައިގެންނެވި ސްޓޭޓް މިނިސްޓަރު އަލީ ޝަމާން ހިންގަވާ އެއް އައުޓްލެޓަކަށް 1.34 މިލިއަން ރުފިޔާ ދިނުމަކީ މި މަރުހަލާ އާއި މެދު ސުވާލު އުފެދުނު އަނެއް ސަބަބެވެ.

ފައިސާ ލިބޭ މީޑިއާ ގެ ތެރޭގައި އިސްލާމިކް މިނިސްޓަރު ޑރ. މުހައްމަދު ޝަހީމް އަލީ ސައީދު އަރަބި ބަހުން ނެރުއްވާ މާލްދީފް އޮންލައިން ހިމެނެވެ. އެ ނޫހަކީ ޝަހީމްގެ ދަރިފުޅު މާހިލް ޝަހީމްގެ އިތުރުން ޝަހީމްގެ ގާތް ބޭފުޅެއް ކަމަށްވާ އިސްލާމިކް މިނިސްޓްރީގެ ނައިބު މިނިސްޓަރު އަލީ އަހުސަންގެ ކޮއްކޮ އިބްރާހިމް އަޝްވާގުގެ ހިއްސާ އޮތް ނޫހެކެވެ. މިފަަދަ ކަންކަމަކީ އިއްތިފާގެއް ކަމަށް މި ޒަމާނަކު ދިވެހިން ޤަބޫލެއް ނުކުރާނެތާއެވެ. މި ނޫހުގައި ވެސް ޓްވިޓަރގައި ވެސް ތިބީ 90 ފޮލޯވަރުންނެވެ. އެހެންވީމަ ލައްކައިން ލައްކައިން ފައިސާ ދޭ ނޫހަކަށް ވާ ވަރެއް ނުވެ އެއް ނޫންތޯއެވެ؟ މީގެ އިތުރުން ދިޔަރެސް ނޫހަކީ ޕީއެންސީގެ މެމްބަރެއްގެ ގޮތުގައި ހުންނެވި ހިތަދޫ މެދު ދާއިރާގެ މެންބަރު އަހުމަދު އަޒާންގެ ނޫހެވެ.

މިކަހަލަ ކިތަންމެ ކިތަންމެ ކަމެކެވެ. ސަރުކާރުން ފައިސާ ދޭން ނިންމި ބައެއް ނޫސްތަކަކީ ދުވާލަކު އެއް ފަހަރު ވެސް ބައެއް ފަހަރު ޚަަބަރެއް ނުލިޔާ ނޫހެވެ. އެހެންކަމުން 27.9 މިލިއަން ރުފިޔާގެ މީޑިއާ ފަންޑު ބެހުން ވަގުތުން ފަސްކޮށް، ފުރިހަމަ މިނިވަން ރިވިއު އެއް ހިންގުމަށް އެތައް ބަޔަކު އައީ ގޮވާލަމުންނެވެ. އެ ހިސާބުން ސަރުކާރުން ކުރީ ސަރުކާރަށް އެންމެ ފަރިތަކަމެވެ. ނިންމުން އުނބަށް ޖަހާ ނިންމުން ކެންސަލް ކުރީއެވެ. ދެން ވާ ގޮތެއް ވެސް ރައްޔިތުން ތިބީ ބަލާށެވެ.