ހޮނިހިރު ދުވަހު ބޭއްވި ނޫސްވެރިންގެ ބައްދަލުވުމުގައި ގައުމިއްޔަތު މިނިސްޓަރު އާދަމް ނަސީރު ވިދާޅުވީ ޅެމުގެ ފަރުވާ އާއި މެދު ފުލުހުންނާއި މަޝްވަރާ ނުކުރާ ކަމަށް. ނަމަވެސް އެ މަސައްކަތުގެ ދިރާސާތައް ވުޒާރާ އިން ކުރާ ކަމަށް ވިދާޅުވި.
ފުލުހުން ގައުމިއްޔަތު މިނިސްޓްރީއާއެކު ބޭއްވި ބައްދަލުކުރެއްވުމުގެ ތެރެއިން
ޅެމުން ފަރުވާ ދިނުމާ ގުޅޭ ގޮތުން ފުލުހުންގެ ޚިދުމަތުން ގައުމިއްޔަތު މިނިސްޓްރީއާ އެކު މަޝްވަރާކުރި ކަމަށް ފުލުހުން ބުނިތާ 8 މަސް ފަހުން ގައުމިއްޔަތު މިނިސްޓަރު އާދަމް ނަސީރު އެކަން ދޮގުކުރައްވައިފި އެވެ.
ޅެމުން ފަރުވާ ދިނުމާ ގުޅޭ ގޮތުން ފުލުހުންގެ ޚިދުމަތުން ގައުމިއްޔަތު މިނިސްޓްރީއާ އެކު މަޝްވަރާކޮށްފައިވާ ކަމަށް ފުލުހުންނާއި ހަވާލާދީ މީޑިއާތަކުން ރިޕޯޓް ކުރީ މި އަހަރުގެ އެޕްރިލް މަހުގެ 29 ވަނަ ދުވަހު އެވެ. އޭރު ފުލުހުން ބުނީ ދިވެހިބަހާއި ތާރީހާއި ސަގާފަތާ ބެހޭ ވުޒާރާ އާއި އެކު ވިކްޓިމް ސަޕޯޓް ޑިޕާޓުމަންޓުގެ ފަރާތުން މަޝްވަރާ ބައްދަލުވުމެއް ބާއްވާފައިވާ ކަމަށެވެ.
އެ ބައްދަލުވުމަކީ ގައުމިއްޔަތު މިނިސްޓަރު އާދަމް ނަސީރު އާއި އެ ވުޒާރާގެ އިސް ބައެއް ވެރިންނާއި ވިކްޓިމް ސަޕޯޓް ޑިޕާޓްމަންޓުގެ ހެޑް ސުޕްރިންޓެންޑެންޓް އޮފް ޕޮލިސް އަންވަރު ނައީމް އަދި ޑިޕާޓްމަންޓުގެ ކަމާ ގުޅުންހުރި މުވައްޒަފުން ބައިވެރިވީ ބައްދަލުވުމެކެވެ. ފުލުހުން ބުނި ގޮތުގައި މި ބައްދަލުވުމުގައި ނަފުސާނީ ދާއިރާ އިން ދެ އިދާރާ ގުޅިގެން ކުރެވިދާނެ ކަންތައްތަކާއި މެދު މަޝްވަރާކޮށްފައިވެ އެވެ. ހަމައެހެންމެ ރައްޔިތުންނާ ގުޅިގެން ކުރެވިދާނެ ކަންތައްތަކާ ގުޅޭގޮތުން މަޝްވަރާކޮށްފައިވާ ކަމަށް ފުލުހުން ބުނެފައި ވެ އެވެ. އަދި ޕޮއެޓްރީ ބޭނުންކޮށްގެން ނަފުސާނީ ބައްޔަށް ފަރުވާކުރުމާ ގުޅޭގޮތުން މަޝްވަރާކޮށްފައިވާ ކަމަށް ފާހަގަކޮށްފައި ވެ އެވެ.
ހޮނިހިރު ދުވަހު ބޭއްވި ނޫސްވެރިންގެ ބައްދަލުވުމުގައި އެކަމާއި މެދު ވަޒީރާއި ރާއްޖެ ޓީވީގެ ނޫސްވެރިޔާ ސުވާލުކުރުމުން ވަޒީރު ވަނީ އެފަދަ ބައްދަލުވުމެއް ނުހިނގާ ކަމަށް ވިދާޅުވެފަ އެވެ. އަދި އެއީ މީޑިއާތަކުން ދެއްކި ވާހަކަ އެއް ކަމަށް ވެސް އެ މަނިކުފާނު ވިދާޅުވި އެވެ.
"އެފަދަ ބައްދަލުވުމެއް ހިނގާފަ އެއް ނުވޭ. އެއީ ރަނގަޅު މައުލޫމާތެއް ނޫން. އަޅުގަނޑަށް ވެސް އެ ވާހަކަ ފެނުނީ މީޑިއާ އިން" ވަޒީރު ވިދާޅުވި އެވެ.
ވަޒީރު ވަނީ އެ މައުލޫމާތު ފެތުރުނު ގޮތެއް ސާފު ނުވާ ކަމަށް ވިދާޅުވެފަ އެވެ. ވަޒީރު އެފަދައިން ވިދާޅުވުމުން، ރާއްޖެ ޓީވީގެ ނޫސްވެރިޔާ ވަނީ އެފަދަ ބައްދަލުވުމެއް ކުރިއަށް ނުދާ ނަމަ އެއާއި ގުޅުން ހުރި ވާހަކަތައް މީޑިއާގައި ފެތުރުމުން އެކަމަށް ރިއާޔަތްކޮށް، ނުވަތަ އެކަން ދޮގުކޮށްފައި ނުވަނީ ކީއްވެތޯ ސުވާލުކޮށްފަ އެވެ. ނަަމަވެސް އެކަމަށް ސާފު ޖަވާބެއް ވަޒީރު ދެއްވާފަ އެއް ނުވެ އެވެ. ވަޒީރު އިތުރަށް ވިދާޅުވީ ޅެމުން ފަރުވާ ދިނުމާއި ގުޅުން ހުރި މަސައްކަތްތައް މިހާރު ވެސް ކުރިއަށް ދާ ކަމަށެވެ. މިހާރު ކުރަނީ ދިރާސާތަކުގެ މަސައްކަތް ކަމަށް ވަޒީރު ވިދާޅުވި އެވެ.
ނޫސްވެރިންގެ ބައްދަލުވުމަށް ފަހު ނޫސްވެރިންނާއި ވާހަކަދައްކަވަމުން ވަޒީރު ވަނީ އެ ބައްދަލުވުމަކީ ޅެމުން ފަރުވާ ހޯދުމާއި ގުޅޭ ބައްދަލުވުމެއް ނޫން ކަަމަށް ވިދާޅުވެފަ އެވެ. އަދި އެކަމާއި މެދު ފުލުހުންގެ އިދާރާ އާއި ވެސް ސުވާލުކުރައްވާފައިވާނެ ކަމަށް ވަޒީރު ވިދާޅުވި އެވެ. ފަހަރުގައި އެ ޚަބަރު އެގޮތަށް އައީ ބައްދަލުވުމުގެ ޔައުމިއްޔާ ލިޔުނު ފުލުހުންނަށް ބައްދަލުވުގައި ހިނގި ކަންކަން ނޯޓު ކުރުމުގައި އެރި އޮޅުމަކުން ކަމަށް ވެދާނެ ކަމަށް އެ މަނިކުފާނު ވިދާޅުވި އެވެ. ވަޒީރު ވިދާޅުވީ ބައްދަލުވުން ފައްޓަވަމުން މިނިސްޓްރީގެ މަސައްކަތްތަކުގެ ތެރޭގައި ޅެމުން ފަރުވާ ހޯދުމުގެ ވިސްނުން ހުރިކަން ހާމަކުރައްވާފައިވާނެ ކަމަށެވެ. ނަމަވެސް އެއްވެސް ވަރަކަށް ފުލުހުންނާއި އެކަމާއި މަޝްވަރާ ނުކުރާ ކަމަށް ވަޒީރު ވިދާޅުވި އެވެ.
