ވައްކަން ކުރި ކަމަށް ތުހުމަތުކޮށް މާލޭގެ މަގުމަތީގައި ދަމާ ގެންގޮސް މޫދަށް މީހަކު އެއްލާލައިފި
އެމީހާ މަގުމަތީގައި ދަމާފައި ގެންދިޔައިރު ގިނަ ބަޔަކު އެސަރަހައްދުގައި ތިބި. ފުލުހުން ވަނީ މިފަދަ މައްސަލަތަކުގައި އެމީހުންނަށް އަނިޔާ ނުކުރުމަށާއި ފުލުހުންނަށް މައްސަލަ ރިޕޯޓު ކުރުމަށް އިލްތިމާސް ކޮށްފައި.
ވައްކަން ކުރި ކަމަށް ތުހުމަތުކޮށް މޫދަށް އެއްލާލި މީހާ
ވައްކަން ކުރި ކަމަށް ތުހުމަތުކޮށް މާލޭގެ މަގުމަތީގައި ދަމާ ގެންގޮސް މޫދަށް މީހަކު އެއްލާލި މައްސަލަ ފުލުހުން ތަހުގީގު ކުރަން ފަށައިފި އެވެ.
އަނިޔާވެރި ގޮތެއްގައި މީހަކު މާލޭގެ މަގުމަތީގައި ދަމާފައިވާ ގެންދާ ވީޑިއޯ ސޯޝަލް މީޑިއާގައި ވަނީ އާއްމުވެފަ އެވެ. އެމީހާގެ ވަށައިގެން މީހުން ތިބި ނަމަވެސް އެއްވެސް މީހަކު އެކަން ހުއްޓުވަން މަސައްކަތް ކުރާ މަންޒަރެއް ނުފެ އެވެ.
ސޯޝަލް މީޑިއާގައި އެ ވީޑީއޯ ދައުރުކުރާ މީހުން ބުނެފައިވަނީ އޭނާ މަގުމަތީގައި ދަމާ ގެންގޮސް މޫދަށް އެއްލާލީ ވައްކަން ކުރާތީ ކަމަށެވެ. އެމީހާ އޮތީ ޓީޝާޓެއް ނުލައި ކަމަށްވާތީ، ބުރަކައްޓަށް އަނިޔާ ވާނެ ކަމަށް ވެސް ބައެއް މީހުން ބުނެފައިވެ އެވެ.
މި މައްސަލައާ ގުޅިގެން ފުލުހުން ބުނީ، މިކަން ސަމާލު ކަމަށް އައިސްފައިވާ ކަމަށާއި، ބަލަން ޖެހޭ ކަންކަން ބަލަމުންދާ ކަމަށެވެ.
މީގެ ކުރިން ވެސް ވައްކަމުގެ ތުހުމަތު ކުރެވިގެން މީހުންނަށް އަނިޔާކޮށް ވީޑިއޯ އާއްމު ކޮށްފައިވެ އެވެ. ވައްކަމުގެ ތުހުމަތު ކުރެވޭ މީހާގެ ގައިގައި ކުލައާއި ދަވާދުލައި މަގުމަތީގައި ހިންގުވި މައްސަލައެއް ވެސް ފެންމަތިވެގެން ދިޔަ އެވެ.
މިފަދަ މައްސަލަތަކުގައި އެމީހުންނަށް އަނިޔާނުކޮށް ފުލުހުންނަށް މައްސަލަ ރިޕޯޓު ކުރުމަށް ވެސް އެ މުވައްސަސާއިން އިލްތިމާސް ކޮށްފައިވެ އެވެ.
