2025 ވަނަ އަހަރުގެ މިހާތަނަށް 814 ސްކޭމްގެ މައްސަލައެއް ހުށަހަޅާފައިވާއިރު, މިއީ 2024 ވަނަ އަހަރާ އަޅާބަލާއިރު 90.2 ޕަސެންޓް އިތުރު އަދަދެއް. އެންމެ ގިނައިން ހުށަހެޅިފައިވަނީ އީ ކޮމާސް ސްކޭމަށް ކަމަށް. 1163 މައްސަލާގައި 22.7 މިލިއަން ރުފިޔާ ގެއްލުންވި ނަމަވެސް ފުލުހުންނަށް 8.5 މިލިއަން ރުފިޔާ އަނބުރާ ހޯދައިދެވިފައިވޭ.
ބޭންކުގެ ކާޑު ބޭނުން ކޮށްގެން މީހަކު ސްކޭމް ހިންގާ މަންޒަރު ދައްކުވައިދޭ ފޮޓޯއެއް
މިދިޔަ އަހަރަށް ވުރެ މިއަހަރު ސްކޭމްގެ މައްސަލަތަކަށް މީހުން ހުށަހެޅިފައިވާ މިންވަރު ވަރަށް ބޮޑަށް އިތުރު ކަމަށާއި، ''ރޮމާންސް ސްކޭމް'' އަށް އެކަނި ވެސް 16 މީހަކު ހުށަހެޅިފައިވާ ކަމަށް ފުލުހުންގެ ޚިދުމަތުން ބުނެފި އެވެ.
ބުރާސްފަތި ދުވަހު ފުލުހުން ބޭއްވި ނޫސްވެރިންގެ ބައްދަލުވުމުގައި ސައިބަރ ކްރައިމް ސެންޓަރުގެ ސައިބަރ އިންވެސްޓިގޭޝަން ހެޑް، އިންސްޕެކްޓަރ އޮފް ޕޮލިސް އަޒީފް އައްބާސް ވިދާޅުވީ 2025 ވަނަ އަހަރުގެ މިހާތަނަށް ހުށަހެޅުނު މައްސަލަތައް އިތުރު ކަމަށާއި، 814 މައްސަލައެއް ހުށަހަޅާފައިވާ ކަަމަށެވެ. މިއީ 2024 ވަނަ އަހަރާ އަޅާބަލާއިރު، 90.2 ޕަސެންޓް އިތުރު އަދަދެއް ކަމަށް އޭނާ ވިދާޅުވި އެވެ.
މީގެ އިތުރުން އަޒީފް ވިދާޅުވީ ހުށަހެޅިފައިވާ ސްކޭމްގެ މައްސަލަތަކުގެ ތެރެއިން 66.6 ޕަސެންޓަކީ މަކަރާއި ހީލަތުގެ މައްސަލަތައް ކަމަށާއި، ހެކް ކުރުމުގެ 10.2 ޕަސެންޓް މައްސަލަ ހިމެނޭ ކަމަށެވެ. އަދި ވިދާޅުވީ އޮންލައިން ހެރެސްމަންޓުގެ 9.6 ޕަސެންޓް މައްސަލަ ހިމެނޭ ކަމަށާއި، އެހެނިހެން މައްސަލަތައް 13.6 ޕަސެންޓް ހިމެނޭ ކަމަށެވެ.
މިހާރު ވެސް ސްކޭމްގެ 111 މައްސަލައެއް ތަހުގީގު ކުރަމުންދާ ކަމަށް އަޒީފް ވިދާޅުވި އެވެ.
ސްކޭމްގެ ބާވަތްތަކަށް އިޝާރާތް ކުރައްވައި އިންސްޕެކްޓަރ އޮފް ޕޮލިސް ޝާމް މުހައްމަދު ވިދާޅުވީ 12 ބާވަތެއްގެ ސްކޭމަށް މީހުން ހުށަހެޅިފައިވާ ކަމަށާއި، އެންމެ ގިނައިން ހުށަހެޅިފައިވަނީ އީ ކޮމާސްގެ ސްކޭމް ތަކަށް ކަމަށެވެ. އަދި ރޮމާންސްގެ ސްކޭމަށް ވެސް 16 މީހަކު ހުށަހެޅިފައިވާ ކަމަށް އޭނާ ވިދާޅުވި އެވެ.
އެންމެ ގިނަ ބަޔަކު ހުށަހެޅިފައިވަނީ އީ ކޮމާސް ސްކޭމް ކުރިން ފާހަގަކުރިހެން ޚާއްސަ ގޮތެއްގައި ފޭސްބުކް މާކެޓުގައި 763 ސްކޭމް. ދެވަނަ އަށް ބޭރުގެ ފައިސާ ގަނެވިއްކުމުގެ ގުޅުންހުރި ސްކޭމްތައް 340 މައްސަލަ. މިއާއެކު ކާކުކަން ނޭނގޭ ގޮތަށް 242 މައްސަލައެއް، ފޯނުން ގުޅައިގެން 95 މައްސަލައެއް، އިންވެސްޓްމަންޓް ސްކޭމްގެ 55 މައްސަލަ، ލިންކް މެދުވެރިކޮށް 37 ސްކޭމްގެ މައްސައެއް، ރޮމާންސް ސްކޭމް ނުވަތަ ލޯބީގެ ގޮތުން ގުޅުމެއް އުފައްދައިގެން ހިންގާފައިވާ 16 މައްސަލައެއް. ވަޒީފާގެ ފުރުސަތު އޮފަރކޮށްގެން ހިންގާފައިވާ 4 މައްސަލައެއް. އައިޑެންްޓިޓީ ތްފެޓްގެ 4 މައްސަލައެއް. ބިޒްނަސް އީމެއިލް ކޮންޕްރަމައިޒް ސްކޭމްގެ 1 މައްސަލައެއް ފާހަގަކުރެވިފައިވޭއިންސްޕެކްޓަރ އޮފް ޕޮލިސް ޝާމް މުހައްމަދު
މީގެ އިތުރުން ޝާމް ވިދާޅުވީ ސްކޭމްގެ މައްސަލަތަކުގައި ގެއްލުނު ފައިސާ ހޯދުމަށް ކާމިޔާބު ގިނަ މަސައްކަތްތަކެއް ކުރެވިފައިވާ ކަމަށާއި، ބައެއް ކޭސްތަކުގައި ހުރިހާ ފައިސާއެއް އަނބުރާ ހޯދައިދެވިފައިވާ ކަމަށެވެ.
2025 މާޗް 17 ވަނަ ދުވަހުން ފެށިގެން މަރުކަޒީ ކޮށް މި ޚިދުމަތުން ސްކޭމްގެ މައްސަލަތައް ތަހުގީގު ކުރަން ފެށިފަހުން 1163 މައްސަލައެއް ހުށަހެޅުނުއިރު މީގެ ތެރެއިން 539 މީހުން ހުށަހެޅި މައްސަލާގައި ގެއްލުންވި ފައިސާ އެއްކޮށް އަނބުރާ ހޯދައިދެވިފައިވޭ. މީގެ އިތުރުން 143 މީހަކު ހުށަހަޅާފައިވާ މައްސަލާގައި ގެއްލުންވި ފައިސާއިން ބައެއް ހޯދައިދެވިފައިވާކަން ފާހަގަކުރަން. ދެންނެވި ތަފާސްހިސާބުތަކުން ފައިސާއިން ބަލާނަމަ 1163 މައްސާލާގައި 22.7 މިލިއަން ދިވެހި ރުފިޔާ ގެއްލުންވެފައިވާއިރު، ފުލުހުންނަށް 8.5 މިލިއަން ރުފިޔާ އަނބުރާ ހޯދައިދެވިފައިވޭ . މިއީ 37 އިންސައްތާގެ ރިކަވަރީ ރޭޓެއް.އިންސްޕެކްޓަރ އޮފް ޕޮލިސް ޝާމް މުހައްމަދު
ސްކޭމްގެ މައްސަލަތައް ހުއްޓުމަށް ފުލުހުން ދަނީ ބޭރުގެ ގައުމުތަކާ ގުޅިގެން ވެސް ޚާއްސަ ޕްރޮގްރާމްތަކުގައި ބައިވެރިވަމުން ކަމަށް ބުނެފައިވެ އެވެ. އަދި މީހުން ހޭލުންތެރި ކުރުމުގެ ގޮތުން ވެސް މީހުން ދިރިއުޅޭ ހުރިހާ ރަށެއްގައި ތަފާތު ޕްރޮގްރާމްތައް ހިންގަމުން ގެންދާ ކަމަށް ވެސް ވަނީ ބުނެފަ އެވެ.
