އައު އަހަރާ ދިމާކޮށް ކޮންމެ އަހަރަކު ވެސް ފުލުހުން ކުރިއަށްގެންދާ އޮޕަރޭޝަން "ރިވެލި" ފަށައިފި
އައު އަހަރާ ދިމާކޮށް ފުލުހުން ފެށި އޮޕަރޭޝަންގައި މާލެ ސަރަހައްދާއި ރާއްޖޭގެ ހުރިހާ ރަށެއްގައި ފުލުހުން މަގުމަތީގައި ހަރަކާތްތެރިވެ، ވީސީޕީ ގާއިމުކޮށް މީހުންނާ ސުވާލުކޮށް ވެހިކަލްތައް ޗެކްކުރުމާއި، ވައްކަމާއި ފޭރުމާއި ބަނގުރަލާ ގުޅުން ހުރި މައްސަލަތަކަށް ހާއްސަ ސަމާލުކަން ދޭނެ. މީގެ އިތުރުން މެރިން ޕޮލިހުން ކަނޑު އުޅަނދުފަހަރު ބަލައިފާސްކޮށް ސަލާމަތީ ކަންކަން ފުރިހަމަކޮށްފައިވޭތޯ ބަލަމުންދާނެ. މި އޮޕަރޭޝަން ކުރިއަށްދަނީ ޖަނަވަރީ 3 ވަނަ ދުވަހުގެ ނިޔަލަށް ކަސްޓަމްސް، އިމިގްރޭޝަން އަދި ކޯސްޓްގާޑްގެ އެހީތެރިކަމާއެކު.
އޮޕަރޭޝަން "ރިވެލި" އަށް ތައްޔާރުވުމުގެ ގޮތުން ފުލުހުންނަށް ބޭއްވި ބްރީފިންގެ ތެރެއިން
އައު އަހަރާ ދިމާކޮށް ކޮންމެ އަހަރަކު ވެސް ދިވެހި ފުލުހުންގެ ޚިދުމަތުން ކުރިއަށް ގެންދާ އޮޕަރޭޝަން "ރިވެލި" ފަށައިފި އެވެ.
މި ޑިސެމްބަރު މަހުގެ 24 ވަނަ ދުވަހު ފެށި މި އޮޕަރޭޝަންގައި މާލެ ސަރަހައްދާއި ހުރިހާ ރަށެއް ހިމެނޭ ގޮތަށް ގިނަ އަދަދެއްގެ ފުލުހުން މަގުމަތީގައި ހަރަކާތްތެރި ވަމުންދާނެ އެވެ. ފުލުހުން ބުނީ މި އޮޕަރޭޝަންގައި މާލޭއާއި ހުޅުމާލޭ ގެ އެކި ސަރަހައްދު ތަކުގައި ވީ.ސީ.ޕީ ގާއިމުކޮށް މީހުންނާއި ސުވާލުކުރުމާއި ވެހިކަލް ޗެކްކުރުމަށް ހަމަޖެހިފައިވެ އެވެ. އަދި ކަނޑު އުޅަނދުފަހަރު ބަލައިފާސްކުރަމުން ގެންދާނެ އެވެ.
އަދި މި އޮޕަރޭޝަންގެ ތެރެއިން ހާއްސަ ސަމާލުކަމެއް ދީގެން ވައްކަމާއި ފޭރުން ހުއްޓުވުމާއި، ބަނގުރަލާއި މަސްތުވާތަކެއްޗާ ގުޅުންހުރި މައްސަލަތަކާއި، ސައިލެންސަރު މޮޑިފައިކޮށްގެން އަޑުގަދަކޮށް ދުއްވާ ފަރާތްތަކަށް ފާރަވެރިވުމުގެ އިތުރުން އާންމު އިޖުތިމާއީ މިންގަނޑުތަކާ ހިލާފަށް އުޅޭ މީހުން ހުއްޓުވައި ސުވާލުކޮށް އަދި ފިޔަވަޅު އަޅަންޖެހޭ ފަރާތްތަކާމެދު ފިޔަވަޅުއަޅައި ގާނޫނާއި ގަވާއިދުތަކުގެ ތެރެއިން ކުރަންޖެހޭ ކަންކަން ކުރަމުންގެންދާނެ ކަމަށް ވެސް ފުލުހުން ބުނެ އެވެ.
މީގެ އިތުރުން ސްކޫލު ބަންދާއި އައު އަހަރާ ދިމާކޮށް މާލެއިން ފުރާ އަދި އަންނަ އުޅަނދުފަހަރު ޗެކްކުރުމަށް ހާއްސަ އޮޕަރޭޝަނެއް ފުލުހުން ވަނީ އަންގާރަ ދުވަހު ފަށާފަ އެވެ.
ފުލުހުން ބުނީ ސްކޫލު ބަންދާއި އައު އަހަރާ ދިމާކޮށް މާލެއިން ގިނަބަޔަކު އެކި ރަށްރަށަށް ދަތުރުކުރާނެތީ ޕަސިންޖަރުން ގޮވައިގެން ދަތުރުކުރާ ފެރީތަކާއި، ބަނދަރުތަކުން މުދާ ބަރުކޮށްގެން އަތޮޅުތަކަށް ދަތުރުކުރާ އޮޑިދޯނިފަހަރު ގެ ސަލާމަތާއި ރައްކާތެރިކަން ކަށަވަރުކުރުމުގެ ގޮތުން މެރިން ޕޮލިހުން ކަނޑު އުޅަނދުފަހަރު ބަލައިފާސްކުރުމުގެ ހަރަކާތެއް ފަށާފައިވާ ކަމަށެވެ.
މި މަހުގެ 23 ވަނަ ދުވަހުން ފެށިގެން ކުރިއަށް ގެންދާ މި ހަރަކާތުގައި ގްރޭޓަރ މާލެ އޭރިއާއިން ޕަސިންޖަރުން ގޮވައިގެން ދަތުރުކުރާ ފެރީތަކާއި މުދާ ބަރުކޮށް އަތޮޅުތަކަށް ފުރުމަށް ތައްޔާރުވަމުންދާ އޮޑިދޯނިފަހަރާއި އެހެން އަތޮޅުތަކުން މާލެ އަންނަ އޮޑިދޯނިފަހަރާއި ބޯޓުތައް ބަލައިފާސްކޮށް، އެ އުޅަނދުތަކުގައި ސަލާމަތީގޮތުން ފުރިހަމަ ކުރަންޖެހޭ ކަންކަން ފުރިހަމަ ކޮށްފައިވޭތޯ ބަލަމުން ގެންދާނެ އެވެ.
އޭގެ އިތުރުން މި ހަރަކާތުގެ ތެރެއިން، އޮޑިދޯނިފަހަރާއި ބޯޓުފަހަރު ފުރުމުގެ ކުރިން ރަނގަޅު ކުރަންޖެހޭ ކަންކަން ކެޕްޓަނުންނަށް އަންގައި ކަނޑުމަތީގެ ސަލާމަތާއި ރައްކާތެރިކަމަށް އުޅަނދުތަކުގެ ކެޕްޓަނުންނާއި ފަޅުވެރިން ހޭލުންތެރިކުރުމަށް މައުލޫމާތު ދިނުމަށްވަނީ ހަމަޖެހިފަ އެވެ. އަދި ކަނޑު ދަތުރު ފަތުރުކުރުމުގެ ގާނޫނާއި ގަވާއިދުތަކަށް އަހުލުވެރިވެ އެކަންކަން ތަންފީޒުކުރުމުގައި އުޅަނދުތަކުގެ ކެޕްޓަނުންނާއި ފަޅުވެރިންގެ ފުރިހަމަ އެއްބާރުލުން ލިބުމުގެ މުހިއްމު ކަމާބެހޭ ގޮތުންވެސް މައުލޫމާތު ދެމުންގެންދާނެ އެވެ.
މި އޮޕަރޭޝަން ކުރިއަށް ގެންދިއުމަށް ހަމަޖެހިފައިވަނީ ޑިސެމްބަރު 23 އިން 2026 ޖަނަވަރީ 3 ވަނަ ދުވަހުގެ ނިޔަލަށެވެ. މި އޮޕަރޭޝަން ކުރިއަށް ގެންދަނީ މޯލްޑިވްސް ކަސްޓަމްސް ސަރވިސް، މޯލްޑިވްސް ޕޯޓްސް ލިމިޓެޑް، މޯލްޑިވްސް އިމިގްރޭޝަން އަދި އެމް.އެން.ޑީއެފްގެ ކޯސްޓްގާޑުގެ އެހީތެރިކަމާ އެކުގަ އެވެ.
