ސޫކީއަށް ދިން ސުލްހައިގެ އިނާމު އަތުލުމަށް ގޮވާލައި ހަތަރު ލައްކައަށް ވުރެ ގިނަ މީހުންގެ ޕެޓިޝަނެއް!
ސޫކީ އަށް މުޅި ދުނިޔޭގެ ފާޑު ކިޔުން
މިޔަންމާގެ ލީޑަރު އަން އަންގ ސަން ސޫކީ
މިޔަންމާގެ ލީޑަރު އަން އަންގ ސަން ސޫކީ އަށް ދީފައިވާ "ނޮބަލް ޕީސް ޕްރައިޒް" އަތުލުމަށް ގޮވާލާ ޕެޓިޝަނުގައި ހަތަރު ލައްކައަށް ވުރެ ގިނަ މީހުން ސޮއިކޮށްފި އެވެ.
މިޔަންމާގެ ސްޓޭޓް ކައުންސެލަރ އަންގ ސަން ސޫކީ އަށް ނޮބެލް ޕީސް ޕްރައިޒް ދީފައި ވަނީ 1991 ވަނަ އަހަރު، އެގައުމުގައި މިނިވަން އިންސާފުވެރި އިންތިހާބެއް ބޭއްވުމަށް ބާރު އަޅައި ހިންގެވި ހަރަކާތްތަކާއި މިޔަންމާގެ ކުރީގެ މިލިޓަރީ ލީޑަރުންނާ ދެކޮޅަށް ތެދުވެ ސުލްހަވެރިކަމާއެކު ޑިމޮކްރަސީ އަށާއި އިންސާނީ ހައްގުތަކަށް އޭނާ ކުރެއްވި މަސައްކަތުގެ އަގުވަޒަން ކުރުމުގެ ގޮތުންނެވެ.
ނަމަވެސް، ރޮހިންޖާ މުސްލިމުންނަށް ކުރަމުންދާ އަނިޔާތަކާ ދެކޮޅަށް ބަހެއް ވެސް ވިދާޅުވެފައިނުވާ ސޫކީގެ އަތުން އެ އިނާމު އަތުލުމަށް ގޮވާލައި ހަތަރު ލައްކައަށް ވުރެ ގިނަ މީހުން މިވަނީ ޕެޓިޝަނުގައި ސޮއިކޮށްފަ އެވެ. މިވަގުތާ ހަމައަށް އެ ޕެޓިޝަނުގައި 409،290 މީހުން ވަނީ ސޮއި ކޮށްފަ އެވެ.
އެ ޕެޓިޝަނުގައި ބުނެފައި ވަނީ އިންސާނިއްޔަތާ ދެކޮޅު ހަމަލާތަކެއް ސޫކީގެ ގައުމުގައި ދެވެމުންދާއިރު މިވަގުތާ ހަމައަށް އެކަންތައްތައް ހުއްޓުވުމަށް އެއްވެސް ކަމެއް ކޮށްފައިނުވާ ކަމަށެވެ.
ޕެޓިޝަނުގައި އެތައް ލައްކަ ބަޔަކު ސޮއި ކޮށްފައިވީ ނަމަވެސް، ނޯވޭގައި ހުންނަ ނޮބެލް އިންސްޓިޓިއުޓުން ބުނެފައި ވަނީ ސޫކީއަށް ދީފައިވާ އެވޯޑް އަތުނުލެވޭނެ ކަމަށެވެ.
ރޮހިންޖާ ދަރިކޮޅު ނެތިކޮށްލަމުންދާއިރު، ސިޔާސީ ކުށްވެރިއެއްގެ ގޮތުގައި ޖަލުގައި އެތަކެއް ދުވަސްތަކެއް ހޭދަކުރެއްވި ސޫކީ "ހަނު" ހުންނަވާތީ ދުނިޔޭގެ އެކިކަންކޮޅުތަކުގެ ފާޑުކިޔުން ވަނީ އަމާޒުވެފަ އެވެ.
ބުޑިސްޓުންގެ އާބާދީ ބޮޑު މިޔަންމާގެ އަސްކަރިއްޔާއިން ދަނީ ރޮހިންޖާ މުސްލިމުން މަރައި، ގެތައް އަންދައި ބޮޑެތި އަނިޔާތަކެއް ދެމުންނެވެ. މިއީ ނަސްލު ނައްތާލުމުގެ ގޮތުގައި އދ. ގެ ސެކްރެޓަރީ ޖެނެރަލް ފާހަގަ ކުރައްވާފައިވާއިރު، އެއްވެސް ފިޔަވަޅެއް ނާޅާތީ އދ. އަށް ވެސް ވަނީ ފާޑުކިޔުން އަމާޒުވެފަ އެވެ.
