ހިޔާ ފްލެޓު ކުއްޔަށް ދޭ މައްސަލަ ބޮޑުވެ، ގިނަ ބައެއްގެ ފާޑުކިޔުން އެޗްޑީސީއަށް އަމާޒުވެފައިވަނިކޮށް ބިދޭސީންނަށް ކުއްޔަށް ދޫކޮށްފައިވާ ފްލެޓުތައް ހުސް ކުރުމަށް މުހުތަލެއް ދީފި
ބިދޭސީންނަށް ކުއްޔަށް ދޫކޮށްފައިވާ ފްލެޓްތައް 3 ޖެނުއަރީ 2026 ގެ ކުރިން ހުސްކުރުމަށް އަންގާފައިވާއިރު، އެ ތާރީހަށްފަހު ގަވާއިދާ ހިލާފުވާ ފަރާތްތަކުގެ ފްލެޓް އެއްބަސްވުން އުވާލާނެ ކަމަށް އެޗްޑީސީން ބުނޭ.
ހުޅުމާލޭގައި ބިނާ ކޮށްފައިވާ ހިޔާ ފްލެޓުތައް - ގަވައިދާ ޚިލާފަށް ކުށްޔަށް ދިނުމުގެ މައްސަލަ ބޮޑު
ހުޅުމާލޭ ދެ ވަނަ ފިޔަވަހީގައި ގާއިމްކޮށްފައިވާ ހިޔާ ފްލެޓުތަކުގެ ތެރެއިން ބައެއް ފްލެޓުތައް ބޮޑު އަގުގައި ކުއްޔަށް ދޭ މައްސަލަ ބޮޑުވެ، ގިނަ ބައެއްގެ ފާޑުކިޔުން ހައުސިން ޑިވަލޮޕްމެންޓް ކޯޕްރޭޝަން (އެޗްޑީސީ) އަށް އަމާޒުވެފައިވަނިކޮށް ބިދޭސީންނަށް ކުއްޔަށް ދޫކޮށްފައިވާ ފްލެޓުތައް ހުސް ކުރުމަށް މުހުތަލެއް ދީފި އެވެ.
އެޗްޑީސީން ނެރުނު ބަޔާނެއްގައި ބުނީ، ހުޅުމާލޭގައި ތަރައްގީކޮށް ޝަރުތު ހަމަވާ ފަރާތްތަކަށް ސަރުކާރުން ދޫކޮށްފައިވާ ސޯޝަލް ހައުސިން ޔުނިޓްތައް ބައެއް ފަރާތްތަކުން ގަވާއިދާ ހިލާފަށް ބިދޭސީންނަށް ކުއްޔަށް ދެމުންދާކަން ފާހަގަ ކުރެވިފައިވާ ކަމަށެވެ.
ސޯޝަލް ހައުސިންގެ ދަށުން ދޫކޮށްފައިވާ އެއްވެސް ޔުނިޓެއް އެއްވެސް ފަރާތަކުން ބިދޭސީންނަށް ކުއްޔަށް ދޫކޮށްފައިވާނަމަ 3 ޖެނުއަރީ 2026ގެ ކުރިން އެތަންތަން ހުސް ކުރުމަށް އަންގާފައިވާ ކަމަށް އެޗްޑީސީން ބުންޏެވެ. އަދި އެ ކޯޕްރޭޝަންއާއެކު ވެފައިވާ އެއްބަސްވުމާ އެއްގޮތަށް އަމަލު ކުރުމަށް ފްލެޓު ލިބިފައިވާ ފަރާތްތަކަށް ވަނީ އަންގާފަ އެވެ.
މީގެ އިތުރުން އެޗްޑީސީން ބުނީ 3 ޖެނުއަރީ 2026 ގެ ފަހުން ހުޅުމާލެއިން ދޫކޮށްފައިވާ އެއްވެސް ސޯޝަލް ހައުސިން ޔުނިޓެއް ބިދޭސީންނަށް ކުއްޔަށް ދީފައިވާނަމަ އެ ޕަރޭޝަނާއެކު ވެފައިވާ ފްލެޓު އެއްބަސްވުން އުވާލާނެ ކަމަށެވެ.
ހިޔާ ފްލެޓްތައް ބޮޑު އަގުގައި ކުއްޔަށް ދޭ މައްސަލަ ބޮޑު ވެފައިވާއިރު، މި މައްސަލައަށް އެޗްޑީސީން ހައްލެއް ހޯދިފައިނުވެ އެވެ. ފާޅުކަން ބޮޑު ގޮތެއްގައި ހިޔާ ފްލެޓުތަކުގެ ތެރެއިން ބައެއް ފްލެޓުތައް ކުއްޔަށް ދޫކުރުމަށް ޕޯސްޓުތައް ކުރެ އެވެ. މިފަހުން ވެސް 21،000 ރުފިޔާއަށް ފްލެޓު ކުއްޔަށް ދޫކުރާ ކަމަށް އާއްމު މީހަކު ކުރި ޕޯސްޓެއް ސޯޝަލް މީޑިއާގައި ވައިރަލް ވެފައިވެ އެވެ.
