ހިޔާ ޓަވަރުގައި މީހަކު ރަހީނުކުރި މައްސަލަ: 4 މީހުން ފިޔަވައި ދެން ތިބި އެންމެން ތަހުގީގު މަރުހަލާ ނިމެންދެން ބަންދުކުރުމަށް އަމުރުކޮށްފި
އަހުމަދު ޒާހިދު 5 ދުވަހަށް ބަންދުކުރުމަށް އަމުރުކޮށްފައިވޭ
ހިޔާ ޓަވަރުގައި މީހަކު ރަހީނުކުރި މައްސަލާގައި ހައްޔަރުކުރި މީހުން
ހިޔާ ފްލެޓު އެޕާޓްމަންޓެއްގައި މީހަކު ރަހީނު ކުރި މައްސަލައިގައި ހައްޔަރުކުރި މީހުންގެ ތެރެއިން ހަތަރު މީހުން ފިޔަވައި ދެން ތިބި އެންމެން ތަހުގީގު މަރުހަލާ ނިމެންދެން ބަންދުކުރުމަށް އަމުރުކޮށްފިއެވެ.
މި މައްސަލައާ ގުޅިގެން 12 ފިރިހެނުން ހައްޔަރުކޮށްފައިވަނީ 9 ނޮވެންބަރު 2024ވީ ހޮނިހިރު ދުވަހުގެ ވަގުތެއްގައެވެ. އަދި އެމީހުންގެ ބަންދާމެދު ގޮތެއް ނިންމުމަށް ކްރިމިނަލް ކޯޓަށް ހާޒިރު ކުރުމުން އޭގެ ތެރެއިން 5 މީހަކު 5 ދުވަހަށް ބަންދު ކުރުމަށް އަމުރުކޮށްފައިވާ ކަމަށާއި، ބާކީ ތިބި 7 މީހުން 7 ދުވަހަށް ބަންދު ކުރުމަށް އަމުރުކޮށްފައިވާ ކަމަށެވެ.
ބަންދުގެ މުއްދަތު އާދިއްތަ ދުވަހަށް ހަމަވާތީ ކޯޓަށް ހާޒިރުކުރުމުން ދެވަނަ ފަހަރަށް ކޯޓުން ވަނީ މުއްދަތު ޖަހާފައެވެ. އެގޮތުން އަހުމަދު ޒާހިދު (36އ) ދަންމަރު، ށ.ފޯކައިދޫ، 5 ދުވަހަށް، އަލްމާން އަލީ ޚާލިދު (22އ) ވެހި، ގދ.ވާދޫ، އިޒާން އަހްމަދު (18އ) ޒުނައިޓްވިލާ، ކ.ގުރައިދޫ އަދި މުހައްމަދު އިޒްކާން (18އ) މ.ހަތިކަނޑު، މާލެ 8 ދުވަހަށް ބަންދު ކުރުމަށް ވަނީ އަމުރުކޮށްފައެވެ.
ފުލުހުން ބުނީ ބާކީތިބި 8 މީހުން ވެސް ތަހުގީގު މަރުހަލާ ނިމެންދެން ބަންދުކުރުމަށް އަމަރުކޮށްފައިވާ ކަމަށެވެ.
ހިޔާ ފްލެޓުގެ އެޕާޓްމަންޓެއްގައި މީހަކު ރަހީނު ކުރިކަމުގެ ރިޕޯޓު ލިބިފައިވަނީ 7 ނޮވެންބަރު 2024 ވީ ބުރާސްފަތި ދުވަހުގެ ރޭ 19:40 ހާއިރެއެވެ. މައުލޫމާތު ލިބިފައިވާ ގޮތުގައި ރަހީނުކޮށްފައިވަނީ 31 އަހަރުގެ ފިރިހެނެކެވެ. އެމީހާ ހުރީ ހިޔާ ޓަވަރުގެ 20 ވަނަ ފަންގިފިލާގައި ކަން އެނގުމުން ކޯޓު އަމުރެއްގެ ދަށުން އެ އެޕާޓްމަންޓްގެ ދޮރު ވައްޓާލައިގެން ފުލުހުން އެތަނަށް ވަދެ އެމީހާ ވަނީ ސަލާމަތްކޮށްފައެވެ.
ފުލުހުން މައުލޫމާތު ދޭ ގޮތުގައި ރަހީނު ކުރި މީހާ ސަލާމަތްކުރި އިރު އެމީހާގެ ބޯ ބާލާފައިވާ ކަމަށާއި އަދި ސީނަށް ފުލުހުން ދިޔައިރު އޭނާގެ އިނގިލިތައް ބުރިކޮށްލުމަށް 12 މީހުންގެ ގޭންގުން ދިޔައީ ތައްޔާރުވަމުން ކަމަށެވެ. އަދި އެހެން ޖިސްމާނީ އަނިޔާއެއް ރަހީނުކޮށްފައި ހުރި މީހާއަށް ލިބިފައިވާ ކަން ފާހަގަނުވާ ކަމަށް ފުލުހުން ބުނެއެވެ.
މީގެ އިތުރުން ފުލުހުން ބުނީ މީހަކު ރަހީނުކުރުމުގައި އިސްކޮށް އުޅެނީ 65 މުހައްމަދު ސަލީމް ނަމަކަށް ކިޔާ މީހެއް ކަމަށެވެ. 13 ނޮވެންބަރު 2024 ވަނަ ދުވަހު އޭނާ ހައްޔަރުކޮށް އޭނާގެ ބަންދަށް 15 ދުވަސް ވަނީ ޖަހާފައެވެ. އޭނާއަކީ ކުށުގެ ރިިކޯޑު އޮންނަ މީހެކެވެ. ސްޕްރިންޑެންޓެޑް އޮފް ޕޮލިސް ނާހިދު ހުސައިން ވިދާޅުވީ މި މީހާއަކީ އުމުރުދުވަހަށް ޖަލަށްލާފައިވާ މީހެއް ކަމަށެވެ. އެގޮތުން 2016 ވަނަ އަހަރު މަސްތުވާތަކެތީގެ ޑައިނޯމިން ޓްރެފިކް ކުރުމުގެ މައްސަލައެއްގައި ކްރިމިނަލް ކޯޓުގައި ދައުވާކުރެވި 17 މާރޗް 2019 ގައި ސާބިތުވާކަމަށް ކަނޑައަޅާ އުމުރުދުވަހަށް ޖަލަށް ލާފައިވާ ކަމަށް އޭނާ ވިދާޅުވިއެވެ. އަދި މި ހުކުމް 6 އޮކްޓޯބަރ 2022 ގައި ހައިކޯޓުން ދަމަހައްޓާފައިވާ އިރު، މި މައްސަލައިގެ ހުކުމް ތަންފީޒްކުރަމުން ދަނިކޮށް 2021 ޖުލައި 8 ވަނަ ދުވަހު މީނަވަނީ ގޭބަންދަށް ބަދަލުކުރެވުނު ކަމަށެވެ. އަދި 2023 ވަނަ އަހަރު ޑައިނޯމިކް ޓްރެފިކްކުރުމުގެ އިތުރު މައްސަލައެއްގައި ހުޅުމާލޭ ކޯޓުގައި މިހާރުވެސް ޝަރީއަތް ހިނގަމުންދާކަމަށް ނާހިދު ވިދާޅުވިއެވެ.
