ހިޔާ ފްލެޓެއް 21،000 ރުފިޔާ އަށް ކުއްޔަށް ދޫކުރަން އިއުލާން ކޮށްފައި، ގިނަ ބައެއްގެ ފާޑު ކިޔުން އެޗްޑީސީ އަށް
ސޯޝަލް ހައުސިން ގެ ގޮތުގައި ދޫކޮށްފައިވާ ފުލެޓް ކުއްޔަށް ދޫނުކުރެވޭނެ ކަމަށް ސަރުކާރުން ބުނި ނަމަވެސް ބޮޑު އަގުގައި ފްލެޓުތައް ކުއްޔަށް ދަނީ ކުރަމުން. އަދި ކުލި ނުދައްކާ އެ ފްލެޓުތަކުގައި ދިރިއުޅޭ މީހުންނާ މެދު ފިޔަވަޅެއް އަޅާފައިނުވޭ.
ހިޔާ ފްލެޓް ބޭރުގައި ކުލި ކުޑަ ކުރުމަށް ގޮވާލާ ބެނާރ ދަމާފައި
ހުޅުމާލޭ ދެ ވަނަ ފިޔަވަހީގައި ގާއިމްކޮށްފައިވާ ހިޔާ ފްލެޓުތަކުގެ ތެރެއިން އެޕަރޓްމަންޓެއް 21،000 ރުފިޔާ އަށް ކުއްޔަށް ދޫކުރަން އިއުލާން ކުރުމާއި ގުޅިގެން ގިނަ ބައެއްގެ ފާޑު ކިޔުން ހައުސިން ޑިވަލޮޕްމެންޓް ކޯޕްރޭޝަން (އެޗްޑީސީ) އަށް އަމާޒު ވެއްޖެ އެވެ.
ދެކޮޓަރީގެ ފްލެޓު 21،000 ރުފިޔާ އަށް ކުއްޔަށް ދޫކުރާ ކަމަށް ކުރި އިއުލާން ގިނަ ބަޔަކު ދަނީ ސޯޝަލް މީޑިއާގައި ހިއްސާ ކުރަމުންނެވެ. އަދި ސޯޝަލް ހައުސިން ކުއްޔަށް ދޫނުކުރެވޭނެ ކަމަށް ސަރުކާރުން ބުނެފައިވާއިރު، ފާޅުކަން ބޮޑު ގޮތެއްގައި ކުއްޔަށް ދޫކުރަމުންދާ ކަމަށް އެމީހުން ބުނެފައިވެ އެވެ. އަދި ފިޔަވަޅު އަޅާނެ ކަމަށް އެޗްޑީސީން ބުނި ނަމަވެސް މިއަދާ ހަމައަށް އެޅި އެއްވެސް ފިޔަވަޅެއް ފެންނަން ނެތް ކަމަށް ވެސް ގިނަ ބަޔަކު ދަނީ ބުނަމުންނެވެ.
ހިޔާ ފްލެޓްތައް ބޮޑު އަގުގައި ކުއްޔަށް ދޭ މައްސަލަ ބޮޑު ވެފައިވާއިރު، އެފްލެޓުތަކުގެ ކުލި ނުދައްކާ މީހުން ދިރިއުޅޭ މައްސަލަ ވެސް ބޮޑުވެފައި އޮތް އިރު ދާދި ފަހުން ރައީސް މުއިއްޒު ވަނީ ކުލި ނުދައްކާ މީހުންގެ ޖުރިމަނާ ވެސް މާފު ކޮށްދީފަ އެވެ.
މީގެ ކުރިން ވެސް ހިޔާ ފްލެޓުގެ ބައެއް ފްލެޓުތަކުގެ ބައެއް އެޕަރޓްމަންޓްތައް ވަނީ 12،000 ރުފިޔާ އަށް އަދި 8000 ރުފިޔާއަށް ކުއްޔަށް ދޫކޮށްފަ އެވެ. އަދި ބައެއް ފްލެޓުތައް ބިދޭސީ މަސައްކަތްތެރިން ދިރިއުޅޭ ގޮތަށް ކުއްޔަށް ދޫކޮށްފައިވާ ކަމުގެ މައުލޫމާތު ވެސް ލިބިފައިވެ އެވެ.
މި މައްސަލައާ ގުޅޭ ގޮތުން އެޗްޑީސީގެ ބަހެއް ވަނީ ލިބޭ ގޮތް ނުވެފަ އެވެ.
11 މެއި 2023 ގައި ހުޅުމާލޭ ދެ ވަނަ ފިޔަވަހީގައި އިމާރާތްކޮށްފައިވާ ހިޔާ ފްލެޓްތަކުގެ ކުލި 5،300 ރުފިޔާއަށް ވަނީ ކުޑަކޮށްފައެވެ. އަދި މެއިންޓެނެންސް ފީއަށް 1000 ރުފިޔާ ދައްކަންޖެހެ އެވެ.
25 ބުރީގެ 16 ޓަވަރުގެ ފްލެޓުތަކުގެ ކުއްޔަށް މީގެ ކުރިން މަހަކަށް ދެއްކީ 7،500 ރުފިޔާ އަދި މެއިންޓެނެސް ފީއަށް 1،000 ރުފިޔާ އެވެ.
