ހުޅުމާލޭގެ 1.3 މިލިއަން އަކަފޫޓުގެ ލަގުޒަރީ ހައުސިން މަޝްރޫޢަށް އެކްސްޕްރެސް އޮފް އިންޓަރެސްޓު ހުށަހެޅުމަށް އެންމެ 6 ދުވަހުގެ މުހުލަތު ދިނުމުން މިއީ ވަކިބަޔަކަށް ދޫކުރުމަށް ކުރާ މަސައްކަތެއް ކަމަށް ބެލެވިގެން އެންޓިކޮރަޕްޝަން ކޮމިޝަނަށް މައްސަލަ ހުށަހަޅައިފި ވެ އެވެ. މިވަރުގެ ބޮޑު ޕްރޮޖެކްޓަކަށް 6 ދުވަހުގެ މުއްދަތުގައި ފަންނީ ދިރާސާތަކާއި ފައިނޭންޝަލް މޮޑެލް ތައްޔާރުކުރުމަކީ މުސްތަހީލު ކަމެކެވެ.
ހޯމް މިނިސްޓްރީގެ ކުރީ ގެ ސްޓޭޓް މިނިސްޓަރު އަދި އެމްޑީޕީގެ ގައުމީ މަޖިލިސް މެންބަރު އަހުމަދު ސަލީމް (މާޒް ސަލީމް)
ހުޅުމާލޭ ގެ ދެވަނަ ފިޔަވަހިން 1.3 މިލިއަން އަކަފޫޓު ގެ ބޮޑު ބިމެއް ގައި ލަގުޒަރީ ހައުސިން މަޝްރޫޢެއް ހިންގުމަށް، ހައުސިން ޑިވޮލޮޕްމަންޓު ކޯޕަރޭޝަން އިން ހުޅުވާލާފައިވާ އިރު ވަކިބަޔަކަށް މިމަޝްރޫޢު ދިނުމަށް މަސައްކަތް ކުރާ ކަމަށް ބެލެވޭތީ އެ މައްސަލަ އެންޓިކޮރަޕްޝަން ކޮމިޝަން އޭސީސީ އަށް ހުށަހަޅައިފި އެވެ.
އެ މައްސަލަ ހުށަހެޅުއްވީ ހޯމް މިނިސްޓްރީގެ ކުރީ ގެ ސްޓޭޓް މިނިސްޓަރު އަދި އެމްޑީޕީ ގެ ގައުމީ މަޖިލިސް މެންބަރު އަހުމަދު ސަލީމް (މާޒް ސަލީމް) އެވެ.
މިމަޝްރޫޢު ހިންގާނެ ބަޔަކު ހޯދުމު ގެ ނަމުގައި އެކްސްޕްރެސް އޮފް އިންޓަރެސްޓު ހުށަހެޅުމަށް ދީފައިވަނީ އެންމެ 6 ދުވަހު ގެ މުޙުލަތެވެ. އެހެންކަމުން 6 ދުވަހު ގެ މުޙުލަތު ގެ ސުންގަޑިއަކީ މިހިނގާ ޑިސެމްބަރ މަހު ގެ 25 ވަނަ ދުވަހު ގެ މެންދުރު 12:00 އަށެވެ. މިއީ މިހާތަނަށް ދިވެހިރާއްޖެ އިން ލަގުޒަރީ ހައުސިން މަޝްރޫޢެއް ހިންގުމަށް ދޫކުރާ އެންމެ ބޮޑު ބިން ކަމަށް ވާއިރު މިވަރު ގެ ބޮޑު ބިމެއްގައި މިފަދަ ބިޔަ ހައުސިން މަޝުރޫޢެއް ހިންގުމަށްރު އެކަށީގެންނުވާ މުއްދަތެއް ދީފައި ނުވާ ކަމަށް ސަލީމް ވިދާޅުވި އެވެ.
އެހެންކަމުން މިއީ ދައުލަތު ގެ މުދަލަށް އިޙުމާލުވުމާއި އަދި ކޮރަޕްޝަން އެކުލެވިފައިވާކަން ދަލާލާތު ކޮށްދޭ ކަމެއް ކަމަށް ސަލީމް ވަނީ ވިދާޅުވެފަ އެވެ.
" އެހެނީ، މިފަދަ މަޝްރޫޢުތައް ހިންގާ ވިޔަފާރިކުރާ ބޮޑެތި ކުންފުނިތަކުން ކަންބޮޑުވުން ފާޅުކުރަމުން އެދަނީ، އެންމެ 6 ދުވަސް ތެރޭގައި މިވަރު ގެ ބޮޑު މަޝްރޫޢެއް ގެ ފަންނީ ދިރާސާތައް ހަދާ ފައިނޭންޝަލް މޮޑެލްތަކާއި އެކީ ބިޑު ޑޮކިއުމެންޓު ތައްޔާރު ކުރުމަކީ މުސްތަޚީލު ކަމަކަށް ވާތީ. މިގޮތަށް އަވަސް އަރުވާލައިގެން، މިފަދަ ކަންކަމުގައި ޢަމަލުކުރާ ޢިޖުރާއަތްތަކާއި އުޞޫލުތަކާއި ޚިލާފަށް، ހުޅުމާލޭ ގެ އެންމެ ޕްރައިމް އެއް ލޮކޭޝަނުން 1.3 މިލިއަން އަކަފޫޓު ގެ ބިމެއް ވައްކަމާއި ކޮރަޕްޝަން އަށް މަގުފަހިވާ ގޮތަށް ދޫކުރުމުން އިޢާދަ ނުކުރެވޭފަދަ ބޮޑެތި ގެއްލުންތަކެއް ދައުލަތަށް ވޭ." ސަލީމް ވިދާޅުވި އެވެ.
ވަކިފަރާތަކަށް މިބޮޑު ޕުރޮޖެކުޓު ގެ ފުރުސަތު ލިބުމުން، ބިމު ގެ އެންމެ އެކަށީގެންވާ އަގު ދައުލަތަށް ނުލިބޭނެ ކަމަށް ވެސް އޭނާ ވިދާޅުވި އެވެ. މީގެ އިތުރުން، ބައިނަލްއަގުވާމީ އިންވެސްޓަރުން ރާއްޖޭގެ މާކެޓަށް އޮންނަ އިތުބާރު ގެއްލިގެން މިދަނީ ވެސް މިފަދަ ކަންކަމު ގެ ސަބަބުން ކަމަށް އޭނާ ވިދާޅުވި އެެވެ.
ސަރުކާރު ކުންފުނިތަކުން ކޮރަޕްޝަނަށް މަގުފަހިވާ ގޮތަށް ގިނަކަންތައްތަކެއް ކުރަމުންދާ ދަނޑިވަޅެއްގައި ލޯކަލް ކައުންސިލް އިންތިޚާބު ބޯމަތިވެފައި ވަނިކޮށް، މިހާކުރު މުއްދަތެއްގައި މިވަރު ގެ ބިޔަ ހައުސިން ޕުރޮޖެކްޓެއް ކުއްލިއަކަށް އިޢުލާން ކުރުމަކީ ސުވާލު އުފެދޭ ކަމެއް ކަމަށް އޭނާ ވިދާޅުވި އެވެ.
ހަމަ އެހެންމެ އެ މަޝްރޫ އަށް 6 ދުވަހު ގެ ކުރު މުއްދަތެއް ދިނުމުން، ލޯކަލް ކައުންސިލް އިންތިޚާބު ކާމިޔާބު ކުރުމު ގެ މަޤުސަދު ގައި، ވަކިބަޔަކަށް މިމަޝްރޫޢު ޙަވާލުކޮށް މިކަމުން ނާޖާއިޒު ގޮތުގައި ފައިސާތަކެއް ހޯދަނީ ކަމަށް ތުހުމަތު ކުރެވޭ ކަމަށް އޭނާ ވިދާޅުވި އެވެ. މިކަމުން ސާފުކޮށް ފެންނާން އޮތީ ދައުލަތު ގެ މުދަލަށް ފާޅުގައި އިޙުމާލުވެ މަޤާމު ގެ ބާރާއި ނުފޫޒު ބޭނުން ކޮށްގެން ނާޖާއިޒު މަންފާ ހޯދާ މަންޒަރު ކަމަށް ވެސް އޭނާ ވިދާޅުވި އެވެ.
