ހުޅުމާލޭގެ 1.3 މިލިއަން އަކަފޫޓުގެ ބިމުގައި ލަގްޒަރީ ހައުސިން މަޝްރޫއުއަކަށް އެޗްޑީސީން ކުރި އިއުލާނަކީ ސަރުކާރުން ބޭނުންވާ ބަޔަކަށް ދިނުމަށް، ވަކި ބަޔަކަށް ދުރާލާ މައުލޫމާތު ދީގެން ކުރި ކަމެއް ކަމަށެވެ. އެޗްޑީސީން މިފަދައިން އަމަލު ކުރުމާއި އެކު ދައުލަތުގެ މުދަލަށް އިހުމާލުވަމުންދާ ކަމުގެ ބޮޑެތި ތުހުމަތުތަކެއް އެޗްޑީސީ އަށް ވަނީ އަމާޒުވެފައި.
ދާންދޫ ދާއިރާގެ ކުރީގެ މެންބަރު ޔައުގޫބު އަބްދުﷲ
ހުޅުމާލޭގެ ދެވަނަ ފިޔަވަހިން 1.3 މިލިއަން އަކަފޫޓުގެ ބިޔަ ބިމެއްގައި ލަގްޒަރީ ހައުސިންގ މަޝްރޫއު އެއް ހިންގަން ހައުސިން ޑިވެލޮޕްމެންޓް ކޯޕަރޭޝަން (އެޗްޑީސީ) އިން އިއުލާން ކުރީ، ސަރުކާރުން ބޭނުންވާ ވަކި ބަޔަކަށް މަޝްރޫއު ދޭން މަގުފަހިކޮށް ދިނުމަށް، ދުރާލާ ވަކި ބަޔަކަށް އެ މައުލޫމާތު ދީގެން ކަމަށް ދާންދޫ ދާއިރާގެ ކުރީގެ މެމްބަރު ޔައުގޫބް އަބްދުﷲ ވިދާޅުވެއްޖެ އެވެ.
ޔައުގޫބް އެފަދައިން ވިދާޅުވީ ރާއްޖެޓީވީ ގެ ފަލަސުރުހީ ޕްރޮގްރާމްގައި ހޮނިހިރު ދުވަހުގެ ރޭ ވާހަކަދައްކަވަމުންނެވެ.
މިހާރު ހުރިހާ މުއައްސަސާ އެއް އޮތީ ރައީސް ޑރ.މުހައްމަދު މުއިއްޒު ގެ އަތްދަށުގައި ކަމަށާއި އެހެން ނަމަވެސް މުއައްސަސާތައް އަތްދަށު ލެވުމަކީ ޤައުމުގެ ކޮންޓްރޯލް ރައީސް އަށް ލިބޭނެ ކަމެއް ކަމަށް ހީކޮށްގެން ނުވާނެ ކަމަށް ޔައުގޫބް ވިދާޅުވި އެވެ. ޔައުގޫބު ވިދާޅުވީ، އެހެން ނަމަވެސް އެޗްޑީސީ ހިންގަނީ ސަރުކާރުން ބޭނުންވާ ގޮތަކަށް ކަމަށާއި ކުންފުނީގެ ހުރިހާ ރިސޯސްތަކެއް ވައްކަމަށް ދީލާލާތަން ފެންނަ ކަމަށް އޭނާ ވިދާޅުވި އެވެ.
ކުޑަ ރަށެއްގެ ސައިޒުގެ ބިމެއް އެޗްޑީސީ އިން އިއުލާން ކުރީ ސަރުކާރުން ބޭނުންވާ ބައެއް ނޫން އެހެން އެއްވެސް ބަޔަކަށް އެ ބިމަށް ކުރިމަތި ނުލެވޭ ގޮތަށް ކަމަށް ޔައުގޫބް ވިދާޅުވި އެވެ. އެވަރުގެ ބޮޑު ބިމަކަށް ހުށަހަޅާ އިރު ތައްޔާރު ކުރަން ޖެހޭ ލިޔެކިޔުންތައް ތައްޔާރުކުރުމަށް މަހެއް ހާ ދުވަސް ހޭދަވާނެ ކަމަށް ޔައުގޫބް ވިދާޅުވި އެވެ.
"ވަކިބަޔަކަށް ބޭނުންވާ މައުލޫމާތު ދީ ހުރިހާ ކަމެއް ތައްޔާރުކޮށް ނިމުނީމަ މި އިއުލާން ކުރީ. ހަގީގަތުގައި މިއަދަކީ އޭސީސީ ޒިންމާ އަދާ ނުކޮށް ފެއިލްވީ އަނެއް ދުވަސް. އޮޑިޓަރ ޖެނެރަލް ވެސް ރަނގަޅަށް މަސައްކަތް ކުރާ ނަމަ މިކަން ހުއްޓާލަން އަންގާނެ." ޔައުގޫބް ވިދާޅުވި އެވެ.
އެޗްޑީސީން އިއްޔެ ކުރި އިއުލާނުގައި ބުނެފައި ވަނީ އެ މަޝްރޫއު ހިންގުމަށް ޝައުގުވެރިވާ ފަރާތްތަކަށް އެކްސްޕްރެޝަން އޮފް އިންޓްރެސްޓް (އީއޯއައި) ހުށަހެޅުމުގެ ސުންގަޑި އަކީ އަންނަ ބުރާސްފަތި ދުވަހުގެ މެންދުރު 12:00 ކަމަށެވެ. މިއީ މިހާތަނަށް ހުޅުމާލެއިން ލަގްޒަރީ ހައުސިންގ މަޝްރޫއެއް ހިންގަން ދޫކުރާ އެންމެ ބޮޑު ބިމެވެ. 15 ބުރިއަށް އިމާރާތް ކުރުމުގެ ހުއްދަ ލިބޭ އެ ސަރަހައްދުން އެ މަޝްރޫއު އަށް ދޫކުރަން ނިންމާފައި ވަނީ 125,387.81 އަކަފޫޓުގެ ބިމެކެވެ. އެ ބިމާއެކު އެ މަޝްރޫއު ހިންގާ ބަޔަކަށް ބޭނުންކުރެވޭ ޖުމުލަ ބިމުގެ ބޮޑުމިނަކީ 1.3 މިލިއަން އަކަފޫޓެވެ.
އެޗްޑީސީން މިފަދައިން އަމަލު ކުރުމާއި އެކު ދައުލަތުގެ މުދަލަށް އިހުމާލުވަމުންދާ ކަމުގެ ބޮޑެތި ތުހުމަތުތަކެއް އެޗްޑީސީ އަށް ވަނީ އަމާޒުވެފަ އެވެ.
