ދިފާޢީ ވަކީލުންގެ ގޮތުގައި މަސައްކަތް ކުރާ ފަރާތްތަކަށް ނިސްބަތް ކޮށް އަސާސެއް ނެތް ތުހުމަތުތައް ނުކުރުމަށް ބާރ ކައުންސިލުން އިލްތިމާސްކޮށްފި
ކްރިމިނަލް ކޯޓުގެ ޝަރީއަތް ނިމުނު ގޮތުގެ ރިޕޯޓެއްގައި ދިފާއީ ވަކީލުން ހެކިންނަށް ބިރުދައްކާކަމަށް ބުނެފައިވާތީ ބާރ ކައުންސިލުން ކަންބޮޑުވުން ފާޅުކޮށްފައިވޭ. އެ ތުހުމަތަކީ ހެއްކަކާ ނުލައި ދިފާއީ ވަކީލުންނަށް އަމާޒުވެގެންދިޔަ ކަމެއްކަމަށާއި މިކަން އާންމުންގެ އިތުބާރަށް ނޭދެވޭ އަސަރުކުރާނެ ކަމަށް ބުނެފައިވޭ
ދިފާޢީ ވަކީލަކު ކޯޓު ރޫމެއްގައި
ދިފާޢީ ވަކީލުންގެ ގޮތުގައި މަސައްކަތްކުރާ ފަރާތްތަކަށް ނިސްބަތްކޮށް އަސާސެއް ނެތް ތުހުމަތުތައް ނުކުރުމަށް ބާރ ކައުންސިލުން އިލްތިމާސްކޮށްފި އެވެ.
ދިފާއީ ވަކީލުންގެ ގޮތުގައި މަސައްކަތް ކުރައްވާ ފަރާތްތަކުން ހެކިންނަށް ބިރުދައްކާ ކަމަށް ކްރިމިނަލް ކޯޓުގެ ޝަރީއަތް ނިމުނު ގޮތުގެ ރިޕޯޓެއްގައި ބުނެފައިވާތީ އެކަމާ ގުޅިގެން ބާރ ކައުންސިލުން ނެރުނު ބަޔާނުގައި ބުނެފައިވަނީ ކްރިމިނަލް ކޯޓުގެ ނަންބަރު ޤަޟިއްޔާގެ "ޝަރީޢަތް ނިމުނުގޮތް" ގައި، "ދިފާއީ ގޮތުން ވަކާލާތު ކުރައްވާ ވަކީލުން އެކި ގޮތްގޮތުން ހެކިންނަށް ބިރު ދައްކައި ފުރާނައަށް ނުރައްކާވާނޭފަދަ ހަމަލާއެއް ދޭނެ ކަމަށް ބުނެ، އިންޒާރުދީ ހަދާކަން ދިވެހިރާއްޖޭގެ ހައި ކޯޓުގެ ނަންބަރު ޤަޟިއްޔާއަށް ބެލުމުންވެސް އެނގެން އޮންނައިރު، މިކަމަކީ ހިނގާ ކަމެއް ކަމާއި، އަދި މިއީ ޖިނާއީ އަދުލުގެ ނިޒާމަށް އޮތް ބޮޑު ގޮންޖެހުމެއް ކަމަށް މިވަނީ ވެފައެވެ."، މިހެން ބަޔާންކޮށްފައިވާ ކަމަށެވެ. އަދި އެ ޙުކުމާ ގުޅިގެން މީޑިއާ ގެ މަންސަތަކުގައި ޤާނޫނީ ވަކީލުންނަށް ނިސްބަތްވާގޮތަށް ޚަބަރުތައް ފަތުރަމުންދާކަން ފާހަގަކުރެވިފައިވާ ކަމަށެވެ.
އެ ކައުންސިލްގެ ބަޔާނުގައި ބުނެފައިވަނީ ކްރިމިނަލް ކޯޓުގެ ޤަޟިއްޔާގެ "ޝަރީޢަތް ނިމުނުގޮތް" ގައި ދިފާޢީ ވަކީލުންނަށް ނިސްބަތްވާގޮތަށް ފާހަގަކުރި ޢިބާރާތަކީ، ހެއްކެއްގެ މައްޗަށް ނުވަތަ ކްރިމިނަލް ކޯޓުގެ އެ ޤަޟިއްޔާގައި ޤާނޫނީ ވަކީލުގެ ފުށުން ހިނގާފައިވާ ވަކި ޢަމަލެއްގެ މައްޗަށް ބިނާކުރުމަކާ ނުލައި ޖިނާއީ ޢަދުލުގެ ނިޒާމުގައި ދިފާޢީ ވަކީލުންގެ ގޮތުގައި ބުރަކޮށް މަސައްކަތްކުރައްވާ މަދު ޤާނޫނީ ވަކީލުންނަށް އަމާޒު ވެގެން ދިޔަ ކަމެއްކަމުގައި ފާހަގަކުރެވޭ ކަމަށެވެ.
އަދި، އެ މައްސަލައިގެ ޙުކުމާ ގުޅިގެން ބައެއް މީޑިއާތަކުގައިވެސް ޚަބަރު ފަތުރާފައިވާގޮތުން މި ޢިބާރާތް އެއަށްވުރެ ފުޅާކޮށް ރައްދުވެ، ދިފާޢީ ވަކީލުންނާމެދު މުޖުތަމަޢުގައި ނުރަނގަޅު ތަޞައްވުރެއް އުފެދި ދިފާޢީ ވަކީލުންނަކީ ކުށުގެ ޢަމަލުތަކެއް ހިންގާ ބައެއްގޮތުގައި ސިފަކުރެވުމަކީ، ޢަދުލު އިންޞާފުގެ ނިޒާމަށް އަދި ޤާނޫނީ ފަންނަށް އާންމުންގެ އޮންނަ އިތުބާރަށް ވެސް ނޭދެވޭ އަސަރުތަކެއްކުރާނެ ކަމެއްކަމުގައި ބާ ކައުންސިލަށް ޤަބޫލުކުރެވޭތީ އާއި، ޤާނޫނު ނަންބަރު 5/2019 (ދިވެހިރާއްޖޭގެ ޤާނޫނީ ފަންނުގެ ޤާނޫނު) ގެ 5 ވަނަ މާއްދާގައި ބަޔާންކޮށްފައިވާ ޤާނޫނީ ފަންނުގެ ޤާނޫނުގެ މަ ޤުޞަ ދުތަކުގެ ތެރޭގައި، ޤާނޫނީ ވަކީލުންގެ ޙައްޤުތަކާއި އިމްތިޔާޒުތައް ޙިމާޔަތްކުރަންވާނެކަމަށާއި، ޤާނޫނީ ޚިދުމަތަށް އާންމުން ކުރާ އިތުބާރު ދެމެހެއްޓުންވެސް ހިމެނިފައިވާތީ، މިކަމާ ގުޅިގެން ހުރި ކަންބޮޑުވުންތައް ބާ ކައުންސިލުގެ ފަރާތުން ކްރިމިނަލް ކޯޓާ ހިއްސާކޮށްފައިވާނެ ކަމަށެވެ.
އެއްވެސް އިދާރާއެއްގައި ނުވަތަ ކޯޓެއްގައިވިޔަސް ހިނގަމުންދާ މައްސަލައެއްގައި ނުވަތަ ތަޙުޤީޤުކުރެވެމުންދާ މައްސަލައެއްގައިކަމަށްވިޔަސް، ހެއްކަކަށް ނުފޫޒު ފޯރުވުމާއި، ނުފޫޒު ފޯރުވަން މަސައްކަތްކުރުންފަދަ ޢަމަލުތައް، އާންމު ފަރުދެއް، ޤާނޫނު ތަންފީޒުކުރާ މުވައްޒަފެއް، ދައުލަތުގެ ވަކީލެއް ނުވަތަ ދިފާޢީ ވަކީލެއް ނުވަތަ އެހެން ފަރާތަކުން ކުރިކަމުގައިވިޔަސް އެކަމުގައި ޤާނޫނުތަކުގެ ދަށުން ފިޔަވަޅު އެޅޭނެ ނިޒާމު ޤާއިމުވެފައިވާއިރު، ޖިނާއީ މައްސަލަތަކުގައި ދަޢުވާލިބޭ ފަރާތްތަކަށް ޤާނޫނުއަސާސީއިން ކަށަވަރުކޮށްދީފައިވާ އެންމެ އަސާސީ އެއް ޙައްޤުކަމުގައިވާ ޤާނޫނީ ވަކީލެއްގެ އެހީތެރިކަން ހޯދުމަށް އޮންނަ ޙައްޤު ފޯރުކޮށްދޭ ވަކީލުންނަށް ނިސްބަތްކޮށް އެ ވަކީލުންނަކީ ކުށްވެރިންކަމަށް ނުވަތަ ކުށުގެ ޢަމަލު ހިންގާ ފަރާތްތަކެއްކަ މަށް އާންމުންނަށް ދޭހަވާގޮތަށް އެއްވެސް ހެއްކަކާ ނުލައި ދައުލަތުގެ އެއްވެސް އިދާރާއަކުން، ޝަރުޢީ ކޯޓަކުން ނުވަތަ އާންމު ފަރާތަކުންވެސް އެފަދަ ތުހުމަތު ރައްދުކުރުން ބާ ކައުންސިލް އިން ކުށްވެރިކުރަންބާރ ކައުންސިލް
ބާރ ކައުންސިލުން ބުނީ މި ކަންކަމަކީ އިންސާފުވެރި ޝަރީޢަތުގެ ޙައްޤަށް ހުރަސްއެޅިގެންދާނެ އަދި ޢަދުލު އިންސާފުގެ ނިޒާމާމެދު އޮންނަ އިތުބާރު ގެއްލޭނެ ކަމެއް ކަމުގައި ބާރ ކައުންސިލުން ދެކޭ ކަމަށެވެ.
ދިވެހިރާއްޖޭގެ ޤާނޫނީ ފަންނުގެ ޤާނޫނުގެ މަޤްޞަދުތަކަށް ބަލާއިރު، ޤާނޫނީ ވަކީލުންގެ ފަންނަކީ، އެ ފަންނުގައި މަސައްކަތްކުރާ ޤާނޫނީ ވަކީލުންގެ ޙައްޤުތަކާއި، އިމްތިޔާޒުތައް ޙިމާޔަތްކޮށް ރައްކާތެރިކުރެވެން ވާނެ ބައެއްކަން ސާފުކޮށް އެނގެން އޮންނަ ކަމަށެވެ. އަދި ޤާނޫނީ ވަކީލުންގެ ސުލޫކާގުޅޭ މައްސަލައެއް ފާހަގަކުރެވިއްޖެނަމަ، ދިވެހިރާއްޖޭގެ ޤާނޫނީ ފަންނުގެ ޤާނޫނާއި، ޤާނޫނީ ވަކީލުންގެ ސުލޫކީ މައްސަލަ ބެލުމާބެހޭ ގަވާއިދު އަދި ޤާނޫނީ ވަކީލުންގެ ސުލޫކީ ގަވާއިދާ އެއްގޮތްވާގޮތުގެ މަތިން ސުލޫކީ މައްސަލަ ހުށަހެޅުމުގެ ނިޒާމެއް ގާއިމުކުރެވިފައިވާ ކަމަށެވެ.
އެގޮތުގެ މަތިން އެފަދަ މައްސަލަތައް ބާރ ކައުންސިލަށް ހުށަހެޅުމަށް އެއްވެސް ހުރަހެއް ނެތް ކަމަށް ބުނެފައިވެ އެވެ. އަދި ޤާނޫނީ ވަކީލުންގެ ސުލޫކާ ގުޅިގެން ހުށަހެޅޭ މައްސަލަތައް ޤާނޫނާއި ގަވާއިދު ތެރެއިން މިހާރުވެސް ބާރ ކައުންސިލުން ބަލައި، ފިޔަވަޅު އަޅަންޖެހޭ މައްސަލަތަކުގައި ފިޔަވަޅު އަޅަމުންދާނެ ކަމަށް ބުނެފައިވެ އެވެ.
ބާރ ކައުންސިލުން ވަނީ ދިފާޢީ ވަކީލުންގެ ގޮތުގައި މަސައްކަތްކުރާ ފަރާތްތަކަށް ނިސްބަތްކޮށް އަސާސެއް ނެތް ތުހުމަތުތައްކުރުމުން ދުރުހެލިވުމަށް އިލްތިމާސް ކޮށްފައިވެ އެވެ.
