ޕޮންޒީ ސްކީމް ގެ މައްސަލަ: 15 ދުވަހު ގެ ތެރޭގައި ފަސް ލައްކަ އަށްވުރެ ގިނަ ރުފިޔާ ދައްކަން ޣައިރު ހާޒިރު ގައި އަލްހާން ފަހުމީ އާއި އޭނާ ގެ ދެ ކޮއްކޮ ގެ މައްޗަށް ހުކުމް ކޮށްފި
ކިންގްސް ކެޕިޓަލް ކުންފުނިން ގިނަ ބައެއްގެ އަތުން ފައިސާ ނަގައި އަނބުރާ ނުދިން މައްސަލާގައި ޓެކުމުގެ 13 ދައުވާ ޕީޖީން އަނބުރާ ގެންދިޔަ އެވެ. ދައުވާލިބޭ ފަރާތްތަކުން ބަދަލު ދީފައިވާކަމަށް ބުނެ އިތުރަށް ކުރިއަށް ގެންދަން ބޭނުންނުވާ ކަމަށް ބުނި ނަމަވެސް ސިވިލް ކޯޓުން އެ ފަރާތްތަކުގެ ގައިރު ހާޒިރުގައި ހއ. ހޯރަފުށީ މީހަކަށް 15 ދުވަހުގެ ތެރޭގައި 587،466 ރުފިޔާ ދައްކުމަށް ހުކުމްކުރި އެވެ.
ރައްޔިތުންގެ މަޖިލީހުގެ ކުރީގެ މެންބަރު އަލްހާން ފަހުމީއާއި އޭނާ ގެ ދެ ކޮއްކޮ
ޕްންޒީ ސްކީމާ ގުޅިގެން ގެއްލުން ވެފައިވާ ބަޔަކަށް 15 ދުވަހުގެ ތެރޭގައި ބައި މިލިއަނެއްހާ ރުފިޔާ ދެއްކުމަށް ރައްޔިތުންގެ މަޖިލީހުގެ ކުރީގެ މެންބަރު އަލްހާން ފަހުމީ އާއި އޭނާ ގެ ދެ ކޮއްކޮގެ މައްޗަށް ހުކުމް ކޮށްފި އެވެ.
އަލްހާން އާއި އޭނާ ގެ ދެ ކޮއްކޮ ގެ މައްޗަށް 587،466 ރުފިޔާ 15 ދުވަހުގެ ތެރޭގައި ދެއްކުމަށް ހުކުމް ކޮށްފައި ވަނީ ކިންގްސް ކެޕިޓަލް ކުންފުނިން އިންވެސްޓްމަންޓް ސްކީމް އެއް ހިންގުމުގެ ނަމުގައި، ގިނަ ބައެއްގެ އަތުން ފައިސާ ނަގައި އެ ފައިސާ އަނބުރާ ނުދިން މައްސަލާގައި އެ ކުންފުނީގެ މެނޭޖިން ޑިރެކްޓަރު އަލްހާން ފަހުމީ އާއި އޭނާ ގެ ދެ ކޮއްކޮއިންގެ މައްޗަށް އުފުލި ޓެކުމުގެ ކުށުގެ 13 ދައުވާ އަނބުރާ ގެންދަން ޕްރޮސެކިއުޓާ ޖެނަރަލްގެ އޮފީހުން ނިންމައި އެކަން އިއުލާން ކުރި ފަހުންނެވެ.
މިދިޔަ އޮކްޓުބަރު މަހުގެ 30 ވަނަ ދުވަހު ޕީޖީ އޮފީހުން ބުނީ، މި ދައުވާތައް ކޯޓުގައި ހިނގަމުންދަނިކޮށް، ދައުވާ ލިބޭ ފަރާތްތަކުން ކުރި ކަމަށް ތުހުމަތުކުރެވޭ ކުށާ ގުޅިގެން ބަދަލު ލިބެންޖެހޭ 13 (ތޭރަ) ފަރާތަށް ބަދަލުދީ ޚަލާސް ކޮށްފައިވާކަމަށް ބަޔާންކޮށް، ދައުވާތައް މުރާޖައާކޮށް ދިނުމަށް ދައުވާލިބޭ ފަރާތްތަކުން އެދިފައިވާ ކަމަށެވެ. އެކަމާ ގުޅިގެން ދިވެހި ފުލުހުން މެދުވެރިކޮށް މައުލޫމާތު ސާފުކުރިއިރު، މި މައްސަލާގައި ބަދަލު ލިބޭން ޖެހޭ މީހުންނަށް ބަދަލު ލިބިފައިވާ ކަން ކަށަވަރުވެފައިވާ ކަމަށް އޭރު ޕީޖީން ބުނެ އެވެ. އަދި މި މައްސަލަ އިތުރަށް ކުރިއަށް ގެންދަން ބޭނުން ނުވާ ކަމަށް އެ ފަރާތްތަކުން ބުނެފައިވާ ކަމަށް ފުލުހުން ބުނާ ކަމަށް ވެސް ޕީޖީން އޭރު ބުނެފައިވެ އެވެ.
މި މައްސަލަ ބަލާ ސިވިލް ކޯޓުގެ ގާޒީ ހާފިޒާ އަބްދުއްސައްތަރު ކުރި ހުކުމުގައިވާ ގޮތުން، ކޯޓަށް ހާޒިރުވާން އަލްހާން އަދި އޭނާ ގެ ދެ ކޮއްކޮ އަށް އާއްމުކޮށް އަންގައި އިއުލާނު ވެސް ކުރިއެވެ. އެހެންނަމަވެސް އެ ފަރާތްތަކުން ކޯޓަށް ހާޒިރު ވެފައެއް ނުވެ އެވެ. އެހެންވެ މައްސަލަ ނިންމީ އެ ފަރާތްތަކުގެ ޣައިރު ހާޒިރުގަ އެވެ.
އެ މައްސަލަ އިތުރަށް ކުރިއަށްގެންދަން ބޭނުންނުވާކަމަށް އެ ފަރާތްތަކުން ބުނެފައިވާ ކަމަށް ޕީޖީން އިއުލާން ކޮށްފައިވަނިކޮށް، ސިވިލް ކޯޓުން ހުކުމް ކުރީ، ހއ. ހޯރަފުށީ މީހެއްގެ އަތުން އެ ސްކީމަށް ނެގި ފައިސާތަކެއް ދައްކާށެވެ. އެ ފައިސާގެ ތެރޭގައި ޕޮންޒީ ސްކީމަށް އިންވެސްޓް ކުރި ފައިސާ އާއި، ފައިދާ ގެ އިތުރުން ވަކީލު ފީ ވެސް ހިމެނެ އެވެ.
