"ތިކަންކަމާއި ސީރިއަސްކޮށް އެޓެންޑް ވާނަން"

މި ސަރުކާރު ވެރިކަމަށް އައިސް މިއީ ރައްޔިތުންނަށްޓަކައި ކުރާ ވެރިކަމެއް ކަމަށް ދެއްކުމުގެ ގޮތުން ރައްޔިތުންނާއި ކައިރިން ބައްދަލުކުރުމުގެ ނަމުގައި އެތައް ބައްދަލުވުމެއް ދަނީ ބާއްވަމުންނެވެ. ވިލިމާލޭގައި ފުރަތަމަ ބައްދަލުވުން ބޭއްވިއިރު، ދެ ވަނަ ބައްދަލުވުން އޮތީ މައްޗަންގޮޅީގަ އެވެ. ތިން ވަނަ ބައްދަލުވުން މާފަންނުގައި އޮތްއިރު، ހަތަރު ވަނަ ބައްދަލުވުން އޮތީ ހެންވޭރުގަ އެވެ. އެފަހުން ހުޅުމާލެ ފޭސް 1 އަދި 2 ގައި ވެސް މި ބައްދަލުވުންތައް ބާވައިފި އެވެ. 

ކޮންމެއަކަސް މި ބައްދަލުވުންތަކަކީ ރައްޔިތުންގެ އަޑުއަހަން ބާއްވާ ބައްދަލުވުންތަކެއް ކަމަށް ދައްކާ މެންދަމުން އަލިވާ އިރު މި ކުޅޭ ކުޅިވަރު ރައްޔިތުންނަށް ވަރަށް ސާފެވެ. މިއީ ކުރިއަށް އޮތް ލޯކަލް ކައުންސިލް އިންތިހާބާއި ގުޅިގެން ރައްޔިތުންގެ ލޮލުގައި އަޅުވާ އަދުނެވެ. މި ބައްދަލުވުންތައް ކުރިއަށް ގެންދަނީ ކޮންޓްރޯލް ކޮށްގެން ވަކި ބަޔަކަށް ފުރުސަތު ދޭން މަސައްކަތް ކުރާ އުސޫލުންނެވެ. ނަމަވެސް މިއަދު އެއަށްވުރެ ރައްޔިތުން ހޭލުންތެރި އެވެ. މައިކް އަތުލައިގެން ނަމަވެސް ދައްކަންޖެހޭ ވާހަކަ ދައްކަ އެވެ. 

ރައީސް ޑރ. މުހައްމަދު މުއިއްޒު ވެރިކަމަށް ވަޑައިގެން ދެ އަހަރު ފުރިފައިވާއިރު، ރިޔާސީ އިންތިހާބު ގައި ރައްޔިތުންނަށް ވިދާޅުވި ވައުދުތަކުގެ ތެރެއިން ގިނަ ވައުދުތަކެއް މިހާތަނަށް ފުއްދާފައި ނުވާ އިރު، 2 އަހަރު ތެރޭގައި ބޭއްވުނު ހުރިހާ ބައްދަލުވުމެއް ގައި ވެސް ޖަލްސާ އެއްގައި ދައްކަނީ އެއް ވާހަކަ އެކެވެ. ވެރިކަމުގެ ތިން ވަނަ އަހަރު ފަށާފައިވާއިރު، އަދިވެސް ވަމުންދަނީ ރިޔާސީ އިންތިހާބު ގައި ވި ވައުދުތަކެވެ. 

ރައީސް މުއިއްޒު ވެރިކަމަށް އައުމުގެ ކުރިން ވި އެންމެ ބޮޑު ވައުދުތަކުގެ ތެރޭގައި އާސަންދަ އަދި އެންސްޕާގެ ހަރަދު ކުޑަކޮށް ސިއްހީ ނިޒާމް ހަރުދަނާ ކުރުން ހިމެނެ އެވެ. ނަމަވެސް މިހާތަނަށް ވެސް އެ މައްސަލަތައް ހައްލު ނުކުރެވިފައިވާއިރު، ޔޫރަޕުގެ ކޮލިޓީ ބޭސް ގެންނާނެ ކަމަށް ވިދާޅުވި ވައުދު ފުއްދުމުގައި ވެސް ވަނީ ފެއިލްވެފަ އެވެ. އަދިވެސް ރައްޔިތުން ކައިރިއަށް ވަޑައިގަންނަވަނީ ހަމަ އެ ވައުދު ހިފައިގެންނެވެ. 2 އަހަރު ވި އިރު ވެސް އެ ވައުދެއް ނުފުދުނެވެ. 

އެންސްޕާގެ އެހީ ނުލިބި އެތައް ރައްޔިތަކު ނާށިގަނޑު ހިފައިގެން ސަލާން ޖަހަން މަޖުބޫރުވެފައިވާއިރު، ރާއްޖެއިން ބޭރަށް ފަރުވާއަށް ދެވެނީ ސިޔާސީ މީހާއާއި ގާތްގުޅުމެއް އޮންނަ މީހަކަށް ކަމަށް ރަށުތެރެއިން ދެކެވޭ ވާހަކައާއި ރައީސްގެ ބައްދަލުވުންތަކުގައި އާންމުންގެ ޝަކުވާއިން އެނގެ އެވެ. ބޭސް ސިޓީއަށް ސަލާން ޖެހުން އަދިވެސް ހުއްޓުވިފައެއް ނުވެއެވެ. މިއީވެސް ވައުދެކެވެ. 2 އަހަރުވި އިރު އަދިވެސް ވަޑައިގަންނަވަނީ މި ވައުދުފުޅާއެކު އެވެ. 

ހުޅުމާލޭ ރައްޔިތުން ކައިރީގައި ރިޔާސީ އިންތިހާބުގެ ވައުދެއްގެ ގޮތުގައި ރައީސް މުއިއްޒު ވިދާޅުވީ 10 ބުރިއަށް ހުޅުމާލޭގެ އަމިއްލަ ފަރާތްތަކުގެ ގެތައް ނެގޭނެ ކަމަށެވެ. ނަމަވެސް ދެ އަހަރު ފަހުންވެސް އިހައްދުވަހަކު އަނެއްކާ ވެސް ހަމަ އެ ވައުދު ވެވަޑައިގެންނެވީ އެވެ. މުޅި ދައުލަތުގެ ހުރިހާ އާރާބާރެއް އޮވެ މިފަދަ ވައުދެއް ނުފުއްދުމުން މި ރައީސް ރައްޔިތުންނާ ވެވަޑައިގަންނަވާ ވައުދުފުޅުތަކަކީ އަސްލު ވެސް ހަމަ ހަގީގަތުގައި ވެސް ރައްޔިތުންނަށްޓަކައި ރައްޔިތުންގެ ފަޅީގައި ހުންނަވާ ވެވަޑައިގަންނަވާ ވައުދުފުޅުތަކެއް ކަމާމެދު ސުވާލު އުފެދެ އެވެ. 

ކޮރަޕްޝަނަށް ޒީރޯ ޓޮލެރެންސް ކަމަށް ރައީސް މުއިއްޒު ވިދާޅުވި އިރު، ކޮރަޕްޝަންގެ ތުހުމަތުގައި މަގާމުތަކުން ދުރުކުރި އެންމެން ތިބީ ރައީސްގެ އަރިހުގައި އިސް ސަފުގަ އެވެ. މީގެ ތެރޭގައި ސްޓެލްކޯ ގެ އެމްޑީ ކަމުގައި ހުރި ހުސައިން ފަހުމީ، އެޗްޑީސީ ގެ އެމްޑީ ފަޒުލް ރަޝީދު، މޯލްޑިވް ގޭސް ގެ އެމްޑީ އަބްދުﷲ މުހައްމަދު، އަދި އެފްއެސްއެމް ގެ އެމްޑީ ކަމުގައި ހުރި އިސްމާއިލް ސުހައިލް ހިމެނެ އެވެ.

މި އެންމެންވެސް މިއަދު ތިބީ ސަރުކާރުގެ ސިޔާސީ އިސް މަގާމުތަކުގައާއި ރައީސް އޮފީހުގެ އިތުރުން ޕީއެންސީގެ އިސް މަގާމުތަކުގަ އެވެ. ކޮރަޕްޝަންގެ ވާހަކަ ހިފައިގެން ދާ މުވައްޒަފު ކަނޑާލާ އިރު، ކްލޯސްޑް ބިޑު އުސޫލުން ޕްރޮޖެކްޓްތަކާއި މަސައްކަތްތައް ދަނީ ހަވާލު ކުރަމުންނެވެ. މިދިޔަ މަހުގެ ކުރީކޮޅު ބީލަމަށް ނުލައި ބަހާލި 206 ޕްރޮޖެކްޓުތައް ބަހާލި ގޮތް، އޮޑިޓަރ ޖެނެރަލްގެ އޮފީހުން ބަލާ ސަރުކާރުތަކުގެ ތެރެއިން ރާވައިގެން ހިންގާ ކޮރަޕްޝަނުގެ އަމަލުތަކުގެ މިންގަނޑަށް ފެތެ އެވެ. 

މިއީ ހުސް ވައުދުތަކެވެ. ރައީސް މުއިއްޒުގެ ވައުދުތަކުގެ ލިސްޓު ކިތައްމެހާ ވެސް ދިގެވެ. ކިތައްމެހާ ވެސް ރައްޔިތުން ބޭނުންވާ ކަންކަމެވެ. ނަމަވެސް މި ވައުދުތަކަކީ ހުސް ސީރިއަސްކޮށް ވިސްނަވާ ކަންތަކެވެ. 2 އަހަރުވި އިރުވެސް "ތިކަމާއި ހަމަ ސީރިއަސް ކޮށް ވިސްނަވަނީ" އެވެ. 

ކޮންމެ ބައްދަލުވުމެއްގައި ވެސް ރައްޔިތުން ލައްވާ ލައްކަ އާދޭހެއް ކުރުވުމަށްފަހު ތަހުތުން ތެދުވެވަދައިގެން ހުންނަވާ ވިދާޅުވަނީ އެންމެ ވާހަކަފުޅެކެވެ. "އަދިވެސް ބޭފުޅުން ފުރުސަތު ބޭނުންފުޅުވެއްލައްވާކަން އެނގޭ. ނަމަވެސް ކޮންމެ ބައްދަލުވުމެއްގައި ވެސް ވީވަރަކުން މިދަނީ ފުރުސަތު ދެމުން. އެހެން ވަނީ ކުރިން ބައްދަލުވުންތައް ބޭއްވިފައި ނެތުމުން ކަމަށް އެނގޭ. އެހެންވީމާ އެ ފުރުސަތު ބޭނުންވެލައްވާ ވަރަކުން މިދަނީ ފުރުސަތު ދެމުން. ދެން މިއިން ކޮންމެ ކަމަކީ ވެސް މުހިންމު ވާހަކަފުޅެއް ވިދާޅުވަނީ. މި ބައްދަލުވުމުގައި ތި ފާހަގަކުރައްވާ ކޮންމެ ކަމަކީ އަޅުގަނޑު އެކަމަކަށް ވަރަށް ސީރިއަސްކަމާ އެކު އެޓެންޑްވާނެ ކަންތައްތައް"  މިހެންނެވެ. 

ނަމަވެސް މިއިން ކަމަކާއި 2 އަހަރުވި އިރުވެސް މަނިކުފާނު ސީރިއަސްކޮށް ވިސްނެވި ނަމަ ރައްޔިތުން އެއް ޝަކުވާ އެއް 2 އަހަރު ވަންދެން ނުކުރާނެ އެވެ.