ހޯމަ ވިލޭރޭ ހުޅުމާލެ ފޭސް 1 ގެ ރައްޔިތުންނާ ބައްދަލުކުރައްވައި ރައީސް މުއިއްޒު ވިދާޅުވީ އެއް އަހަރަށް ވުރެ ގިނަ ދުވަސް ވާނުވާ ބަންދުގައި ތިބި މީހުންގެ ކޯޓު މަރުހަލާތައް އަންނަ މާޗް މަސް ނިމުމުގެ ކުރިން ނިމޭނެ ކަމަށް.
ހުޅުމާލޭ ގައި ހުންނަ ޖަސްޓިސް ބިލްޑިންގ އެނެކްސް
ޝަރުއީ ކޯޓުތަކުން މައްސަލަތައް ބަލާ ނިންމާނެ ތާރީޚު ކަނޑައަޅުއްވަން ރައީސް ޑރ. މުހައްމަދު މުއިއްޒު ފައްޓަވަފި އެވެ.
މި ގޮތުން ހޯމަ ވިލޭރޭ ހުޅުމާލެ ފޭސް 1 ގެ ރައްޔިތުންނާ އެކު ރައީސް މުއިއްޒު ބޭއްވެވި ބައްދަލުވުމުގައި ވާނުވާ ބަންދުގައި ގިނަ ދުވަސް ވަންދެން ތިބި މީހުންގެ ޝަރީއަތް ނިމޭނެ ތާރީޚު މުއިއްޒު ވަނީ ދެއްވާފަ އެވެ.
ޝަރުއީ ދާއިރާ އަށް ނުފޫޒު ނުފޯރުވާ ކަމަށް ތަކުރާރުކޮށް ވިދާޅުވެފައިވާ ރައީސް މުއިއްޒު ވިދާޅުވީ، އެއް އަހަރަށް ވުރެ ގިނަ ދުވަސް ވަންދެން ވާނުވާ ބަންދުގައި ތިބި މީހުންގެ ކޯޓު މަރުހަލާތައް އަންނަ މާޗް މަސް ނިމުމުގެ ކުރިން ނިމޭނެ ކަމަށެވެ.
"އެއް އަހަރަށް ވުރެ ގިނަވެފައި ތިބި ފަރާތްތައް ކުރިއަށް އޮތް ތިން މަހެއްހާ ދުވަހުގެ ތެރޭގައި އެއްކޮށް ކޯޓު މަރުހަލާތައް ނިމި، ކޮންމެސް ގޮތެއް ނިމޭ އެބަ. މާ ގިނަ ދުވަހެއް މި ކަމުގައި ނުވާނެ،" ކަމަށް ރައީސް މުއިއްޒު ވިދާޅުވިއެވެ.
ވާނުވާ ގައި ބަންދުކޮށްފައި ތިބި މީހުންގެ މައްސަލަ ހައްލުކޮށްދެއްވާނެ ކަމަށް ރިޔާސީ އިންތިޚާބުގައި މުއިއްޒު ވައުދުވެވަޑައިގެންފައިވީ ނަމަވެސް ސަރުކާރަށް 2 އަހަރު ވެގެން ދިޔަ އިރު ވެސް އެ ކަމަށް އެއްވެސް އަލިމަގެއް ފެނިފައި ނުވާތީ ގިނަ ބަޔަކު ރައީސް މުއިއްޒު އަށް އަންނަނީ ފާޑު ކިޔަމުންނެވެ.
ހޯމަ ވިލޭރޭގެ ބައްދަލުވުމުގައި ރައީސް މުއިއްޒު އިތުރަށް ވިދާޅުވީ، އެއް އަހަރަށް ވުރެ ގިނަ ދުވަހު ވާނުވާ ބަންދުގައި ތިބި މީހުންގެ މައްސަލަ ޝަރީއަތުން ނިމުމުން ވާނުވާގައި ތިބި އިތުރު މީހުންގެ މައްސަލަތައް ވެސް އެއަށް ފަހުގައި ކުރިއަށް ދާނެ ކަމަށެވެ. އޭގެ އިތުރަށް، މި މައްސަލަތައް ސަރުކާރުގެ ތެރެއިން ކުރެވެން އޮތް އެންމެ ރަނގަޅަކަށް އެޓާރނީ ޖެނެރަލް ކުރައްވާނެ ކަމަށް ވެސް މުއިއްޒު ވިދާޅުވި އެވެ.
