ރައީސް ހިޔާލުދެއްވީ ސީޕްލޭން ގައި ފުރޮޅު ހަރުކޮށް ރަށްރަށު ގައި ޖެއްސޭ ގޮތަށް ހެދުން
ރައީސް މުއިއްޒު ވިދާޅުވީ ބޮޑެތި ރަށްތަކުގައި 600 މީޓަރުގެ އެއަރ ސްޓްރިޕެއް ހަދައި، ސީޕްލޭން ސައިޒުގެ ބޯޓުތަކުގައި ފުރޮޅު ހަރުކޮށް ޖެއްސޭނެ ކަމަށް. މިގޮތަށް ހެދުމުން ބޮޑު އެއަރޕޯޓެއް ބޭނުން ނުވެ، ރޭގަނޑު ވެސް ބޯޓު ޖެއްސޭނެ. މިހާރު ރާއްޖޭގައި 12-15 ސީޓުގެ ސީޕްލޭން ސައިޒުގެ ބޯޓުތައް ރިސޯޓްތަކަށް ފަތުރުވެރިން އުފުލަން ބޭނުން ކުރޭ.
ރާއްޖޭގައި ސީޕްލޭންގެ ގޮތުގައި ބޭނުންކުރާ ވައްތަރުގެ ޓްވިން އޮޓަރގެ ފުލައިޓެއްގައި ފުރޮޅު ހަރުކޮށްފައި
ރަށްރަށު ގައި އެއަރޕޯޓު އެޅުމުގެ ބަދަލު ގައި 600 މީޓަރުގެ އެއަރ ސްޓްރިޕަކާ އެކު ސީޕްލޭނު ގައި ފުރޮޅު ހަރުކޮށް ދަތުުރުކުރެވޭނެ ފަދަ ހިޔާލެއް ރައީސް ޑރ. މުހައްމަދު މުއިއްޒު ދެއްވައިފި އެވެ.
ޔޫތް ހަބުގައި ކުރިއަށްދިޔަ "ޔޫތް ކޮފީ ވިތް ޕްރެސިޑެންޓް" އިވެންޓުގައި ބައިވެރިންގެ ހިޔާލަކާއި ގުޅިގެން ރައީސް ވިދާޅުވީ ސީ ޕްލޭންގައި ރޭގަނޑުގެ އޮޕަރޭޝަން ނުހިންގޭނެ ކަމަށެވެ. އެހެންކަމުން އެއީ އެޑްރެސް ކުރަންޖެހޭ އެއް ކަންތައް ކަމަށާއި، ބޮޑެތި ރަށްރަށުގައި، އެއަރ ސްޓްރިޕެއް ހަދައި، ސީޕްލޭން ސައިޒުގެ ބޯޓުތަކުގައި ފުރޮޅު ހަރުކޮށް ޖެއްސޭނެ ގޮތަށް ހެދި ދާނެ ކަމަށެވެ. ރައީސް ވިދާޅުވީ އެގޮތަށް ހެދުމުން ވަރަށް ގިނަ ރަށްތަކުގައި ރޭގަނޑު ވެސް ބޯޓު ޖެއްސޭނެ ކަމަށާއި، ބޮޑު އެއަރޕޯޓެއް އެކަމަށް ބޭނުން ނުވާނެ ކަމަށެވެ.
ގާތްގަނޑަކަށް 600 މީޓަރުގެ ދިގުމިނުގެ އެއަރ ސްޓްރިޕެއް ހަދައިފިއްޔާ އެތާގައި ކުދި ބޯޓުތައް، މި ގެންގުޅޭ ސީޕްލޭން ބޯޓުތަކުގައި ފުރޮޅު ހަރުކޮށްފައި ދުއްވައިފިއްޔާ އެވަރުގެ ބޯޓު ޖެއްސޭނެ. އެއަރަކުން ނުޖެހޭ އެއަރޕޯޓު ހަދާކަށެއް. އެއިރުން ވަރަށް ގިނަ ރަށްތަކުގައި މަތިން ގޮސް ޖެއްސޭނެ. މިއީ ހަމަ ހެދިދާނެ ކަންކަން.ރައީސް ޑރ. މުހައްމަދު މުއިއްޒު
ރާއްޖޭގައި ސީޕްލޭން ސައިޒުގެ ބޯޓުތައް މިހާރު ބޭނުން ކުރަމުން އަންނަނީ ރިސޯޓްތަކަށް ފަތުރުވެރިން އުފުލުމަށެވެ. މި ބޯޓުތަކަކީ އާންމު ގޮތެއްގައި 12 މީހުންގެ ޖާގައިގެ ބޯޓުތަކެކެވެ. އެންމެ ބޮޑު ބޯޓެއްގައި ވެސް އިންނަނީ 15 ސީޓެވެ. އެއީ ފަޅުވެރިން ހިމެނޭ ހެންނެެވެ. މި ބޯޓުތަކަކީ އަޑުގަދަ އަދި ތިރިން ދުއްވާ ބޯޓުތަކެކެވެ.
ރާއްޖޭގައި ސީޕްލޭންގެ ގޮތުގައި ބޭނުން ކުރަނީ ޓްވިން އޮޓަރގެ އެއަރކްރާފްޓެވެ. ޑި ހެވިލަންޑް ޓްވިން އޮޓަރގެ ފްލައިޓުގެ ދިގުމިން ލޯޑާ ގުޅިގެން ވަރަށް ތަފާތު ނަމަވެސް އާންމުކޮށް 4 ގަޑި އިރާއި 6 ގަޑިއިރު ގެ ދަތުރެއް ކުރެވޭ އިރު، 600 އާއި 800 ނޯޓިކަލް މޭލު ދުއްވުމުގެ ގާބިލްކަން ލިބިފައިވެ އެވެ. ސްޓޭންޑަރޑް ފިއުލް އާއި އެކު، ރޭންޖް ގާތްގަނޑަކަށް 800 އާއި 900 ނޯޓިކަލް މޭލު ނަމަވެސް، މިއީ ބަރު ލަގޭޖާ އެކު އެ ގާބިލްކަން ކުޑަވެގެންދާނެ އެވެ. މިސާލަކަށް މެކްސް ޕޭލޯޑްގައި 1 ގަޑި 30 މިނިޓް ދުއްވުމުގެ ގާބިލުކަން ލިބިފައި ވޭ، އަދި ބަރު ނޫންކޮށް 5 ގަޑިއިރު ދުއްވެ އެވެ.
