އެމްޑީޕީ ލޯކަލް ކައުންސިލް އިންތިޚާބުގެ ޕްރައިމަރީ ބާއްވަން ސްކޫލެއް ނުލިބިދާނެ ކަމުގެ ބިރު ހީވެފައި
އެމްޑީޕީގެ ލޯކަލް ކައުންސިލް އިންތިޚާބުގެ ޕްރައިމަރީ ބާއްވަން ހަމަޖެހިފައި އޮތީ ޖެނުއަރީ 16 ގައި މެންދުރުފަހު 2:30 އިން ރޭގަނޑު 8:00 އަށް.
ލޯކަލް ކައުންސިލް އިންތިޚާބުގެ ކަންކަން ވިލަރެސްކުރުމަށް ކޮމިޓީގެ މުގައްރިރު އަދި ރައްޔިތުންގެ މަޖިލީހުގެ މާފަންނު މެދު ދާއިރާގެ ކުރީގެ މެމްބަރު މުހައްމަދު ފަލާހު ރާއްޖެ އެމްވީ އަށް ބަސްތީގަތުމެއް ދެއްވަނީ
މޯލްޑިވިއަން ޑިމޮކްރެޓިކް ޕާޓީ (އެމްޑީޕީ) ލޯކަލް ކައުންސިލް އިންތިޚާބު ގެ ޕްރައިމަރީ ބާއްވަން ސްކޫލެއް ނުލިބިދާނެ ކަމުގެ ބިރު ހީވެފައިވާ ކަމަށާއި އެއީ ވަރަށް ބޮޑު ކަންބޮޑުވުމެއް ކަމަށް އެ ޕާޓީގެ ލޯކަލް ކައުންސިލް އިންތިޚާބުގެ ކަންކަން ވިލަރެސްކުރާ ކޮމިޓީ ގެ މުގައްރިރު އަދި ރައްޔިތުންގެ މަޖިލީހުގެ މާފަންނު މެދު ދާއިރާގެ ކުރީގެ މެމްބަރު މުހައްމަދު ފަލާހު ވިދާޅުވެއްޖެ އެވެ.
ރާއްޖެ އެމްވީ އަށް ދެއްވި އިންޓަރވިއު އެއްގައި ފަލާހު ވިދާޅުވީ އެއްވެސް ސިޔާސީ ހަރަކާތަކަށް ސްކޫލްތައް ނުދޭން ނިންމާފައިވާ ކަމުގެ އަޑުތައް އިވިފައިވާ ކަމަށެވެ. ނަމަވެސް ލޯކަލް ކައުންސިލް އިންތިޚާބު ގެ ޕްރައިމަރީ ކުރިއަށް ދަނީ ސްކޫލް ދުވަސް ވަރު ނޫން ކަމަށް ވާތީ ސްކޫލްތައް ނުލިބެން ޖެހޭ ސަބަބެއް އޮތް ކަމަށް ޤަބޫލު ނުކުރައްވާ ކަމަށް އޭނާ ވިދާޅުވި އެވެ. ވޯޓުލުމުގެ ތަންތަން ކަނޑައެޅޭނީ ސްކޫލްތައް ލިބޭ ގޮތް އެނގުމުންނެވެ.
"ސްކޫލްތައް ނުލިބިދާނެ ކަމަށް އެބަ އަޑު އިވޭ. މިހާރު ވާނީ ސިޓީ އެއް ވެސް ފޮނުވާފައި. ކުރިން ޕްރައިމަރީ ބާއްވަން ހަމަޖެހިފައި އޮތީ ޖެނުއަރީ 30 ގައި. މިހާރު ޖެނުއަރީ 16 އަށް ވަނީ އަވަސްކޮށްފައި. 26 ރަށެއްގައި ބާއްވާނަން. މި މަހު 25 ގައި ރީރެޖިސްޓްރޭޝަނަށް އެބަ ހުށަހަޅަން. މާލޭގައި ވޯޓުލާ ނަމަ ޖެހޭނެ ރީ ރެޖިސްޓަރ ކުރަން. ޕާޓީ އިން އެދެން ވަރަށް ބޮޑަށް ޕްރައިމަރީ ބޭއްވޭނެ ގޮތެއް" އޭނާ ވިދާޅުވި އެވެ.
ފަލާހު ވަނީ މި އިންތިޚާބު ކުރިއަށް ދާނެ ދާއިރާތަކުގެ ތަފްސީލް ހިއްސާކޮށްދެއްވާފަ އެވެ. ލޯކަލް ކައުންސިލް އިންތިޚާބުގެ ޕްރައިމަރީ އާއި ގުޅޭ ގޮތުން ވާހަކަ ދައްކަވަމުން އެ ކޮމިޓީގެ މެމްބަރު، އެމްޑީޕީގެ ޤައުމީ މަޖިލީހުގެ މާފަންނު މެދު ދާއިރާ ރައީސް އަހުމަދު އާމިރު ވިދާޅުވީ އެންމެ ގިނަ އަދަދެއްގެ ބަޔަކު ޕްރައިމަރީގައި ވޯޓު ލަނީ މާލެ އަށް ކަމަށެވެ.
"ގާތްގަނޑަކަށް 6000 އާއި ގާތް ކުރާ އަދަދަކަށް މީހުން ވޯޓު ލާނެ. އެހެންވީމަ ސްކޫލްތައް ލިބުން ވަރަށް މުހިންމު" އޭނާ ވިދާޅުވި އެވެ.
މި ބައި އިލެކްޝަންގެ ވޯޓުލުން ކުރިއަށް ދާނީ ޖެނުއަރީ 16 ވާ މެންދުރު ފަހު 2:30 އިން ރޭގަނޑު 08:00 އަށެވެ. މި ޕްރައިމަރީގައި ވާދަ ކުރުމަށް ކައުންސިލް އިންތިޚާބަށް 510 އަށް ވުރެ ގިނަ ކެނޑިޑޭޓުން، ޑަބްލިއުޑީސީ އަށް 190 އަށް ވުރެ ގިނަ ކެނޑިޑޭޓުން ހުށަހަޅާފައިވެ އެވެ. ޕްރައިމަރީއަކާއި ނުލާ ހޮވޭ ފަރާތްތަކަށް އެކަން ޕާޓީ އިން ދަނީ އަންގަމުންނެވެ. މާލޭގައި 17 ދާއިރާ އެއްގައި ޕްރައިމަރީ ކުރިއަށް ގެންދާނެ އެވެ.
